Aisea e Taua ai Au Filifiliga?
A’u sini faaletagata lava ia
Ata na tusia e Allen Garns
O aso uma lava e i ai au filifiliga e fai. O nisi o na filifiliga e le tele ni mea e faatatau ai i la outou olataga e faavavau (“O le a le lanu o le ofutino e tatau ona ou ofuina?”), ma o nisi o na mea e faatatau uma lava i ai (“E tatau ona ou solia lenei poloaiga?”). Atonu o nisi taimi e te mafaufau ai, “Mata e taua tele au filifiliga?” Pe e mafai foi ona e mafaufau, “Afai e leai se tasi e iloa mea o loo ou faia, mata e aafia tele se tasi i a’u faaiuga? O le tali o le ioe! O faaiuga e taua.
Aisea e Taua Ai
Ina ia malamalama pe aisea e taua ai au filifiliga, tatou toe foi i tua i le muai olaga. Ina ua tuuina mai e le Tama Faalelagi Lana fuafuaga o le faaolataga, e lei malilie i ai tagata uma. Na tetee Lusifelo i le fuafuaga ma “saili e faaumatia le faitalia a le tagata” (Mose 4:3). Ona o lenei mea, na avea ai o ia ma Satani ma na tutulieseina o ia ma i latou na mulimuli ia te ia mai le lagi ma taofia ai le avanoa e alualu i luma e ala i le tofo i le olaga faaletino. Sa matua taua lava le faitalia i le fuafuaga a le Atua ma o i latou o e na mananao e faaumatiaina na tutuliesea mai le lagi!
O le fuafuaga a le Tama faalelagi tatou te maua ai le avanoa e filifili mo i tatou lava aua ua na o le pau lena o le ala e mafai ai ona tatou aoao, tuputupu ae, ma ia avea atili e faapei o Ia. O se tasi o faamoemoega o le olaga o le aoao e faaaoga ma le atamai lo tatou faitalia. Peitai e lei tuuina mai ia i tatou le faitalia e mo na o le faamoemoega e fai ai soo se mea tatou te mananao e fai. Ua aoao mai le Mo le Malosi o le Autalavou, “A o e i ai i lenei lalolagi, o le a tofotofoina oe ina ia iloa ai pe o le a e faaaogaina lou faitalia e faaali atu ai lou alofa i le Atua e ala i le tausia o Ana poloaiga.”1 O le filifili e tausi i poloaiga o le a faaali atu ai i le Atua tatou te alolofa ia te Ia ma naunau e mulimuli ia te Ia. O filifiliga tatou te faia—e aofia ai o tatou uiga faaalia i le faia o na filifiliga—o se vaega tele o le suega o le olaga faaletino.
Filifilia o le Lelei
Na aoaoina pea lava pea outou o le filifili e le usiusitai i poloaiga a le Atua e aumaia ai taunuuga. Ae pe na outou mafaufau e faapea foi le moni mo filifiliga lelei? Ua aoao mai le Mo le Malosi o le Autalavou: “E ui ina e saoloto e filifili lau lava ala o taga e fai, e te le saoloto e filifili taunuuga. Pe lelei pe leaga, o le a mulimuli mai taunuuga o se iuga masani lava o filifiliga e te faia.”2
O a la taunuuga o filifiliga lelei? Atonu e mafai ona e aumaia se lisi tele o faamanuiaga lea e oo mai i le faia o filifiliga amiotonu. O se nofoaga lelei e vaavaai ai mo nei faamanuiaga o totonu lea o tusitusiga paia ma lau tamaitusi o le Mo le Malosi o le Autalavou. Mo se faataitaiga: “Afai e te tausia aʼu poloaiga ma tumau e oo i le iuga, o le a e maua le ola e faavavau” (MF&F 14:7); “O le tausia o le Sapati o le a e latalata atili ai i le Alii ma lou aiga”3; po o le “A e usitai i [le Upu o le Poto], o le a tumau pea lou saoloto mai vaisu faataumaoi, ma e pulea ai lou olaga.”4 E foliga mai o ni faamanuiaga maoae na mea, ma e tele atu isi e mafai ona e maua.
Na fetalai mai le Alii e “tatau ona [tatou] auai ma le naunautai i se faamoemoega lelei, ma fai mea e tele i lo [tatou] lava loto malie,” ma sa Ia folafola mai e mafai ona tatou “aumai le amiotonu tele” pe a tatou faia (MF&F 58:27). O le mea lea e le na o mea leaga e tatau ona tatou aloese mai ai ae ia saili ma le naunautai e fai mea lelei.
O nisi taimi tatou te matua popole ai e uiga i mea uma e le tatau ona tatou faia ma galo ai ia i tatou o le usiusitai e aofia ai foi le faia o mea e tatau ona tatou faia. Atonu e mafai ona e malamalama i le auala o aafia ai lou olaga i se tulaga le lelei ona o le filifili e solia ia poloaiga, ae o e malamalama i le ala o aafia ai lou olaga ma olaga o isi ona o le filifili e fai ni mea lelei?
Ola ma se Faamoemoega
E faapefea la ona e mautinoa o loo e faia ni filifiliga lelei? Muamua, mafaufau i mea e te manao mai lou olaga. Pe e te manao i se olaga e faavavau? Pe e te manao ina ia faamauina i le malumalu? Pe e te manao e auauna atu i se misiona talai? Pe e te manao ia faauu mai le kolisi ma maua ai se galuega lelei? Afai o lea, e faapefea ona e oo iina? E pei lava ona manaomia e tagata faufale se mamanu e fausia ai se fale tele, e te manaomia foi se fuafuaga e fausia ai se olaga amiotonu.
Tusi i lalo nisi o au sini, ma pe faapefea ona e fuafuaina e ausiaina. Tuu lena lisi i se mea e mafai ona e vaai i ai i le tele o taimi. Afai la e tatau ona e faia se filifiliga, e mafai ona e mafaufau i lau lisi ina ia mautinoa e aua le tuulafoaia se mea e sili ona e manao i ai mo se mea e te manao i ai i le taimi lenei. O le faatutuina o ni sini e fuafuaina ai ma faamoemoeina ai au filifiliga nai lo le gaogaosa, le fuafuaina, po o le faavae i luga o tulaga e oo mai.
E faapefea ona galue moni lenei mea? Sei o tatou ta’ua o se tasi o au sini o le auauna atu faamisiona. Ma o taeao uma lava ua ia te oe le filifiliga e ala i luga mo le seminare i le taeao po o le moe i se isi itula faaopoopo. O fea o na filifiliga o le a fesoasoani ia te oe ina ia ausia lau sini? Pe atonu foi e i ai sau sini e faitau faauma le Tusi a Mamona ao lei oo atu i le faaiuga o le tausaga aoga. Ae, a e taunuu mai la i le fale mai le aoga pe, ae e te lei moe, ua i ai sau filifiliga e faitau au tusitusiga paia po o le faia o se isi gaoioiga, e pei o le matamata o se ata e sili ona e fiafia i ai i le TV. O fea e te filifilia? O filifiliga faapenei ua i ai i o outou luma i aso uma. O le teuina o au sini i le mafaufau, o le a fesoasoani e te faia ai ni faaiuga o le a taitai atu oe i mea e te manao moni lava i ai.