O Se Minute ma le Afa i le Timu

Jason Bosen, Iuta, ISA

I le tuputupu ae, o au le tamaitiiti e te le tau popole i ai. Sa ou toaga i le Ekalesia i lo’u olaga atoa. Sa avea au ma le peresitene o la’u korama o le perisitua ma vasega o le seminare. Sa ou alu i konafesi uma a le autalavou, malaga i le malumalu, gaoioiga a le Sikauti, ma po o le Mutuale. Sa ou maua foi se molimau e uiga i le talalelei. Ae ina ua avea au ma se tasi o la’u korama a ositaulaga, sa ou tauivi, e ui ina sa leai se tasi na iloaina. Aua e moni lava, o au o le tamaitiiti e te le tau popole i ai.

O na nai vaiaso ma masina muamua i le korama sa ou faia le mea e masani lava ona ou faia: sa ou alu i le lotu, Mutuale, ma gaoioiga faaSikauti. Ae peitai, i totonu, sa ou tauivi. Ou te lei lagonaina o a’u o se vaega o le faapotopotoga po o mananao isi alii talavou ia ou i ai iina. Sa ou matua naunau lava ina ia auai.

A o faagasolo pea le taimi, sa i ai au fesili ma masalosaloga e uiga i le pe ou te fia avea ma se vaega o le korama. Ae na ou tumau malosi, mafatia filemu ma faamoemoe o le a i ai se mea po o se tasi o le a fesoasoani mai ia te au ia lagona le taliaina.

Faatoa uma lava ona ma faia ma lou tama lau taavale muamua, o se Ford Mustang 1967 matagofie. E fesili soo mai ai lava ia Brother Stay, o lau peresitene o Alii Talavou. Sa ou mafaufau o ana fesili na faaalia ai lona fiafia i se taavale maoae—ae le o se alii talavou.

Na suia uma nei mea i se tasi afiafi timuga ina ua uma le Mutuale. Ona o le maligi o timuga, na momoli uma ai i matou i le fale mai le falelotu e Brother Stay, na mulimuli lava momoli au. Ina ua ia vaai i la’u Mustang lanumoana i le auala taavale, sa ia toe fesili mai e uiga i ai. Sa ou ofoina atu na te matamata i le afi lea sa ou faaaluina ai le tele o itula e toe faaleleia.

E le tele se silafia a Brother Stay e uiga i taavale, ma sa faatali mai lona toalua ma lona atalii laitiiti i le fale mo ia. Ae sa ia tu ai iina i le pogisa, i le timu, ma tilotilo atu i se afi taavale e tau le iloa. I lena taimi sa ou iloa ai na te le o faia le mea sa ia faia e vaai ai i se taavale maoae—sa ia faia ona o lona alofa ia te au.

Ona o lena minute ma le afa o tu ai i le timu, sa ou maua le mea sa ou manaomiaina. Ua iu lava ina ou lagona le taliaina. Ua tali mai au talosaga le magagana.

Talu mai lena taimi ua ou alu i le malumalu, auauna atu i se misiona, faauu mai le kolisi, ma taumafai e tausia au feagaiga. Atonu e le o manatua e Brother Stay lena taimi, ae o le a le galo lava ia te au.

Ua tofu uma lava i tatou ma tauiviga, ae e mafai lava ona tatou sailia se minute ma le afa faaopoopo i aso taitasi e faaali atu ai le alofa i se tasi o fanau a le Atua. Atonu o le a faia ai se eseesega tele—e oo lava i se tasi tatou te manatu e le tatau ona tatou popole e uiga i ai.