O Faamanuiaga o le Malumalu
Mai se lauga o se faigalotu, “Faamanuiaga o le Malumalu,” lea na tuuina atu i le Iunivesite o Polika Iaga i le aso 15 o Novema, 2005. Mo le tusiga atoa i le gagana Peretania, asiasi i le speeches.byu.edu.
O sauniga faaola o le malumalu e alagatatau i le—ma o le taulaiga tupito foi lea—o le fuafuaga e faavavau o le fiafia.
Ata na tusia e Craig Dimond
O faamanuiaga o faaeega paia o le malumalu e alagatatau mo i tatou taitoatasi e pei lava ona i ai o tatou papatisoga O le mafuaaga lea e tatau ai ona saunia i tatou lava ina ia tatou mama e ulu atu i le malumalu o le Atua. O le galuega faalemalumalu o se avanoa lea e faataunuu ai faaeega paia o le tagata lava ia ma feagaiga mo i latou o loo soifua ma faapea foi ona faataunuu ai nei lava sauniga mo le faaolaina o e ua maliliu. O le mafuaaga lenei ua aoaoina ai i tatou i tusitusiga paia e fausia malumalu ma saunia o tatou olaga ina ia agavaa e auai i sauniga ma feagaiga paia o le malumalu.
Ua aoaoina i tatou i tusitusiga paia o le agavaa patino e manaomia mai ia i tatou e le Alii e ulu atu i le malumalu ma tauave i o tatou luga feagaiga paia e osia ai i totonu o se tasi o faamanuiaga silisili e mafai ona tatou maua i le olaga nei. Ona sosoo lea, ina ua uma ona tauaveina i o tatou luga feagaiga i le malumalu, lo tatou usiusitai i le ola i aso taitasi i feagaiga o se faaaliga o lo tatou faatuatua, alofa, tuuto, ma le tautinoga faaleagaga e ava i lo tatou Tama Faalelagi ma Lona Alo o Iesu Keriso, ma saunia ai i tatou e nonofo faatasi ma i Laua i le faavavau. O sauniga faaola o le malumalu e alagatatau i le—ma o le taulaiga tupito foi lea—o le fuafuaga e faavavau o le fiafia.
O Le Malumalu Paia
E tatau ona tatou maua se molimau ma se lagona o le migao mo le malumalu o le maota o le Alii. O le malumalu o se nofoaga moni lea e te “i ai i le lalolagi ae le o ni o le lalolagi.” Pe a e mafatia ma i ai ni filifiliga taua e faapea ona mamafa tu i lou mafaufau ma lou loto, e mafai ona e aveina atu ou atugaluga i le malumalu ma maua mai ai se taitaiga faaleagaga.
Ina ia puipuia le paia o le malumalu ma ia faatumauina le mama ma valaaulia ai le Agaga e faamanuia i latou o e ulu atu i le malumalu paia mo o latou sauniga ma feagaiga, ua aoaoina ai i tatou e leai se mea eleelea e tatau ona ulu atu i le malumalu. O le migao i totonu o le malumalu o se itu taua lea o le valaauliaina o le Agaga e nofo ai i totonu i taimi uma o aso uma.
A o ou laitiiti, sa aumai au e lo’u tama mai Long Island, Niu Ioka, ISA, ina ia ou savalivali i lotoa o le Malumalu o Sate Leki i le Aai o Sate Leki, ia ou pai atu i le malumalu, ma ia talanoaina le taua o le malumalu i lo’u olaga. Ona o lena mea sa tonu ai i lo’u mafaufau o le a i ai se aso o le a ou toe foi e ulu atu i le malumalu ma maua ia sauniga.
O le malumalu o se maota paia, o se nofoaga paia lea e faataunuuina ai sauniga faaola talafeagai e saunia ai i tatou mo le faaeaga. E taua lo tatou mauaina o se malamalamaaga mautinoa e faapea, o a tatou sauniuniga e ulu atu i le maota paia ma o lo tatou auai i nei sauniga ma feagaiga o nisi ia o mea e tutupu e sili ona taua o le a tatou oo i ai i o tatou olaga i le tino.
