IA TAFAO FAAMASANI po o le LE TAFAO FAAMASANI
E alala le tusitala i Nevada, ISA.
Ata na tusia e Ben Simonsen
I la’u aoga o le tele o tagata e i ai a latou uo tama ma uo teine. I lo’u aso muamua o le aoga i le avea ai ma se tagata i le vasega valu, sa ou feiloai ai i se tagata e igoa ia Paulo. Sa lelei le ma va. Sa avea Paulo ma se uo lelei tele.
O le aso na sosoo ai ina ua maea le aoga sa fesili mai ia te au atu i se tafaoga faamasani. Sa ou fai atu ia te ia e le mafai, ma sa ia fesili mai pe aisea. Sa ou fai atu ia te ia o au o se tagata o Le Ekalesia a Iesu Keriso o le Au Paia o Aso e Gata Ai ma e le mafai ona matou tafafao faamasani seiiloga ua 16 tausaga. Na fesili mai Paulo pe aisea, ma sa ou iloaina ai ou te leiloaina moni le mafuaaga.
O le po lena sa ou alu i le fale ma mafaufau loloto i le fesili a Paulo. Sa ou sailiili i le LDS.org ma faitau a’u tusitusiga paia. Sa ou maua se upusii a Peresitene Gordon B. Hinckley (1910–2008): “Ua faia i tatou e le Alii ia felaleleiai mo se faamoemoega maoae. Ae o lenei felaleleiai tele o le a avea ma alu o se pauta sei vagana e pulea lelei. … O le pogai lea ua fautuaina ai e le Ekalesia e le tatau ona eva faamasani ao laiti.”1
Sa ou tilotilo foi i le Mo le Malosi o le Autalavou. O loo ta’u mai ai o tafaoga faamasani “e mafai ona fesoasoani ia te oe e aoao ma faataitai ni tomai faaagafesootai, atiae ai faigauo, maua ai le fiafia tele ma mama, ma iu ai ina maua se soa e faavavau.”2
O le aso na sosoo ai sa ou faaali ai ia Paulo le tamaitusi o le Mo le Malosi o le Autalavou. Na vaai isi tagata o loo faitauina e Paulo, ma sa fesoasoani au uo lolotu ia te au e tali fesili a au uo i le vasega. Sa ou fiafia i le i ai o se tali i fesili a Paulo.
Na tau mai i le Mo le Malosi o le Autalavou o le tafafao faamasani ao lei 16 tausaga ma le fausiaina o ni mafutaga tumau i lo tatou talavou e mafai ona taitai atu ai i le ola le mama ma faatapulaa ai le aofaiga o tagata tatou te feiloai i ai. Na ta’u mai foi e lo’u tina ia te au e le tatau ona tatou tafafao faamasani a o lei 16 aua e mafai ona faalavelave ia tatou meaaoga ma avanoa lea e taua i le faamanuiaina i le lumanai. Ua ou vaai i le faanoanoa o au uo ona o le faamutaina faalelagona o se mafutaga i le 13 tausaga.
Sa ou fiafia aua sa mafai ona ou iloaina mo au lava ia le mafuaaga e le tatau ai ona tatou tafafao faamasani a o lei atoa le 16, ma tuuina atu se tali ia Paulo e aunoa ma le faatiga i ona lagona. Ua ou faia se uo lelei, ma ou te faamoemoe o le a avea i maua ma se uo mo se taimi umi. Ou te faafetai i le Alii ua tuuina mai ia i tatou ni uo ma se avanoa e tafao faamasani ai i le tausaga talafeagai ina ia mafai ai e i tatou uma i se aso ona maua ni soa faamaoni e faavavau.