Fesili & Tali

“E matuai mamao lava le malumalu ma e seasea ou alu i ai. E mafai faapefea ona avea le malumalu ma se vaega tele o lo’u olaga i le taimi nei?”

Afai e te faia le mea sili e auai i le tele o taimi e te mafaia, o le a fiafia le Alii i au taumafaiga. Afai e le mafai ona e auai i le malumalu, e tele mea e mafai ona e faia e avea ai le malumalu o se vaega tele o lou olaga:

• Ola agavaa e ulu atu i le malumalu. O le ola ai i tulaga faatonuina o loo manaomia e ulu atu ai i le maota o le Alii o lona uiga ua tatou saunia i taimi uma ina ia i ai i Lona afioaga.

• Fuafua e maua ou lava faaeega paia ma faaipoipo i le malumalu. O le faatuina o se sini ina ia maua nei sauniga taua o le a faatumauina ai lou taulai atu i le malumalu.

• Laei tauagafau. O le a fesoasoani lenei mea e saunia ai oe ina ia maua ou lava faaeega paia.

• Suesue tusitusiga paia e faatatau i le malumalu (mo se faataitaiga, Esoto 26–29; Levitiko 8; MF&F 97; 109; 110; 124:25–42; Mose 2–5). O le Liahona o Oketopa 2010 na faatatau uma foi i le malumalu.

• Aoao e uiga i ou tuaa (asiasi FamilySearch.org) ma vaai ia faataunuuina ia sauniga o le malumalu mo i latou.

• Fesili atu i isi po o le a le uiga o le malumalu ia i latou ma faasoa atu lau molimau o le malumalu o le maota moni lava o le Alii.

• Fesoasoani e fausia lou aiga e faapei o le malumalu: “Faatu se fale, o se fale lava o le tatalo, o se fale o le anapogi, o se fale o le faatuatua, o se fale o le aoaoga, o se fale o le mamalu, o se fale o le faatulagaga tatau, o se maota o le Atua” (MF&F 109:8).

E mafai ona e filifili ma le agaga tatalo se tasi pe lua o nei manatu e faataitai i le masina lenei. O le a latou fesoasoani ia te oe ia lagona le Agaga ma aoao atili e uiga i le malumalu.

Mafaufau i le Ala o Faamanuia ai e Malumalu Lou Olaga

Afai tatou te le amanaiaina ia malumalu, ua latou mamao mai o tatou loto. E tatau ona tatou mafaufau i faamanuiaga e aumai e le malumalu ia i tatou ma o pe a tatou mafaia. E tusa lava pe afai e na o ni nai asiasiga i le tausaga e mafai ona fai, e mafai ona e faia ia anoa atili e ala i le aumaia o igoa o aiga po o le anapogi. E faapitoa le Agaga i le maota o le Alii—e te manao e faia ia taulia lau asiasiga.

Benjamin S., 18 tausaga, Iuta, ISA

Tumau i le Mama ma le Agavaa

E aumaia e le malumalu le fiafia i lo’u olaga i aso nei. A o ou alu i le malumalu, ou te aoao atili e uiga i lo tatou Tama Faalelagi ma Iesu Keriso. O a’u galuega i le malumalu e faamalolosia ma faaleleia ai lo’u ola faaleagaga. Ou te maua ai se malamalama sili atu e uiga i lo tatou faamoemoega i le olaga. O le malumalu e aumaia ai ia te au le lototele i le taulimaina o tofotofoga ma faaosoosoga, ma tuuina mai ia te au le malosi e manumalo ai i ou vaivaiga. O le malumalu ua na o le pau lea o le nofoaga e mafai ona faamauina ai faatasi i tatou o ni aiga e faavavau, o lea o le a ou saunia ai e ulu atu i le malumalu, ma tumau i le mama ma le agavaa.

Mickaella B., 16 tausaga, Filipaina

Tausia le Agaga o le Malumalu

E fitu itula ou te alu ai i le Malumalu o Frankfurt Siamani, ma o lea e na o le faalua i le tausaga e mafai ai ona matou o ma lou aiga mo le tasi le vaiaso i le taimi. Ae a ou maua se avanoa faaopoopo e alu ai, ou te faaaogaina aua ou te iloa o le a avea ma se faamanuiaga maoae. Ou te faatumauina le agaga o le malumalu e ala i le faitauina o au tusitusiga paia i aso uma. Ou te faaaogaina la’u pepa faataga o le malumalu e avea ma se faailoga tusi. O taimi uma lava ou te vaai ai i la’u pepa faataga, ou te fesili ia te au lava ina ia mautinoa ou te agavaa e auai i le malumalu. O lenei mea e faamalosia ai ma fesoasoani ia te au ia lagonaina le Agaga. E ui lava e mamao ese le malumalu mai le aiga, e mafai lava ona ou taumafai e ola e pei o loo mafai ona ou ulu atu i ai i aso uma.

