O Loo I Ai i le Tama Faalelagi se Fuafuaga mo Lana Fanau

Aoao atili e uiga i le autu o le Peraimeri o le masina lenei!

Na mafai ona sosogiina e Oliva ia keke a Tinamatua o loo taoina i totonu o le oveni, ma sa i ai le lagona migao i totonu o le fale o Tinamatua ma Tamamatua. Na tulimatai atu Oliva i lenei afiafi faaleaiga faapitoa i le aso atoa.

“O la tatou lesona e faatatau i le ata o le fiafia lea na faia e le Tama Faalelagi mo i tatou uma,” o le tala lea a Tamamatua. “O le po nei o le a sui le umukuka i le lagi, lea sa tatou nonofo faatasi ai ma le Tama Faalelagi ae tatou te lei o mai ina ia ola i le lalolagi,” o lana tala lea.

“Sa ou i ai iina, Tamamatua?” o le fesili lea a Archie. Sa tilotilo solo Oliva i totonu o le potu ia Tinamatua ma Tamamatua, Tina ma Tama, ma ona uso laiti, o Archie ma Etana.

“Ioe,” o le tala lea a Tamamatua “Sa tatou i ai uma iina. Ma ina ua ta’u mai e le Tama Faalelagi ia i tatou Lana fuafuaga e foafoaina se lalolagi ma auina mai se Faaola mo i tatou, sa tatou matua fiafia lava na tatou alalaga mo le fiafia.”

Na talie Archie ma Etana ma feosofi i luga ma lalo.

“O ai le tagata muamua i lo tatou aiga na tuua le lagi, ma sau i le lalolagi?” O le fesili lea a Tamamatua.

“O oe,” o le tala lea a Oliva.

Sa tuua e tamamatua le umukuka. Na sosoo ai ma Tinamatua. Ona taitasi lea ma auai atu tagata taitasi o le aiga o Oliva i le potumoe.

“O lenei potu o le a sui i le lalolagi,” o le tala lea a Tinamatua. “O a nisi o mea e mafai ona tatou faia iinei e fesoasoani ia i tatou e toe foi atu i le Tama Faalelagi?” na ia fesili ai.

“Ia papatisoina,” o le tala lea a Oliva.

“Alu i le malumalu,” o le tala lea a Tina.

“Filifili le mea sa’o,” o le tala lea a Archie.

Sa luelue le ulu o Tinamatua ma ataata. Ona ia fai mai lea ua oo i le taimi e tuua ai le lalolagi ma toe foi atu i le Tama Faalelagi.

“O le a ou alu muamua,” o le tala lea a Tamamatua.

“Oi, Tamamatua, aua e te alu!” o le tala lea a Etana.

“Aua e te popole,” na fai mai ai Tamamatua. “O le tuua ai o le lalolagi o se vaega o le fuafuaga a le Tama Faalelagi o le fiafia. E le toe umi ae tatou toe faatasia.”

Na auauai taitoatasi ma toe foi atu tagata uma i le umukuka. “Ua tatou toe foi uma i le lagi!” O le tala lea a tama ao tamomoe atu Archie ma Etana i ona lima.

Na lagona e Oliva le fiafia e vaai i lona aiga e peiseai sa ia aluese mai ia i latou mo se taimi umi lava. Sa ia tamoe atu ma opo mai ona uso ma Tina ma Tama. Ua ia malamalama nei i le mafuaaga na ta’ua ai e Tamamatua o le fuafuaga a le Tama Faalelagi o le fiafia.

Ata na tusia e Brad Teare