Faamanuiaga o le Malumalu i le Talafaasolopito atoa
I le talafaasolopito atoa, i tisipenisione uma lava, ua poloaiina ai e le Alii ia perofeta e tatau ona fausia malumalu ina ia mafai e Lona nuu ona maua sauniga o le malumalu.
O le Malumalu o Katelani o le malumalu muamua lea i nei aso e gata ai, ma na i ai sona sao taua i le toefuataiina mai o ki o le perisitua. Na faaali mai le Faaola i le mamalu ma taliaina le Malumalu o Katelani e fai ma Ona maota. I lena taimi, na faaali mai Mose, Elaia, ma Elia e tuuina atu ia Iosefa Samita ki na umia mai a latou tisipenisione. Na toefuatai mai e Elia ki o lona tisipenisione e pei ona folafola mai e Malaki, ina ia mafai ona tatou olioli i faamanuiaga o le malumalu i o tatou olaga. (Tagai MF&F 110.)
Na Faaali Mai le Alii i le Malumalu o Katelani, saunia e Del Parson
O le Malumalu o Navu o le malumalu muamua lea o aso e gata ai na faatinoina ai sauniga o faaeega ma faamauga, lea na faamaonia ai le malolosi tele o paionia a o latou onosaia faigata o le sopoiaina o laufanua valevalenoa e agai atu i Siona i le Vanu o Sate Leki.
Ina ua aveesea Iosefa Samita i Karafasi, sa manino lava le mafuaaga na taua tele ai ia te ia le faamaeaina o le malumalu. Sa ia silafia le mea o le a manaomia e le Au Paia ma o le i ai o le malosi e onosaia ai mea sa i luma atu o i latou e tatau ona faaeeina atu ia i latou le mana—le mana o le perisitua.
Na faamauina faatasi o ni aiga o tatou tuaa paionia i Navu. O a latou feagaiga na osia ma le Alii i le Malumalu o Navu o se puipuiga mo i latou i le taimi o la latou malaga i sisifo, e pei ona i ai mo i tatou taitoatasi i le taimi nei ma i o tatou olaga atoa. O sauniga ma feagaiga o le malumalu o ni puipuiga mo i tatou i o tatou tofotofoga ma faigata i o tatou aso ma mea o le a fetaiai ma i tatou i le lumanai. O lo tatou tupuaga. O le tagata lea e i ai i tatou.
Tuua Navu, saunia e Glen S. Hopkinson, e le mafai ona kopiina
Mo nei Au Paia anamua, o lo latou auai i sauniga o le malumalu e taua tele i a latou molimau a o latou feagai ma faigata, o tagata faatupu faalavelave feita, o le tutuli ese mai fale mafanafana i Navu, ma le malaga umi ma faigata i luma atu. Sa faaeeina i latou i le mana i totonu o le malumalu paia. Sa faamauina le tane ma le ava o le tasi i le isi. Sa faamauina fanau i o latou matua. O le toatele o i latou na toesea tagata o o latou aiga i le ala ona o le oti, ae na latou iloaina e le o le iuga lea mo i latou. Sa faamauina i latou i totonu o le malumalu mo le faavavau atoa.
O Sauniga o le Malumalu—Faaeega Paia ma Faamauga
O malumalu o iunivesite aupito sili ia o le aoaoga ua iloa e tagata, ua tuuina mai ai ia i tatou le malamalama ma le poto e uiga i le Foafoaga o le lalolagi. O mulumuluga ma faauuga e tauina mai ia i tatou po o ai i tatou. O aoaoga o faaeega paia e tuuina mai le taitaiga e faatatau i le auala e tatau ona tatou faatautaia ai o tatou olaga iinei i le olaga nei (tagai i le MF&F 97:13–14).