Lise G., 17 tausaga, Farani

Saunia Oe Lava

O le auai atu i le malumalu e faalua pe faatolu i le tausaga e lelei, pe afai lena o loo faia ma le loto faamaoni ma le mama. E mafai ona tatou fautuaina taitai o le Ekalesia e faatulaga ni malaga i le malumalu. Afai e le mafai ona tatou auai atu, sei o tatou taumafai e saunia i tatou lava aua pe a oo mai le taimi, e mafai ona tatou o atu ma le olioli tele. E pisi o tatou olaga, ae ua folafola mai e perofeta e faapea, afai tatou te o i le maota o le Alii, o le a faamanuiaina i tatou.

Krista L., 16 tausaga, Parakuei

Faitau i Lau Api o Talaaga e uiga i Asiasiga i le taimi ua Tuanai i le Malumalu

Tusi i lau api o talaaga e uiga i lou taimi i le malumalu ona faitau lea o nei itulau pe a e i le fale. O le a fesoasoani lenei mea e te manatua ai lagona na e oo i ai. E matua taua lava le tusiina o faaaliga faaletagata lava ia. Ao ou auai i le malumalu, sa ou taumafai e faalogo ma le totoa i le Agaga aua o loo Ia saunia e le aunoa e fesoasoani mai ia i tatou e aoao. O taimi uma lava ou te faalogo ai, ou te iloa ai upumoni fou e uiga ia Iesu Keriso ma le Tama Faalelagi faapea foi ma le galuega o le malumalu. Pe a ou taulai atu i mea faaleagaga ao i ai i le malumalu, ou te faatauaina atili ai ma e avea le malumalu ma se mea e matua taua i lo’u olaga.

Ol’ga Z., 18 tausaga, Belarus

Faapipii i luga se Ata o le Malumalu

Taumafai e faavaa se ata o le malumalu e sili ona e fiafia i ai ma ni upu “O le a ou alu i ai i totonu i se aso!” Tuu i totonu o lou potu ina ia mafai ona e vaai i ai i aso uma. Fai se lisi o mea o le a e faia ma mea e te lē faia ina ia mafai ai ona e agavaa e ulu atu i le malumalu. Tuu le lisi i autafa o le ata.

Christian J., 13 tausaga, Idaho, ISA

Faia o Talafaasolopito o Aiga

Ou te manatu o le faia o galuega o talafaasolopito o aiga atonu e sili atu ai ona mafai ona e i ai i le malumalu e aunoa ma le i ai i le malumalu. E mafai ona e tuuina atu igoa na e mauaina i tagata o lou aiga po o le uarota e ave i le malumalu. Afai e te faia talafaasolopito o aiga ma faatumauina lou fale o se nofoaga paia, o le a e latalata i le malumalu e ui e faitau maila le mamao o e i ai.

Katelyn B., 13 tausaga, Iuta, ISA

Mo nisi faamatalaga e uiga i lenei autu, tagai “Faamanuiaga o le Malumalu” saunia e Elder Robert D. Hales i le lomiga lenei i le itulau e 52.

O tali ua faamoemoe e mo se fesoasoani ma ni manatu, ae e le o se faalauiloaga aloaia o aoaoga faavae o le Ekalesia.

Ia Agavaa mo le Malumalu

“Ia tatou agavaa e le aunoa e umiaina se pepa faataga o le malumalu. Ia avea lena mea ma se tasi o o tatou faamoemoega i le olaga, ina ia faifai pea ma le aunoa ona nonofo i luma o lo tatou taitai perisitua ma tautino atu lo tatou agavaa ina ia maua lenei faamaoniga mautu ua faamaonia e le Alii le ituaiga o olaga o tatou soifua ai ma ua iloa ai tatou te agavaa e ulu atu i Lona maota paia.

“… Afai tatou te agavaa i taimi uma mo lena pepa faataga ma e mafai ona tali mo’i mai i fesili e agavaa ai, ua tatou agai atu i le ala o le meaalofa silisili ua tuuina mai e le Alii ia i tatou. Ia faamanuiaina i tatou e le Alii ina ia tatou foia ma le mausali ia agavaa i taimi uma mo le malumalu.”

Elder L. Tom Perry o le Korama a Aposetolo e Toasefululua, “My First Temple Recommend”, New Era, Ape. 2013, 4.

Fesili o le a Sosoo Mai

“Sa maliu se uo pele talu ai nei. E faapefea ona ou taulimaina le faanoanoa?”

Auina mai lau tali ma se atapue sili ona manino, pe a manaomia, a o lei oo i le aso 15 Mati, 2014, i le liahona.lds.org, e ala i le imeli i le [e-mail], po o le meli (tagai i le tuatusi i le itulau e 3).

E ono faapupuuina tali mo le uumi po o le manino.

O le faamatalaga ma le faatagaga o loo i lalo e tatau ona aofia mai i lau i-meli po o le tusi: (1) igoa atoa, (2) aso fanau, (3) uarota po o le paranesi, (4) siteki po o le itu, (5) lau faatagaga tusitusia, ma, afai e itiiti ifo i le 18 ou tausaga, o le faatagaga tusitusia a ou matua (e talia foi le i-meli) e lolomiina ai lau tali ma lou ata.