Aiga Sili ona Lelei e Faavavau
“E i ai so’u aiga i lalo nei. Alolofa ia te au” (“E Mafai ona Faavavau Aiga,” Tusipese a Tamaiti, 98).
Sa le amanaiaina e isi teineiti ia Olivia. Mata e mafai ona fesoasoani se pakete vali?
Na faatautau le ulu o Olivia ao ia faalogo atu ma le fiafia i musumusu a teineiti o loo saofafai i tua atu o ia i luga o le pasi.
“Ou te matua fiafia lava na fai mai lou tina e mafai ona ta o faatasi i lalo i lo’u fale faatali pasi! Na e aumaia ia taaloga?”
“O lea e ia te au. Na faataga au e lou tina e aumai foi se taga popukoni!”
Sa faauu Olivia i le tusi na ia faitauina. Mata o la iloa e mafai ona ia lagonaina i laua? Sa mautinoa lava lona le fia faalogo atu i ana uo e toalua o fai ni fuafuaga mo se mea e le o valaauliaina i ai o ia.
O Stephanie, Repeka ma Olivia ua leva ona avea ma ni uo. Sa masani ona latou faia faatasi mea uma. Ae ina ua amata le tausaga fou o le aoga, sa iloa ai e Stephanie ma Repeka e tutusa le la faiaoga, ao Olivia e ese lana vasega! Na manatuaina e Olivia le lagona faanoanoa sa ia lagonaina i lona manava ao talanoa ma le naunautai ia teineiti e toalua e uiga i le nonofo faatasi i le vasega ma aai faatasi i le taimi o le malologa. Sa i ai lena lava lagona faanoanoa i le taimi lenei.
Na tu le pasi i luma o le fale o Repeka. Na matamata atu ma le faanoanoa Olivia mai le faamalama ao feosofi i lalo mai le pasi le au tamaitai ma tamomoe atu i luma o le fanua.
E oo atu le pasi i le mea e nofo Olivia, ua tau le mafai ona taofiofi ona loimata. Sa ia faanatinati atu i totonu o le fale.
“Na a mai le aoga?” O le fesili lea a tina.
Na amata ona tagi Olivia. “E le manaia! Ua tau le toe talanoa mai Repeka ma Stephanie ia te au, ae e tatau ona avea i matou ma uo mamae e faavavau! sa ia tagi masusu ai.
“Ua ou faanoanoa lava, Olivia E mafai ona faigata pe a amata ona i ai ni suiga i ni faigauoga,” o le tala lea a Tina. Sa malolo o ia mo sina taimi. “E te manatua ina ua tatou o i le malumalu e faamauina?” sa ia fesili mai, faasino atu i le ata o loo tautau i luga o le puipui. Sa tilotilo atu Olivia ma vaai i lona aiga o ataata mai i luma o le malumalu. Sa laitiiti lava o ia i lena taimi, ae na te manatua pea le faatasi ai ma ona matua ma lona uso matua, o Sieni, i le potu matagofie e fai ai faamauga.
“E te iloa le mafuaaga na tatou galulue malosi ai ina ia saunia e o i le malumalu?”
“Ona sa tatou mananao e avea o se aiga faavavau?” O le tali mai lea a Olivia.
“Sao lelei. E tusa lava pe e te le o toe uo mamae ma Repeka ma Stephanie e faavavau, o loo i ai lava lou aiga o loo avea ma au uo e faavavau.”
“Ioe,” o le tala lea a Olivia. “Ae e le tutusa.”
“Ou te iloa o loo afaina ou lagona,” o le tala lea a Tina, “ae ou te faafetai ua e oo mai i le fale. E i ai se galuega mo oe ma Sieni.”
Sa le talitonu taliga o Olivia. Nai lo le fesoasoani ia te ia ia maua se lagona lelei, sa tuuina atu e Tina ia te ia ni feau!
“Alu e fai ni ou ofu tuai ona ta feiloai lea i le poletito i tua. Fai atu ia Sieni lua te o mai.”
Na alu Olivia i le fogafale a luga, na tatu ona vae ua malosi teisi atu nai lo le mea e masani ai, ma fai ona ofu faigaluega.
Ina ua uma ona fai ofu o teineiti ma o i fafo, sa la vaaia Tina o loo savali mai mai le fale e tuu ai meafaigaluega. Sa ia tauaveina se apa lanumeamata, o ni pulumu valifale, ma se fasipepa palasitika. Ina ua ia taunuu atu i le poletito, sa faataatia i lalo le palasitika ma tuuina atu ia tofu teineiti ma le pulumu.
“O le a e tuuina mai ma te valiina se mea?” sa fesili atu Olivia ma le le mautinoa. E masani lava o Tama e faia ia ituaiga o galuega faatino.
“Ioe,” o le tala lea a Tina. “Ou te manao ia oo atu i le taimi o le ‘aiga o le afiafi ua uma ona vali le faitotoa pito i tua.” Ona ia faliu lea ma alu i totonu o le fale.
Sa tilotilo leisi teineitiiti i le isi mo se taimi umi lava ona toe lea. Atonu o le a avea ma se mea malie. Sa lolō a laua pulumu i totonu o le vali lanu meamata lamolemole, ma amata ona galulue. Sa fiafia Olivia i lenei galuega—sa lei foliga mai e pei o le faia o ni feau. Na faaali atu e Sieni ia te ia le ala e fai ai ni vali uumi ma sasao. E lei umi ae ua talie ma talatalanoa ia teineiti. Sa amata ona toe manatua e Olivia ia taimi malie sa la faaaluina faatasi ma Sieni. Sa fiafia o ia o loo i ai lava pea lona uso e avea o se uo.
I ni nai itula mulimuli ane, sa valia uma teineiti ma o loo ataata tetele. Na tatala e Olivia ma le faaeteete le faitotoa lanumeamata iila ma falo atu lona ulu i totonu. “Tina, ua uma ona ma valiina le faitotoa,” sa ia valaau atu ai. “Sau e vaai i lona manaia tele!”