Donu se Cala?

Mai vei David A. Edwards

Mekasini ni Lotu

Ena so na gauna ena dredre toka mo kila na dina mai na cala, ia na Tamada Vakalomalagi sa solia vei keda na isolisoli qaqa me vukea me da kila na duidui ni nona dina na Kalou kei na lasu nei Setani.

Kevaka o sa bau dabeca e dua na veitarogi ka ra tu kina na taro me saumi ena donu se cala, o na kila ni na dredre ena so na gauna me da raica e dua na cala. Sa vakakina, ena veitaro bibi ni vakabauta, na ka eda nanuma, kei na bula e veisiga, ni sa rui ka bibi sara me rawa ni da tukuna na duidui ni veika e dina kei na veika e sega, e sega ni dau rawarawa e veigauna kece.

Ia, e sega ni yaga me da rere me vakataki ira na laki veitarogi ka ra sega tu ni vakarau. Sa vakalougatataki keda na Tamada Vakalomalagi ena veisolisoli e vuqa me vukea noda kila na Nona dina kei na lasu ni meca.

Na Veimataqali Lasu

Taumada, me vakaraitaki e dua na vakasama, oqo e dua na kilakilamada donu se cala vei kemuni:

E drokadroka na vula. donu cala
O Neil Armstrong, na dauvuka ni maliwa lala ena Apollo 12 ka imatai ni tamata me butuka na vula, e kaya ni veika a yaco oya sa dua na “ikalawa vakaitamera me baleta na kawatamata.” donu cala
Na parokaramu ni National Aeronautics and Space Administration (NASA) a sega ni rawa ni lako sara ki na Mars ena 1969, eratou sa mani gole ga kina ki na vula. donu cala
Na cagi, katakata, na rarama, kei na veika tale eso a rawa ni tarova na sobu ni tamata ena vula, qai kuria ni vaka e lasutaki na itaba ka sega ni veitaudonui eso na nodra itukutuku lalai o ira era raica e matadra, e rairai eratou a lasutaka na matanitu o Amerika na veika kece a yaco. donu cala

Na isau ni veitaro yadua na Cala, ka matataki ena veitaro oqo eso na ka cala e rawa ni o sotava.

Na taro 1 e dua na lasu rawarawa, e dua na cala matata. Na taro 2 e dua na dina vakatikina, e lawaki toka, baleta ni umana vata e dua se sivia na dina kei na dua na lasu (na Apollo 11, sega ni Apollo 12—voleka sara!). Na taro 3 e toka kina e dua na duidui cala, se dua na ka e soli ga kina e rua na digidigi ka rau sega ni ka duadua ga e rawa ni digitaki (na NASA a rawa ni ratou digitaka me ratou lako ga ki na dua na vanua, taura mada). Na taro 4 e dua na veiba “vakaibalebale”, ka vakayagataka e dua na ibinibini vakasama vakaibalebale ia e lasu na kena ivakadinadina me rawa ni cala kina na vuana.

Lasu ni Gauna Oqo

Ni tarai na veika e rawa ni vakauqeta na noda vakasama, noda vakabauta, digidigi, kei na tovo—na veika e tawamudu na kena revurevu—ena vinaka kevaka eda qarauna na veimataqali ka lasu kecega, baleta ni o Setani, na tama ni ka lasu kecega” (2 Nifai 9:9), ena vakayagataka na iwalewale kecega e rawata me vakacalai keda kina. Oqo eso na ivakaraitaki ni sala e cakava tiko kina ena gauna oqo, vakakina na ivakaraitaki ni ivakarau e rawa ni da sotava kina ena ka dina.

Veika Sega ni Dina Rawarawa

Vakasama Lasu:	Vanua e Tini Kina (Lasu Levu):	Na Dina:
Na iyaloyalo kei na ivola vakasisila e donu tu ena sega ni leqa kina e dua.	Lako sarava na iyaloyalo kei na ivola vakasisila.	Na iyaloyalo kei na ivola vakasisila ena veilaroitaka na ivakarau ni noda rai me baleta na bula ni veiyacovi, e rawa ni veivakabobulataki, veivakamavoataki vakatitobu vakayalo, ka rawa ni vakarusa na isema vakaveiwekani.

