Ko e Tuʻu ʻi he Ngaahi Potu Toputapú

ʻOku fakaafeʻi ʻe he ngaahi makasini ʻo e Siasí he taʻú ni ʻa e toʻu tupu mei he tapa kotoa ʻo e māmaní ke nau fakahū mai ha ngaahi tā ʻoku nau fakahaaʻi e anga ʻo ʻenau tuʻu ʻi he ngaahi potu toputapú. Vakaiʻi ha niʻihi ʻo e ngaahi fakatātā kuo fakahū maí pea sio ki he meʻa naʻe fai ʻe he toʻu tupú ke moʻui ʻaki e kaveinga ʻo e Mutualé he 2013.

1 Ko e taimi pē ʻoku ou kau ai ʻi ha ngaahi ʻekitivitī langaki moʻui, tautautefito mo hoku fāmilí, ʻoku ou tuʻu ʻi he ngaahi potu toputapú.

Loulī R., taʻu 16, Pilītisi Kolomupia, Kānata

2 ʻOku ou tuʻu ʻi he ngaahi potu toputapú ʻi he taimi ʻoku ou fakamahuʻingaʻi lahi ange ai ʻa e ngaahi meʻa ʻoku taʻengata honau mahuʻingá ʻi he ngaahi meʻa ʻo e māmaní.

Keeki M., taʻu 18, Nikolosi ʻOkisitenitolo, Filipaini

3 Kiate au, ʻoku ʻuhinga ʻe tuʻu ʻi he potu toputapú ke fai ha tokoni. Ko e founga ʻoku ou saiʻia taha ai hono fai ʻo e tokoní ko e loto temipalé. ʻOku ou lava ʻo ongoʻi ʻa e faʻahinga laumālie mālohi ko iá ʻi he taimi ʻoku ou fakahoko ai e ngāue ʻa e ʻEikí ʻi he fale ʻo e ʻEikí.

Kiana B., taʻu 15, ʻIutā, USA

4 ʻOku ou lolotonga tuʻu ʻi he veʻe vai papitaiso naʻe papitaiso ai aú. ʻOku ou lau e vai papitaiso ko ʻení ko ha potu toputapu koeʻuhí he ko e feituʻu ia ʻoku fakahoko ai ʻe he kakaí e ngaahi fuakava mo e ʻOtuá pea mo fakafoʻou kinautolú.

Siō-Sāmita E., taʻu 17, ʻAkiua ʻIpomi, Naisīlia

5 Ko e taimi pē ʻoku ou kaka hake ai he ʻotu moʻungá pea mavahe mei he māmaní, ʻoku ou fakatokangaʻi te nau lava ʻo hoko ko ha ngaahi potu toputapu mo nonga.

ʻEma P., taʻu 17, ʻOlikoni, USA

6 ʻOku ou manako ʻi tuʻa, pea ko e taimi pē ʻoku ou ʻi ha feituʻu ai hangē ko ʻení (Delicate Arch [ʻAleso Pelepelengasi] ʻi Moape ʻi ʻIutaá), ʻoku ou ongoʻi vāofi ange ki heʻeku Tamai Hēvaní. ʻOku tokoni ʻeku lava ʻo mamata ki he ngaahi meʻa fakaofo naʻe fakatupu ʻe he Tamai Hēvaní maʻatautolú ke u ongoʻi ʻa e Laumālié.

Sione T., taʻu 18, ʻIutā, USA

7 Ko hoku ʻapí, ko ha potu toputapu koeʻuhí he ʻoku ou ongoʻi ha fiefia mo ha nonga lahi ai. Pea ko e taimi ʻoku ou lau ai ʻa e Tohi ʻa Molomoná, ʻoku ou ongoʻi ha nonga ʻi he Laumālie Māʻoniʻoní.

Melisa D., taʻu 13, Kosovō

8 Ko ha tā ʻeni mei he Kamata Foʻoú (New Beginnings). Kiate au, ʻoku hoko e fale ʻo e Siasí ko ha potu toputapu ʻa ia ʻoku ou ako ai e ngaahi ʻulungaanga mahuʻinga ʻo e Kau Finemuí mo e ngaahi tefitoʻi moʻoni ʻo e ongoongoleleí. ʻOku ou toe fakamālohia foki ʻeku feohi fakakaungāmeʻa mo e kau finemui ʻoku mau tui fakalotu tataú ʻi he lotú.

Luisi S., taʻu 12, Lio Kuleni to Sula, Palāsila

9 ʻOku ou tuʻu ʻi ha potu toputapu ʻi he taimi ʻoku ou tokoni ai ki he kakaí mo fiefia mo hoku kaungāmeʻa leleí.

Sēmisi R., taʻu 17, Kalolaina Tokelau, USA

10 ʻOku ou tuʻu ʻi ha potu toputapu ʻi he taimi ʻoku ou fakataha ai mo e kaungāmeʻa ʻoku nau moʻui ʻaki e ongoongoleleí. ʻOku nau tokoni ke u kei fetuʻutaki mo ʻetau Tamai Hēvaní pea mo fengāue ʻaki lelei mo e Laumālie Māʻoniʻoní.

