Mo Le Malosi o le Autalavou
Auaunaga Faamaoni ma le Alofa
O le auaunaga faa-Keriso e valaaulia ai le Agaga Paia ma aumaia ai le folafolaga o le filemu.
Ata na pue e Reeve A. Nield
Sa ou molimauina le olioli o le auaunaga mama lē manatu faapito o loo faaalia i ata nei o se tamaitiiti e igoa ia Elia o tuuina atu lona ofutino i se uo fou na ia feiloai i ai i se nuu maotua o Aferika. Na iloa e Elia se manaoga faafuasei, ma sa ia tali atu i ai. E pei o Elia talavou, ua tatou maua le avanoa e tuuina atu auaunaga i isi i le tele o auala. Atonu e le manaomia le tatou tuuina atu i isi o ofutino o tatou oofu ai, ae afai o tatou faalogo i uunaiga a le Agaga Paia, o le a tatou iloa po o ai e auauna atu i ai ma le auala e fesoasoani ai ia i latou o e manaomia le fesoasoani.
“O le auauna atu e uiga tutusa ma le tausia o poloaiga a le Atua,” ma e suitulaga mo lo tatou alofa mo le Alii.1 Na aoao mai le Faaola, “Afai e te alofa mai ia te au, e te auauna mai ia te au ma tausi i aʼu poloaiga uma” (MF&F 42:29); “ia e alofa atu i le Alii lou Atua ma lou loto atoa, ma lou manatu atoa, mafaufau, ma le malosi; ma ia e auauna atu ia te ia i le suafa o Iesu Keriso” (MF&F 59:5). I le papatisoga tatou te osi feagaiga o le a tatou auauna atu i le Atua ma tausi Ana poloaiga (tagai i le Mosaea 18:10). I le avea ai ma soo o Keriso, tatou te taumafai lava i taimi uma e auai i Lana galuega, ma e aofia ai le auauna atu.
Auauna Atu: O Le Talalelei i Lona Faatinoga
O le auauna atu o le talalelei lea a Iesu Keriso i lona faatinoga, ma ua faamaonia i se tala ou te fiafia i ai e uiga ia Polika Iaga. I le iloa ai e faitau selau paionia o taavaletosolima sa pa’ulia i laufanua valevalenoa i tulaga ua le mafai ona tatalia, sa ia aoao atu i le mana i lenei lauga faigofie i le konafesi aoao ia Oketopa 1856: “O le a ou tuu atu i lenei nuu le mataupu autu ma le anotusi mo Toeaina o e e mafai ona fetalai mai, … o le mea lenei, … o le toatele o tatou uso ma tuafafine o loo i luga o laufanua valevalenoa ma taavaletosolima, ma atonu e toatele ua 700 maila le mamao mai lenei nofoaga, ma e tatau ona aumaia i latou iinei, e tatau ona tatou auina atu se fesoasoani ia i latou. O le anotusi e faapea, ‘ia aumai i latou iinei.’ …
“O la’u mataupu faalelotu lena; o le faatonuga lena a le Agaga Paia ua ou maua, o le laveaiina o tagata. …
“Ou te valaau atu i Epikopo i le aso nei, o le a ou le faatali seia aulia taeao, pe seia aulia le isi aso, mo vaega e 60 o manu malolosi ma le 12 po o le 15 o taavale toso. … Ou te le manao e auina atu ni povi, ou te manao i ni solofanua lelei ma ni miula. Ua latou i ai i lenei Teritori, ma e tatau ona tatou mauaina i latou; faapea foi ma le 12 tone o falaoamata ma le 40 o tagata avetaavale tosolima lelei, e ese mai ia i latou e aveina na solofanua. …
“Ou te ta’u atu ia te outou uma o o outou faatuatua, talitonuga faalelotu, ma galuega faalelotu, e le faaolaina ai se tagata e toatasi o outou i le Malo Selesitila o lo tatou Atua, sei vagana ua tatou faataunuuina na mataupu faavae e pei ona ou aoao atu nei ia te outou. O atu ma aumai na tagata o i ai nei i luga o fanua valevalenoa.”2
“Laveai le nuu”—o le poloaiga lena. Pe a tatou auauna atu i isi, ua tatou auai i le galuega o le faaolataga. Faapei ona aoao mai le Tupu o Peniamina, “Pe a outou auauna atu i o outou uso-a-tagata, ua nao lo outou auauna atu lava lea i lo outou Atua” (Mosaea 2:17).
Avanoa i Mea Uma
Ata na saunia e Sidney Hatada, Christina Smith ma Whitney Tutt; tua atu na saunia e iStockphoto/Thinkstock
E le tau manaomia ona tatou vaavaai mamao tele ina ia maua ai ni avanoa e auauna atu ai. Na aoao mai lo tatou perofeta soifua, o Peresitene Thomas S. Monson, “Ua siomia i tatou e i latou e manaomia lo tatou gauai atu, la tatou faamalosiau atu, o la tatou lagolago, la tatou faamafanafana, ma lo tatou agalelei—pe o nisi o le aiga, uo, paaga, po o ni tagata ese. O i tatou o lima o le Alii i luga o le fogaeleele, faatasi ma le poloaiga e auauna atu ma sii ae Ana fanau. O loo faalagolago mai o Ia ia i tatou taitoatasi.”3
E manaomia e lo Tatou Tama Faalelagi i tatou e auauna atu mo le toomaga o isi faaleagaga ma faaletino (tagai i le Mosaea 4:26). “O le auaunaga aupito sili e mafai ona tatou tuuina atu i isi i lenei olaga… o le aumaia lea o i latou ia Keriso e ala i le faatuatua ma le salamo.”4 Tatou te faia se faataitaiga o le ola ai i tulaga faatonuina o le talalelei. Tatou te faasoa atu le savali o le talalelei a Iesu Keriso. Tatou te faia talafaasolopito o aiga ma ave igoa o aiga i le malumalu mo o tatou tuaa. O le tele o taimi, o ni faatinoga iti ma le agaalofa o auaunaga e pei o se ataata faigofie, o se faatalofa agalelei, se opo mafanafana, po o se tusi o le loto faafetai ua na o le pau ia o mea o loo manaomia e siitia ai le loto ma faafiafia le agaga. I ni isi tulaga, o se osigataulaga tele o le taimi ma le malosi e ono manaomia ai.
Ae i soo se tulaga lava, o le auaunaga faamaoni, alofa, ma faaKeriso e valaaulia ai le mafutaga a le Agaga Paia ma aumaia ia i tatou taitoatasi le folafolaga o le “filemu lea i le lalolagi lenei ma le ola e faavavau i le lalolagi a sau” (MF&F 59:23).