O le faamoemoega autu o le malumalu o le tuuina mai lea o sauniga e manaomia mo lo tatou faaeaga i le malo selesitila. O sauniga o le malumalu e taitaiina atu ai i tatou i lo tatou Faaola ma tatou maua ai faamanuiaga lea e oo mai ia i tatou e ala i le Togiola a Iesu Keriso. O le uiga o le upu faaeega paia o le “meaalofa.” O le sauniga e i ai se faagasologa o aoaoga i le ala e tatau ona tatou ola ai ma feagaiga tatou te osia ina ia ola amiotonu ai e ala i le mulimuli i lo tatou Faaola.
Ata pue o totonu o le Malumalu o Kansas City Misuri saunia e Matthew Reier
O le isi sauniga taua o le faamauina lea mo le faavavau i le faaipoipoga faaselesitila. O lenei feagaiga e mafai ai e tamaiti ona faamauina i o latou matua ma o tamaiti e fananau i totonu o le feagaiga e avea ma se vaega o se aiga e faavavau.
Ua aoaoina i tatou e le Mataupu Faavae ma Feagaiga: “O soo se mea e te faamaufaailogaina i le lalolagi o le a faamaufaailogaina i le lagi; ma o soo se mea e te faamauina i le lalolagi, i loʼu igoa ma i laʼu upu, ua fetalai mai ai le Alii, o le a faamauina e faavavau i le lagi; ma o soo se agasala a soo se tasi e te faamagaloina i le lalolagi o le a faamagaloina foi e faavavau i le lagi; ma o soo se agasala a soo se tasi e te taofia pea i le lalolagi o le a taofia pea foi i le lagi” (MF&F 132:46).
A tootutuli se ulugalii i le fata faitaulaga, ma i le avea ai ma sē e faia faamauga, ua ou nofouta i lo’u tiute o se sui o le Alii. Ua ou iloa o le mea e faamaufaailogaina i le lalolagi e faamaufaailogaina moni i le lagi—e le matatalaina pe afai e tumau faamaoni i latou na faamauina ma tumau e oo i le iuga.
O faaata i luga o puipui faafesagai i le potu mo faamauga o le malumalu ua faatulagaina e fatu ai ni lagona o ni vaaiga o ni ata e leai ni mutaaga. O le vaavaai i totonu o nei faaata i le tasi itu o le potu ua faatusa i le faavavau o taimi lea sa tatou malaga ai e o mai i le lalolagi. A o tatou liliu atu i le isi itu o le potu, o le a tatou vaai i ata e foliga mai e le muta o loo faatusa i le faavavau ina ua uma ona tatou tuua lenei olaga maaleale i le lalolagi. Ua suitulaga le potu o faamauga i lo tatou olaga faataitai iinei i le lalolagi. O le lesona e aoaoina mai lenei aafiaga o le malumalu e faapea ua tatou faia ni filifiliga sao e o mai i le lalolagi, ma tofo i le olaga nei ma iloa ai o le ala o tatou ola ai i lenei vaitau puupuu o le a fuafua ai le ala o le a tatou ola ai i le faavavau atoa o le a oo mai.
Ua e saunia e fetaiai ma tofotofoga o le olaga faaletino. Sa tatou o mai ma le lotomalie mai le afioaga o le Atua le Tama i lenei olaga faataitai ma le saolotoga, ma le iloa o le a tatou maua “le faafeagai o mea uma” (2 Nifae 2:11). O lo tatou faamoemoega (tagai i le 1 Nifae 15:14) o le ave i o tatou luga le ofutau atoatoa o le Atua ma tetee atu ai “i ufanafana mu a le fili” (MF&F 3:8) ma a tatou pelu o le Agaga ma le talita o le faatuatua (tagai i le MF&F 27:15–18), e tumau seia oo i le iuga, ma ia agavaa e tutu ma ola i le afioaga o le Atua le Tama ma Lona Alo, o Iesu Keriso, mo le faavavau atoa—ina ia ausia mea e ta’ua o le ola e faavavau.
Ou te tuu atu ia te outou la’u molimau o loo soifua le Atua; o Iesu o le Keriso; ma na toefuatai mai e Iosefa Samita, le Perofeta o lo tatou tisipenisione, ia faamanuiaga o le perisitua e mafai ai ona tatou tofo i faamanuiaga o le malumalu.