O La Tatou Malamalama i le Pogisa

Susan Wyman, Georgia, ISA

Na faatoa uma lava ona aafia lo matou aiga i se afi na faataumaoi ai le fale, ma sa nonofo uma lo matou aiga e toavalu i se fale feaveai le mautu e tolu potumoe i luma o lo matou fanua. Na feagai lo matou aiga ma luitau ma feeseeseaiga.

E lei malosi lou toalua i le Lotu i lena taimi. Na faia e le ma fanau tama talavou e toalua ni filifiliga e ono taitaiina atu ai i le faanoanoa. I lena lava taimi, sa ou auauna atu o se peresitene o Tamaitai Talavou i la matou uarota, ma o le tele o tamaitai talavou sa tauivi ma ni faaosoosoga matuia. O nisi o o latou matua na feagai foi ma tauiviga ma na le fesoasoani ia latou fanau teine i lenei taimi faigata.

Sa ou iloaina na manaomia e nei tamaitai talavou lau fesoasoani ia latou maina faaleagaga. Sa ou iloa le manaomia o au e au fanau tama e toaono. Sa ou iloa na faalagolago lou toalua lelei i lou malosiaga. Ae peitai, na foliga mai ua leai se isi mea ae ua na o le pogisa o loo siomia ai au, ma sa ou lagona le gaogao, vaivai, ma le le mafai ona taitai atu ai nei fanau pele i le saogalemu.

I le tuneva o se tasi po ao ou luelueina le ma tama pepe i le filemu o lo matou fale le tumau, na liliu atu ou mafaufauga ia i latou o e manaomia au ina ia malolosi. Sa ou lagonaina le pouliuli maoae o siomiaina i latou. I lo’u mafatia sa ou tatalo ai ma lo’u loto atoa i le Tama Faalelagi e faaali mai ia te au le auala e fesoasoani ai ia i latou e ui lava i ou faafitauli. Sa Ia tali vave mai ma faaali mai ia te au le auala.

Sa foliga mai sa ou vaai ia te au lava i totonu o la matou fale faafiafia tele i la matou uarota, lea e leai ni faamalama. Na tuneva le po, ma sa leai lava se emoemo mai o se moli po o se malamalama. Ona ou tutuina lea o se tamai moligao o le aso fanau. Sa foliga mai e matua lē taua, ae o le malosi o lena tamai malamalama na lava lea e suitulaga i le pouliuli.

O la’u tali lena! O le tele o le pogisa o loo siomia ai i tatou i le lalolagi e le afaina lea. O le malamalama e faavavau ma e matuai sili atu ona mamana nai lo le pogisa (tagai i le 2 Korinito 4:6; Mosaea 16:9; MF&F 14:9). Afai tatou te tumau i le agavaa mo le mafutaga faifai pea a le Agaga Paia, o le a atagia mai i o tatou agaga le lava o le malamalama e suitulaga ai i soo se aofaiga o le pogisa, ma ta’ina atu isi i lena malamalama i totonu o i tatou.

Na pau lenei o le mea na manaomia ia ou iloa. O lenei malamalamaaga faigofie na tauaveina ai au i le aluga o le 25 tausaga ua mavae faatasi ai ma le malamalama o le i ai o le fesoasoaniga ma le taitaiga a le Alii, e mafai ona tatou faia— ma avea ai— ma mea uma ua Ia manaomia i tatou e fai ma ia i ai i lenei lalolagi o le pogisa.