Auala e Faatumu ai Lau Tusi o le Ola
Mai se faeasaite a le Ofisa o Aoga a le Ekalesia na tuuina atu i le aso 1 o Novema, 1992.
Ata na saunia e John Luke
Ou te sau ia te outou ma se fesili e uiga i manatuaga e faavavau o loo outou fausiaina i o outou olaga. Pe o mulimuli mai ai le faamatalaga “Maumau pe ana sa ou faia,” pe e mafai ona e fai atu, “Ou te fiafia sa ou faia”?
O le tepa tua i le talafaasolopito, pe afai e mafai ona tatou filifili na o le tasi se mataupu faavae o le a faapitoa ona saofaga atu i le manatua o le “Ou te fiafia sa ou faia”, o le a lena mataupu faavae? O le mataupu faavae o le usiusitai.1
Tatou te tusia uma mea i aso taitasi i a tatou tusi o le ola. E i ai taimi tatou te suesue ai faamatalaga tusia o loo tatou faia. O a ituaiga o mea e manatua o le a lolovaia ai lou mafaufau a o e suesueina ia itulau o au faamatalaga tusia faaletagata lava ia? Mata e fia ni itulau o le a aofia ai ni faamatalaga tusia “Maumau pe ana sa ou faia”? Mata o le a i ai ni faamatalaga tusia o le faatuai ma le toilalo e faaaoga ai avanoa faapitoa? Mata o le a e maua ai ni faamatalaga tusia o le le mafaufau i le va ma le aiga, uo, po o tagata ese foi? Mata o le a i ai ni faamatalaga tusia o le salamo e mafua mai i faatinoga o le amioletonu ma le le usiusitai?
O le mea e lelei ai, o aso taitasi e aumai ai se itulau mama, ma lanu paepae lea e suia ai faamatalaga tusia mai le “Maumau pe ana sa ou faia” i le “Ou te fiafia sa ou faia” e ala i le faagasologa o le aloaiaina, faanoanoa, salamo, ma le faaleleiga. O lagona o le atuatuvale mo galuega ua tuanai po o avanoa ua misia o le a tanumia e faamaumauga o manatuaga ua faatumulia i le fiafia, naunautai, ma le olioli i le ola.
A o e suesueina ai ia manatuaga na e tuuina i lau tusi o le ola, mata o le a e mauaina ai ia mea ia sa muai fuafuaina e le Alii i le usiusitai i Ana tulafono? Mata o le a i ai ni pepa faamaonia o papatisoga, faauuga i perisitua mo le Perisitua Arona ma le Mekisateko mo alii talavou ma tusi faamaonia Aloaia a Tamaitai Talavou mo tamaitai talavou, ma, ioe, o se tusi o le faamalologa aloaia mai se misiona talai? Pe o le a i ai ni pepa faataga o le malumalu o faaaogaina, lisiti o sefuluai, se faaipoipoga e faatinoina i totonu o le malumalu paia, ma le taliaina o ni valaauga o le perisitua ma ausilali?
O la’u fautuaga ia te oe o le faatumu o au faamaumauga o manatuaga ma lau tusi o le ola i le tele o gaoioiga “Ou te fiafia sa ou faia” e mafai ona e faia (tagai i le Mosaea 2:41).
Saili le tautinoga ma le amio pulea e sailia ai na aafiaga lelei o le a taitai atu ai i le saolotoga ma le ola e faavavau. O la’u molimau ia te outou o loo soifua le Atua. O le faaogatusa o tatou olaga ma Lana tulafono o le a tatou maua ai iinei le fiafia moni ma avanoa e faavavau i le olaga a sau.