Tautala, Faalogo, & Alofa
Pe o lelei lau fesootaiga ma lou toalua? O le malamalama i nei ituaiga o talanoaga e tolu e mafai ona fesoasoani e faamalosia ai la oulua mafutaga.
I le avea ai ma se faufautua mo faaipoipoga ma aiga, e masani ona ou asiasi i ulugalii e fesoasoani ia i latou e toe faaleleia pe faamalolosia a latou mafutaga. I se tasi taimi, sa ou feiloai ai i se tamaitai o le sa na o ni nai masina talu ona la faaipoipo ma lana tane, ma sa ia fai mai ua i ai ni la faafitauli ogaoga tau fesootaiga. Ina ua uma ona talanoa atu i lana tane, sa ou matauina ai o ia o se tagata e i ai le tomai i mea tau fesootaiga—ae le faapena i lona faletua.
Sa ou aoaoina i le tele o tausaga o fesootaiga lelei e aafia uma ai le loto ma le mafaufau. Afai e mafai ona sili atu a tatou fesootaiga—o lona uiga o le sili atu ona ma’oti ma manino—ona mafai lea ona tatou fausia ni sootaga loloto atu o le faalelagona, foiaina o feeseeseaiga, ma faamalolosia ia noataga i o tatou sootaga faale-faaipoipoga. O nisi nei o auala e mafai ai e i tatou taitoatasi ona faaleleia atili le tulaga lelei o fesootaiga i a tatou mafutaga.
Auai i ni Talanoaga Anoa
Na tusia e Dr. Douglas E. Brinley, o se tagata o le Ekalesia ua i ai se tomai faapitoa i mea tau faaipoipoga ma le tulaga faamatua, e tusa e tolu ni tulaga o fesootaiga i mafutaga: papa’u, faaletagata lava ia, ma le faamaoniaina. Ina ia mafai ona mamanuina se sootaga loloto i le va o le tane ma le ava, e tatau ona i ai le paleni i le va o mea uma e tolu.1
Papa’u
O ni fesootaiga o loo pau i le tulaga papa’u e aoga ma e le tauaimisa, ma e aofia ai le tulagamaualalo o le tulaga lamatia. O ulugalii uma e faaalu sina taimi i lenei tulaga ao latou faamaopoopoina le faasologa o taimi, talanoaina o le tau, po o le faaalia o se manatu i le tau o le penisini. E ui lava e manaomia lenei ituaiga o fesootaiga, e le mafai e tagata taitoatasi ona matua fesootai ma fusia faatasi pe afai o le tele o fesootaiga o loo tumau pea iinei.
E mafai e fesootaiga papa’u ona suitulaga i ni talanoaga loloto ma anoa. Afai e savalivali lemu ia ulugalii faataamilo i mataupu sili ona loloto lea e tatau ona talanoaina, o le a latou le iloaina lava ona foia o feeseeseaiga pe fesootai le tasi i le isi. E fusia faatasi ulugalii a o la talanoaina mea e taua—e le o mea e le taua. Ua ou vaaia le tele o ulugalii i lau galuega o e taumafai e faasaoina a latou mafutaga e ala i le tausia o a latou fesootaiga i le tulaga e papa’u. E ala i le aloese mai “mea silisili” (Mataio 23:23), ua la faaumatia moni lava la laua faaipoipoga.
Faaletagata lava ia
I le taimi o le fesootaiga faaletagata lava ia, e te faasoa atu ai mea e te fiafia i ai, miti, tuinanau, talitonuga, ma sini. Ua mafai foi ona faigofie ona e faasoaina atu lou fefe ma lē atoatoa. O le fesootaiina atu o nei faafitauli i se auala faaKeriso o se tasi lea o auala e fesootai ai ma faamalosia ai e ulugalii le mafutaga. O Elder Marvin J. Ashton (1915–1994) o le Korama a Aposetolo e Toasefululua, na aoao mai, “O fesootaiga ua sili atu nai lo le faasoaina atu o upu. O le faasoaina atu ma le atamai o uiga, lagona, ma popolega. O le faasoaina atu atoa o le tagata lava ia.”2
Atonu sa e auai i lenei tulaga o fesootaiga a o e tafao faamasani. O le tulaga lea e faamemelo ai ma alofa le alii ma le tamaitai i le tasi ma le isi. A o faaauau ona e faasoa mai mea e taua, o le a lua lagona ma lou toalua le talisapaia laugatasia, manaomia, faatauaina, ma le moomia. A o e aoao e faamaonia mea na faasoa mai e lou toalua—o le faaalia faapea o mea sa ia fai mai ai e taua ia te oe—o le a e alualu ai i luma i le isi vaega o fesootaiga.
Faamaoniaina
O le tane ma le ava ua i ai se tiutetauave paia e faafailele ma tuuina atu le faamafanafana i le tasi ma le isi.3 Na tusia e ni tagata tomai faapitoa i faaipoipoga o Sandra Blakeslee ma Judith S. Wallerstein faapea: “O se faaipoipoga e le o maua ai le lagolagosua ma le faamafanafana faamalolo o le a mate i le galala faalelagona.”4 O fesootaiga e faamaonia e faagaeetia, faamalolo, faafailele, ma faamalo. I lenei tulaga o fesootaiga, tatou te faaalia ai le viiga ma upu faamalo ia i latou tatou te alolofa i ai. E toeitiiti lava o mafutaga uma o le a tupuolaola pe afai e i ai se inumaga maloloina o le faamaoniga.
