O La’u Savali mai le Tama Faalelagi

Terumi Tuckett (faatasi ai ma Jill Campbell), Iapani

I le avea ai ma se tasi faatoa faaipoipo ma se tagata fou o le Ekalesia, sa ma siitia atu i Egelani ma lou toalua. E ui lava sa ou aoaoina sina vaega o le gagana Peretania i le aoga, o le mamafa o lau tautala faaIapani na faigata ai ona malamalama i la’u faaPeretania, ma o le faaleoina faaPeretania na faigata mo au ona iloaina.

Sa avea i maua ma lou toalua o ni tagata o le Ekalesia, peitai ma te lei liua atoatoa ina ua ma faaipoipo. O taimi uma lava ma te o ai i le fale pe a uma le sauniga faamanatuga nai lo nonofo ai i le lotu mo isi sauniga. Ma te lei mananao e maua ni valaauga o le Ekalesia.

I se tasi aso, ina ia fesoasoani ia te au ia auai atili i gaoioiga o le Ekalesia, sa valaau mai le taitai o le Aualofa ma fesili mai pe ou te fia manao e faasoa atu nisi o mea e uiga ia te au i leisi fonotaga faaopoopo o le Aualofa e sosoo ai. Sa ou ioe e auai, ae ona o le le lava o lau gagana Peretania, ou te lei malamalama ai e tatau ona ou aumaia ni mea e faaali ai.

Ina ua ou taunuu atu i le fonotaga, sa vave ona ou iloaina mea ia sa faamoemoe ia te au e fai. E tolu laulau sa setiina i ie ufilaulau ma fugalaau i luga. Sa i ai se faailoga na faitauina, “Faamasani i Uso.” O se tasi o laulau na faailogaina “Sister Tuckett.” Ae sa leai se mea na ou aumaia e tuu i luga o la’u laulau. Sa ou taumafai e nana o’u loimata na amata ona i ai i o’u mata.

Ua leva lava ona ou faanoanoa i soo se taimi lava ou te auai atu ai i le sauniga faamanatuga aua ou te le’i malamalama atoatoa i se mea na fofogaina. Sa masani ona ou faapea, “Aisea ua ou i ai iinei?” O lea ina ua ou taunuu atu i lena fonotaga a le Aualofa ma iloa la’u mea sese, sa ou lagona faapea e le tatau ona ou toe lotu. Sa ou moomoo maimau pe ana mafai ona ou mou ese atu, ae e tatau ona ou ta’u atu i le taitai o le Aualofa ou te le o saunia.

“Ou te faatoese atu,” sa ou fai atu ai. “Ou te lei malamalama, ma ou te le o maua se mea e tuu i luga o la’u laulau.”

Sa ia tilotilo mai ia te au ma foliga agalelei ma fai mai, “E le afaina—ou te fiafia lava ua e i ai iinei.” Ona ia opo mai lea ia te au.

Sa ou lagonaina le mafanafana, ma ua tau mai e le Agaga ia te au o le mea sa ia fai mai ai o se savali mai le Tama Faalelagi—na Ia alofa ia te au, ma sa fiafia sa ou i ai iina. Ou te lei malamalama lelei i le faaPeretania, ae o le Agaga na mafai ai ona ou malamalama i lana savali.

Ona o lenei lagona, na vave ona suia lau faaiuga. Sa ou tauina ia te au lava, “Afai e matuai alofa lava le Tama Faalelagi ia te au ma e finagalo ou te sau i le lotu, ou le a ou faia, e tusa lava po o le a le faigata.”

Talu mai lena lava taimi, ma te auai ma lo’u toalua i sauniga uma a le Ekalesia. Na ou naunau foi e aoao le gagana Peretania. Sa oo ina ou malamalama atili i le gagana Peretania ma aoao e tautala ai.

Ou te faafetai mo le uso lea na tuuina mai le savali mai le Tama Faalelagi i lena taimi taua i lo’u olaga. I le taimi nei, 15 tausaga mulimuli ane, o loo ou galue i le au peresitene o le Aualofa a le itu i se itu e tautatala Faaperetania i Iapani ma ua maua ai aoaoga mai le Ekalesia ina ia avea ma se tagata faamatalaupu.