Dina Vakatikina

Vakasama Lasu:	Vanua e Tini Kina (Lasu Levu):	Na Dina:
Na tamata yadua e duidui ka rawa ni bula ena kena ivakarau ga e digitaka, ia na ivakarau ni nomu nanuma kei na ivakarau o vakamacalataki iko kina sai koya na ka bibi duadua ena nomu bula.	E sega ni dodonu me tukuna vei iko na Kalou se na Lotu na ivakarau mo bula kina, cakava ga na ka o vinakata mo lomavinaka kina.	O keda yadua eda luvena na Tamada Vakalomalagi, ka vinakata vei keda me da yacova na keda vinaka duadua ka yaco me vakataki Koya. Na talairawarawa ki na Nona ivakaro ena vukea me da rawata na reki cecere duadua.

Duidui Cala (Rua ga na Digidigi)

Vakasama Cala:	Vanua e Tini Kina (Lasu Levu):	Na Dina:
Na lotu e vosasaqata eso na mataqali ivakarau ni bula; o koya gona, sa sega kina ni dau ciqoma ka cata na tamata—e sega ni veiciqomi ka loloma.	Me vaka ni sega ni dau veiciqomi ka dau veicati na Lotu, sa dodonu kina me vosacataki, vakacacani, ka vakalolovirataki, o koya sa dodonu mo kakua ni semati iko kina.	Na kena sega ni ciqomi na nona ivakarau ni bula e dua tale e sega ni vakatauvatani kei na veicati kei na sega ni veiciqomi. E rawa ni da vakaraitaka na yalololoma, veidokai, kei na yalovinaka vei ira na tamata kecega—okati kina o ira na tamata e veisaqasaqa kei na lawa ni Kalou na nodra ivakarau ni bula—ka da dinata tikoga na Kalou kei na Nona ivakaro.

Veiba “Vakaibalebale”

Vakasama Cala:	Vanua ena tini Kina (Lasu Levu):	Na Dina:
Eso na ka era tu ena iVola i Momani e vakalasui mai na ivakadinadina ni vakadidike ena gauna oqo, kei na itukutuku ni kena a vakadewataki era duidui, o Josefa Simici beka e bulia ga na itukutuku oya se lavetaka beka mai na dua na vanua.	E sega ni dina na iVola i Momani ka sega ni parofita o Josefa Simici, kakua ni semati iko tiko ki na Lotu.	Na vakadidike e vakadeitaka e vuqa na ka ena iVola i Momani, kei na “ivakadinadina” e saqati kina e sa vakacalai. Ia na kena ivakadinadina bibi duadua sai koya na ivakadinadina bula ni Yalo ka tukuna vei iko ni dina ka parofita dina o Josefa Simici.

Me Kilai Vakacava na Dina

Evei beka na vanua ena laurai mai kina na taucoko ni dina? Ena rawa vakacava me da raibasikata na ka lasu? Oqo eso na isolisoli qaqa sa solia mai vei keda na Tamada Vakalomalagi me vakaduiduitaka na dina mai na lasu.

Na Rarama i Karisito. “Na Rarama i Karisito … ena vakauqeta na tamata kece e dau vakatulewa matau e vuravura taucoko me ra kila na dina mai na lasu, dodonu mai na cala. E vakayavalata nomu lewaeloma.”¹
Na Yalo Tabu . “Na Yalo Tabu na vu ni ka dina, ena tuberi kemudou ki na ka kecega e dina” (Joni 16:13).
iVolanikalou. “E dau vakayagataka na Kalou na ivolanikalou me vakabasikati kina na vakasama lasu, ivalavala cala, kei na ivalavala ca kei na kena revurevu ca.”² Ena vuku ni ka oqo sa bibi kina na iVola i Momani, ni “vakavotui ira mai na meca i Karisito. Ena vakamaduataka na ivakavuvuli lasu ka vakaoti na veileti. (Raica na 2 Nifa. 3:12.)”³
Parofita ni gauna oqo. “Na nona itavi [e dua na parofita] me vakavotuya mai na loma ni Kalou kei na nona itovo dina ni bula ki na kawatamata. … Na parofita ena vunauca na ivalavala ca ka tukuna na kena isau.”⁴
Vuli . “E dua na yalododonu … ena gumatua sara me kila ka io ena vuli kei na vakabauta. Na vuli … ena rawa kina vua e dua me kila na dina mai na lasu, vakauasivi ena kena vulici na ivolanikalou. (Raica na V&V 88:118.)”⁵

E dina ni na sega beka ni dau rawarawa na noda sauma na Donu se na Cala ni da sotava na duidui ni veivakasama era tu oqo, na isolisoli sa solia vei iko na Tamada Vakalomalagi ena vukei keda me da rawata na veitarogi.