O le faamaoniga e amata i le taulai atu i mea o loo fai mai ai lou toalua ma aofia ai le faaalia o manatu ma mafaufauga e faagaeetia ai ma faamaloloina ai. Vaavaai mo le lelei i lou toalua ma tau atu ia te ia. Afai sa faigata le aso o lou toalua, e mafai ona faamaonia ia te ia e ala i le faalogo ma le ofoina atu o le faamafanafanaga. E mafai ona e faapea atu, “Ou te faamalie atu ona o le faigata o lou aso; faamatala maia nisi mea e uiga i le mea na tupu” po o le “O le a se mea e mafai ona ou faia e faaleleia ai le vaega o totoe o lou aso?” Atonu e mafai ona e faapea atu, “Ua mafai ona ou iloa le mafuaaga na matuai faigata ai lou aso, ae ou te talitonu tele i lou malamalama ma talitonuga tau galuega. Ou te iloa o le a mafai ona e foia lena faafitauli.” O faamatalaga e pei o nei faamatalaga e faaalia ai o loo e malamalama i le tulaga popole o lou toalua ma alofa ia te ia. O le faailoaina o lagona, popolega, manatu, po o ni atugaluga a lou toalua, o loo e fesootai ai le faamaoniga ma faaali atu le talisapaia, alofa, ma le faaaloalo.5
Faataitai le Tomai o le Faalogo
O le tomai aupito sili o le fesootaiga o le avea lea ma se tagata e faalogologo lelei. O se tasi o faatinoga aupito sili ona agaalofa i le faaipoipoga, o le taulai atu moni lea i lou toalua ma faalogo atu ia te ia—matuai faalogo atu—e tusa lava po o le a se mea tatou te mananao e tau atu. O le faalogo e pei lava o le alofagia; o le mea moni, o le faalogo atu o se tasi o ituaiga tulaga aupito maualuga o le faaaloalo ma le faamaoniga. O le faalogo, tatou te fai atu ai i o tatou taitoalua, “E taua oe ia te au, ou te alofa ia te oe, ma o mea ua e tau mai e taua.”
I le faaipoipoga o le sini o le faalogo e le o le mauaina o le faamatalaga, ae ia maua le malamalama. O le malamalama moni i lou toalua o le vaai lea i se faafitauli i le ala o vaai i ai lou toalua. Na aoao mai e Elder Russell M. Nelson o le Korama a Aposetolo e Toasefululua o tane ma ava e tatau ona “aoao e faalogo, ma faalogo ina ia aoao mai le tasi ma le isi.”6 O le faalogo lelei e fesoasoani ia i tatou e tuuese lo tatou lava loto ma le faamaualuga ma fesootai atu le agaga i le agaga ma o tatou taitoalua.
O Elder Joe J. Christensen, na avea muamua ma Fitugafulu, na fautua mai: “Fai se taimi e faalogo ai i lou toalua; e tusa lava pe faatulaga soo. Asiasi i le tasi ma le isi ma iloilo pe o faapefea lou tulaga o se soa faaipoipo.”7 O le faataatia ese o se taimi e talanoa ai i se nofoaga e leai se mea faalavefau o le a fesoasoani e foia ai faafitauli. Ia mautinoa e talanoa i itu lelei, ia tausisia se uiga faa-Keriso, ma aloese mai le faalavelave i lou toalua pe a ia talanoa mai ia te oe.
Faailoilo e le Faaupua
O le isi itu o fesootaiga e le amanaiaina i nisi taimi o le fesootaiga le magagana. O mea e te tau atua ma le auala e tauina atu ai e taua, ae e faapena lau gagana faaletino. E te tagai sao atu i mata o lou toalua pe a talanoa mai ia te oe? Pe faasesepa ou mata pe a tau atu e ia ia te oe sa faigata lona taimi i le galuega? Pe o faaalia i ou mata le fiafia ma le faamaoni, pe o faaalia ai le le fiafia ma le atuatuvale? Pe o e faaleo atu lou alofa ma le agaalofa faaletino? O nisi taimi o se opo po o se ataata e mafai ona sili atu ona faailoa atu ai lou alofa nai lo upu. E tusa lava po o le a le ituaiga o talanoaga—pe faatatau i talafou aupito lata mai po o faanaunauga o lou olaga —o gagana lelei o le tino e mafai ona faamalosia ai le faamaoniga ma faamalosia ai le lua mafutaga.
Mulimuli i le Fesootaiga a le Faaola
A o e auai faatasi ma lou toalua i ni talanoaga anoa, taialaina au amioga ma upu e ala i le mulimuli i le faataitaiga a Iesu Keriso. O Lana fesootaiga ma isi e faasusuluina atu ai le alofa, agalelei, ma le popole. Na Ia saunoa lemu ma na alofa mama. Sa Ia faaalia le agaalofa ma tuuina mai le faamagaloga. Sa Ia faalogologo ma le totoa ma faaalia le alofa mama. E faapena foi, afai tatou te mananao i a tatou sootaga e faaleleia atili, e tatau ona tatou aoao e tautala atu i se auala lelei e faamalamalama ai ma fausia ai i latou o siomia i tatou.
A ou feiloai atu i ulugalii, e masani ona ou fai i ai e iloilo a latou mamanu o fesootaiga ma ia faaleleia atili. A o latou faaaogaina ia mataupu faavae o talanoaga anoa i a latou mafutaga, ua ou vaaia suiga agai atu i se faaipoipoga e sili atu le maloloina lelei. O le malamalama i lou toalua, fatuina o se siosiomaga lea e faafailele ai fesootaiga ma uiga faaalia mama, ma o le faaalia o le alofa ma le faamemelo o ki ia i se mafutaga malosi atu ma se faaipoipoga fiafia.
E alala le tusitala i Iuta, ISA.