Savali a Faiaoga Asiasi
O Le Misiona Paia a Iesu Keriso: Leoleo Mamoe Lelei
Ia suesue ma le agaga tatalo i lenei mataupu ma saili ia iloa le mea e faasoa atu. E faapefea e le malamalama i le soifuaga ma le misiona a le Faaola ona faateleina ai lou faatuatua ia te Ia ma faamanuia ai isi e te leoleoina e ala i faiaoga asiasi? Mo nisi faamatalaga, alu i le reliefsociety.lds.org.
Faatuatua, Aiga, Toomaga
O Iesu Keriso, le leoleo Mamoe Lelei, na aoao mai:
“O ai ea so outou e ana mamoe e selau, afai e leiloa le tasi, e le tuua e ia le ivagafulu ma le iva i le vao, ae alu ma saili i le na leiloa, seia maua? …
“Ou te fai atu ia te outou, e… olioli i le lagi i le tagata agasala e toatasi e salamo” (Luka 15:4, 7).
Ao amata ona tatou malamalama o Iesu Keriso o le Leoleo Mamoe Lelei, o le a faateleina lo tatou naunau e mulimuli i Ana faataitaiga ma auauna atu ia i latou e manaomia le fesoasoani. Na fetalai mai Iesu: “O au nei o le leoleo mamoe lelei, ua ou iloa au mamoe, ua iloa foi au e au mamoe. … Ou te tuuina atu foi lou ola e sui ai mamoe” (Ioane 10:14–15). Ona o le Togiola a Keriso, e leai lava se tasi o i tatou o le a matua leiloa ma le iloa ai lona ala i le aiga (tagai i le Luka 15).
Na saunoa mai Peresitene Thomas S. Monson, “O la tatou tiute le vaaia ma fafaga le lafu.… Ina taitasi ia i tatou ma la’a i luga e auauna atu.”1
Mai Tusitusiga Paia
Mai lo Tatou Talafaasolopito
Na fai mai Elizabeth Ann Whitney, o le sa auai i le uluai fonotaga a le Aualofa, e uiga i lona liua i le 1830: “O le taimi lava na ou faalogo ai i le Talalelei a o folafolaina e Faifeau, sa ou iloaina o le leo lava lea o le Leoleo Mamoe Lelei.”2 Na mulimuli Elizabeth i le leo o le Leoleo Mamoe Lelei ma sa papatisoina ma faamauina.
Tatou te mafai foi ona faalogo i le leo o le Leoleo Mamoe Lelei ma faasoa atu Ana aoaoga i isi. Na saunoa Peresitene Monson, “O i tatou o aao o le Alii i luga o le fogaeleele, ua i ai le tiutetauave e auauna atu ai ma siitia Ana fanau.”3
E pei lava ona sailia e se leoleo mamoe le mamoe na leiloa, e mafai e matua ona saili i se tamaitiiti ua se. Na saunoa mai Peresitene James E. Faust (1920–2007), Fesoasoani Lua i le Au Peresitene Sili: “I matua loto mafatia, o e amiotonu, maelega, ma loto tatalo i le aoaoina o a latou fanau lē usitai, matou te fai atu ia te outou, o loo leoleo i latou e le Leoleo Mamoe Lelei. Ua silafia e le Atua ma malamalama foi o Ia i lo outou faanoanoaga loloto. O loo i ai le faamoemoe.”4