O Le Seleselega
“Le Agaga Paia… o le a faaali mai e ia ia te outou mea uma e tatau ona outou faia” (2 Nifae 32:5).
Ao avea ma se tamaitiiti i Iapani, sa ou manao e aoao le gagana Peretania. Peitai sa taugata lesona mo le gagana Peretania, ma e lei lava se tupe e totogi ai.
I se tasi aso sa ou vaaia ai ni alii talavou se toalua o tufaina atu ni fasi pepa mo lesona o le gagana Peretania e leai se totogi. O i laua o ni faifeautalai mai Le Ekalesia a Iesu Keriso o le Au Paia o Aso e Gata Ai. Sa vave ona ou saini mo le la laua vasega faaPeretania.
Sa ou lagonaina se mea faapitoa e uiga i faifeautalai. Sa la fiafia ma mafaufau lelei. Sa ou fesili atu ia te i laua e uiga i la latou ekalesia, ma na ootia lo’u loto. Ou te lei malamalama i ai i lena taimi, ae sa ou lagonaina le Agaga. E lei umi ae ou manao ou te papatiso.
Sa lei mananao ou matua ou te papatiso i se ekalesia e ese mai la laua ekalesia. Ae sa o mai faifeautalai i lo’u fale ma talanoa ma le alofa ma o’u matua. Na pai atu le Agaga i loto o o’u matua, ma sa la faatagaina au ou te papatiso.
I se tasi Aso Sa ia Oketopa, sa tofia au ou te tuuina atu se vaega taua i se polokalama i le lotu. Peitai o Oketopa e tatau ai i tagata uma o lo’u aiga ona galulue malosi e selesele le araisa i le togā araisa a lo’u tama. E aofia ai le galulue i le aso Sapati.
Sa ou tatalo i le Tama Faalelagi, ma sa totoina e le Agaga se manatu i lo’u mafaufau. E mafai ona ou taumafai e faauma le seleselega a o lei oo i le Aso Sa. O le a ou alapo ma galue i taeao uma ao lei amataina le aoga. O aoauli uma o le a ou galue ai pe a tuua le aoga seia oo ina pogisa.
Ae peitai e oo atu i le po o le Aso Toonai ua na o le afa o le seleselega ua maea. Sa ou moe ma le lotovaivai ona ua le mafai ona ausia lau sini. O le taeao o le Aso Sa sa ou alapo lava ou te alu i le fanua. Sa oo mai lo’u tama i lo’u potu ma, faatasi ai ma se ataata agamalu, fesili mai pe aisea ua ou le alu ai i le lotu. Sa tumu lo’u loto i le olioli. Ua mafai ona ou alu i le lotu ma tausia le aso Sapati ia paia!
Ou te faafetai i le iloaina afai tatou te faalogo i le siufofoga o le Alii ma mulimuli ia te Ia, o le a Ia faamanuiaina ma taialaina i tatou.