Noa

“O [Noa] e sosoo mai ia Atamu lona tulai mai i le pule i le Perisitua; na valaauina o ia e le Atua i lenei tofi, ma o ia o le tama o tagata ola uma i ona aso.”¹—O Le Perofeta o Iosefa Samita

Sa tuuina mai e lo’u tama ia te au le igoa o Noa, o lona uiga “malologa,” ona sa ia talitonu o le a ou aumaia le toafilemu i lo’u aiga. Sa ou ola ae i se taimi pogisa e tumu i mala ma fetauaiga, inoino, ma isi agasala.²

O le Atua, na lapatai mai ia te au o le a faaumatia e se lolo e amioleaga, na faatonuina au e fau se vaa ma aoina mai meaai ma manu. O le fesoasoani mai a lau fanau tama e toatolu ma le uunaiga a le Atua, na ou galue ai e fau le vaa mo le 120 tausaga na sosoo ai. E le’i i ai lava se faamaoniga o le oo mai o le timu.³

Na ou talai atu foi le salamo, ma faamoemoe o le a i ai nisi o le a faalogo ma sosola ese mai le Lolo. Mai le faaliliuga o Enoka seia oo i le Lolo, sa aveina le toatele o tagata faamaoni i le lagi e aunoa ma le tofo i le oti, ae o isi sa mumusu e salamo.⁴

Ina ua oo i le taimi e malaga ai lou aiga i luga o le vaa, na matou faamauina le faitotoa ma e le’i toe tatalaina lava seia oo ina ua maea timuga ma ua matutu le laueleele, e latalata i se tausaga mulimuli ane.⁵ Ina ua matou tuua [le vaa], na osifeagaiga le Atua o le a le toe oo mai lava se lolo i le lalolagi. O se nuanua na faaofuofu mai i le lagi o se faatusa lea o Lana folafolaga. Sa ia poloaiina i matou e faalautele o matou aiga ma ia faaauau pea ona ola ai i le talalelei, ma sa avea a’u ma tama lona lua o tagata.⁶

I seneturi mulimuli ane, i le avea ai ma se agelu e igoa ia Kaperielu,⁷ na ou folafola atu ai i le ositaulaga o Sakaria o le a avea o ia ma tama o Ioane le Papatiso, ma sa ou faaali atu ia Maria ma fai atu i ai o ia o le a fanau mai ai le Faaola.⁸

E faaalia i lo’u olaga e faapea, e oo lava i taimi faigata, o le a e lē tu na o oe pe afai e te mulimuli i le Atua. O lologa o le olaga o le a iu lava ina faaitiitia, ma o le a e vaai i le matagofie o le talalelei i lou olaga, e pei lava o le nuanua lea o loo faalava ae i le lagi.