Faasoa atu o Pusa o le Toe Foi i le Aiga
E alala le tusitala i Mindanao, Filipaina.
Ata na tusia e Julie Yellow
Na maligi timuga ao agi mai le savili malulu. Sa ou vaai i laau ia sa mafuli ma toulu uma lau. Sa pe le eletise i nisi o eria ona o le faaleagaina o laina eletise. O le vaaiga sa i ou luma atu ua pei o se nofoaga faafefe tagata. Na lelea ese uma mea uma. Na pagatia tagata i le fiaaai ma faanaunau atu mo se malutaga.
Sa faatumulia lo’u loto faatasi ai ma le naunautai e auauna atu. Na malaga atu lo’u aiga ma isi tagata o le Ekalesia i se nuu matitiva lea sa faataumaoia ai e se afa fulifao le faitau afe o fale ma aveesea ai le faitau afe o soifua. Sa matou i ai iina e tuuina atu ni oloa laveai i tagata na aafia.
Ina ua matou faatoa taunuu atu, sa ou vaaia le faavauvau i foliga o tagata. Sa ou iloaina i le taimi lena le faamanuiaina o o matou fale i le le faaumatiaina.
Sa timuga lava le taimi ao amata ona matou tufaina atu ia pusa laveai i le faletaalo palapala, leai se taualuga, ae e lei afaina lena mea ia i matou. O pusa laveai—o seti fata palasitika, tipoti, ipuai, sipuni, tui, ipuinu, ma sioti—sa matou faaigoa puupuu i “pusa o le toe foi i le aiga.” A o matou tufaina atu ma lo’u aiga ia pusa laveai i tagata, na latou aumaia ia i matou ni ataata mafanafana ma ni faafetai.
Na siitia au e le agaga faafetai le mafaatauina o tagata, ma sa ou lagonaina le uunaiga a le Agaga. Na faaali mai ia latou ataata, o loo i ai le faamoemoe ma o le a le tuua lava i tatou e le Tama Faalelagi ma Iesu Keriso ma o le a aumaia lava le malamalama i o tatou aso pogisa.
Ou te iloa afai tatou te auauna atu ma alofa le tasi le isi, o le a tatou maua faamanuiaga e faavavau ma maua ai uiga faa-Keriso. O faamanuiaga o le auauna atu e le oo mai i le taimi lava lena, ae o le a oo mai pe afai e faaauau pea ona tatou auauna atu i isi ma le loto faamaoni. Ou te iloa “pe a outou auauna atu i o outou uso-a-tagata, ua nao lo outou auauna atu lava lea i lo outou Atua” (Mosaea 2:17).