Sonatane N., taʻu 17, Puenosi ʻAealesi, ʻĀsenitina

11 ʻOku ou tuʻu ʻi he ngaahi potu toputapú ʻi he taimi ʻoku ou tā ai ʻa e pianó ʻi he houalotu sākalamēnití. ʻOku fakamālohia ʻe he fasí mo e fakalea ʻo e ngaahi himí ʻeku tuí mo ʻeku fakamoʻoní.

Selisī A., taʻu 13, Peniteni, ʻInitonēsia

12 ʻOku ou tuʻu ʻi he ngaahi potu toputapú ʻi he taimi ʻoku ou tā ai ʻa e ngaahi hivá ʻi he houalotu sākalamēnití koeʻuhí he ʻoku ongo kiate au ʻa e hiva mālie ʻa e kāingalotú.

Siovani W., taʻu 15, Peniteni, ʻInitonēsia

13 ʻOku ou tuʻu ʻi he ngaahi potu toputapú ʻi he taimi ʻoku ou akoʻi ai ʻeku kōlomú he Sāpaté. ʻOku ou manako ke vahevahe ʻa e ongoongoleleí.

Lamona M., taʻu 16, Kalefōnia, USA

Ngaahi Potu Toputapu Kehe

Ko e founga ʻeni ʻoku fakakakato ai ʻe ha toʻu tupu ʻe niʻihi e sētesí “ʻOku ou tuʻu ʻi he ngaahi potu toputapú ʻi he taimi …”

• “ʻOku ou vahevahe ʻa e ongoongoleleí mo hoku kaungāmeʻá.” Sione B., taʻu 17, Siala, Palāsila

• “ʻOku ou tuʻu mo e kau faifekaú, koeʻuhí ʻoku ʻomi ʻe he ngāue mo kinautolú ha taukei lahi ange ʻi hono vahevahe ʻo e ongoongoleleí, pea ʻe vavé ni haʻaku hoko ko ha faifekau taimi kakato.” Siosefa H., taʻu 18, Sakata, ʻInitonēsia

• “ʻOku ou ʻi he malaʻe pasiketipoló aí mo faʻa tokoni ki hoku kaungā vaʻinga he timí pea mo fakahaaʻi e anga fakasipoti leleí ki he kau vaʻingá, pea naʻa mo e timi ʻe tahá.” ʻĒmili C., taʻu 12, ʻIutā, USA

• “ʻOku mau hiva ʻi he kuaea ʻa e ako māʻolungá mo vahevahe homau talēnití.” Tena M., taʻu 17; Keilini S., taʻu 15; Lekisī J., taʻu 17; Sipenisā M., taʻu 17; ʻAitahō, USA

• “ʻOku ou ʻalu ai ki he nofo kemi ʻa e Kau Finemuí. ʻOku ou maʻu ai e faingamālie ke feʻiloaki mo e kau finemui kehe ʻoku nau tauhi e ngaahi tuʻunga moʻui mo e ngaahi ʻulungaanga mahuʻingá pea mo feʻiloaki mo e kau faiako ʻoku nau akoʻi mai e ngaahi tefitoʻi moʻoní ke tau lava ʻo ako ke fai ʻa e meʻa ʻoku totonú.” Noma V., taʻu 17, Kaiasi, ʻEkuatoa

• “ʻOku ou ʻalu ai ki he seminelí. ʻOku tokoni ia ke u tauhi ʻa e Laumālié ʻi he ʻahó kotoa!” Savana F., taʻu 17, ʻAlesona, USA

• “ʻOku ou fakahā ki hoku kaungā timí ʻa e meʻa ʻoku ou taukaveʻí ʻi heʻemau ako fakakaekae he akó.” Makena F., taʻu 15, Kalefōnia, USA

• “ʻOku ou tufa ʻa e sākalamēnití mo manatuʻi e Fakalelei ʻa Sīsū Kalaisí.” ʻEkisolo S., taʻu 14, Sakata, ʻInitonēsia

• “ʻOku ou tauhi au ke u maʻa pea mo fili ʻa e totonú, koeʻuhí he ʻoku ou ʻiloʻi kapau te u fakahoko maʻu pē ia, te u lava ʻi ha ʻaho ʻo mali ʻi he temipalé.” Uitinei H., taʻu 15, ʻIutā, USA

• “ʻOku ou tauhi ʻeku ngaahi fuakava mo e ʻOtuá.” Maʻake M., taʻu 17, ʻOlikoni, USA

Fakakaukau he taimí ni ki he meʻa kuó ke ako mei he kaveinga ʻo e Mutualé he taʻu ní. Ko e fē ha niʻihi hoʻo ngaahi potu toputapú? Te ke hoko atu fēfē ke tuʻu ʻi he ngaahi potu toputapú? Vakai ke lekooti hoʻo ngaahi fakakaukaú ʻi hoʻo tohinoá.

Tā ʻo e Temipale Kulitipa Palāsilá ʻe Wellinton Luiz Siqueira