Katotonga Amon

Te mwaane ae ninikoria aei man Ana Boki Moomon e kona n reireinira baika bati n taekan te mwakuri ni mitinare ao kamarurungaakiia membwa n te bong aei.

Men with sheep and goats.

Kamatata n te tamnei iroun Dan Burr

Amon bon te ataeinimwane ae ninikoria n Ana Boki Moomon, are e ataaki n ana mwakuri ni kakaonimaki n ikotana ma kakawakinaia ana nanai ni man Ramonaai, are aia uea Reimwanaite (tara Aramwa 17:25–39; 18:1–10). Rongorongon Amon, n aekan rongorongo ni koroboki aika tabu n Ana Boki Moomon, e kona n reireinira bwai aika bati bwa ti na kona ni butimwai taai aika kakawaki ao ni kona n tokanikai i aon kaangaanga ake ti kaaitarai n te bong aei.

Te Mition ae Kakannato

Suzanne E. Tarasevich mai Millville, New Jersey, USA, e reiakin tabeua reirei mai iroun Amon ngke e tabe ni karaoa ana mwakuri ni mitinare ae bwanin taina ma buna te mwaane, Adolf.

“Ngke e a roko n ara bwaokinreta te tinaniku n reta ae mainaina ni bubura ma kanoana are weteakira nakon te mition,” e taku, “kaainabau ao ngai ti rang ni kakatonga iai. Ti karaoa ara aki mamatam ao ti tataroakina taekan weteakira. Tiaki n are ti tabeaianga n taekan te tabo ni mwakuri, ma ti mateakina te koaua are e na reke iroura taian atatai ni kakoroi raoi nanon weteakira.

“Rimwi riki n te tairiki anne, ti bane n ikotaki ma natira ao tibura, ti kauka te tinaniku n reta arei, ao ni wareki weteakira bwa ti na nako Poland Warsaw Mition. Ni warekakina, ti namakina te rau i nanora ae bati bwa aei, ni koaua, te mwakuri are nanonaki ibukira. Ti rang ni kimwareirei.”

Ma, ngke ti a roko n ara mition, e a reke ana kaangaanga Titita Tarasevich bwa e aki koaua raoi n te baere e na kona ni wakinna. “E anganaki naba ngkekei kaainabau mwiokoana ae matoa bwa tabeakinan waaki ni kairiiri ni kaungaan te rikirake,” e taku neiei. “E ngae ngke ti babanga te taetae ni Poland e butiraoi ana mwakuri.” Ma, e taku, “E roko irou te namakin are akea manenau ao I bua. I a nanokokoraki n aron kakawakin au kekeiaki ni mitinare.”

Mitinare aika Korakora

E kunea Titita Tarasevich bwa e iaiangoi taekaia mitinare aika a korakora n Ana Boki Moomon. “I nanon ririki aika bati n nakoau n tia reirei n te Moanrinan, e aki toki anaakin nanou n riaeakin ao kakaongoraan mwaakan korakoran karakinan Aramwa ao natin Motiaea mwaane n reiakiniia ataei taekan te mwakuri ni mitinare. Ngkana I iangoiia mitinare, I noria tamnein Amon n au iango are aintoa ao e korakora, ao I kona ni kai iangoiia mitinare ake ataei ao a marurung n ara mition bwa kanga natin Motiaea mwaane n te bong aei. Ma I mimi ngkana e kaota akean te nanorinano nakon te tibu te aine ae iaia iranatuna n aekau tangiran te tabe ae aron anne.”

Ngke e tabe n iaiango, e taku, te bwana mai kabin nanou e moanna n titirakinna titiraki ma te karaurau.

“Tera ana moan mwakuri Amon?”

“N riki bwa te toro, n tararuaiia nanai ni man, ao ni bootiia tibu ake a maaenako,” e kaeka.

“Ngaia are riki bwa Ammon temanna.”

Tauraoi ni Beku

Iango aikai a karekea te ota nakon Titita Tarasevich. “Akea bwa I a ota raoi bwa tera aron au mwakuri ae riai,” e taku. “I a ota bwa n te tai arei I tuai atatai raoi n te taetae are e kainnanoaki ibukin karinakin koaua irouia tabemwang, ma au ririki ni kataneiai ma te Botaki n Aine e katauraoai ni beku ibukiia tabemwang—n ukeukenako, ni kukune, ao n tangiriia ake a namakina te aki tabeakinaki ao te aki raoraonaki.”

E moanna n iangoi mwakurina ni mitinare n ana taratara ae boou. “E riki ataakin kawai aika bati irou n te aro are reirei n taekan Kristo a kona n tokanikai i aon kabwakau n te taetae, e taku. “I moanna n noria bwa tera are N na kona ni karaoia n tararuakiia nanai ni man ao ni bootiia tibu ake a maaenako.”

I mwin anne, e taku, “te maiu ni mitinare n ae rorora aio e riki bwa teuana te tai n reirei ao ni mwakuri ae kamimi arona ngke e reke ara tai n nora te euangkerio bwa e bitaki ao e kakabwaiai maiuia ake a butimwaea te euangkerio.” N angiin te tai e kan anenea te kuna n taromauri teuana are e aranna bwa kunan Amon: “Noria, e onrake kimwareireiu eng, e a onrake nanou n te kimwareirei, ao N na kimwareirei iroun Atuau” (Aramwa 26:11).

Kamaiuan te Tibu

Peggy Wallace Poll mai South Weber, Utah, e karekei rakan ana taratara mai iroun Amon ngke e anganaki ana mwakuri bwa e na reirei te kamaiu n tamnei ao te manga kamarurung n te ekaretia ni botakin te kataneiai n tia kairiiri n ibuobuoki ao n nakoanibonga n te titeiki.

“Ni warekan karakinan Amon ae rangin n ataaki, I kunea te bwai ae boou,” e taku. “Uringa, Amon e karaoa ana mition ibuakoia Reimwanaite. E a tia n anganaki tabena bwa e na tararuaia ana tiibu te Uea. Iai tooro riki tabeman ma ngaia, ao ngke a uota te tiibu nakon Teebuti bwa e na mooi, taan ira a kamaenakoi ana nanai ni man. E rangin ni kakamaku aio nakoia tooro ake tabeman. N tokina, tabeman ake a tia ni kariaia tiibu bwa ana maenako a tia n tiringaki, ao a koaua bwa ana bon tiringaki naba. (Tara Aramwa 42:30.)

“Ma e nora ana tai Amon,” e taku Titita Poll. “E tuangia toro ake tabemwang bwa a na kabebetei nanoia bukina bwa iai ana babaire. Wareka Aramwa 17:31–33, ao ko na nora te baire bwa e karaoaki raoi:

1. Ataia ni waekoa bwa a bua tibu.

2. ‘[Mwananga] ma te waekoa.’

3. Ikotiia tibu.

4. Uoti ni kaokiia nakon neia tiibu ma te kawakinaki raoi.

5. Katobibiia, tararuaiia bwa a na aki kabuanibwai maiuia, ao kamarikeiia ma te tangira.”

E taku Titita Poll bwa e rangin ni mimi bwa e kanga te karaki aei ni kaineti ma te kamarurung: “Ko kona n iangoa karakinan Amon bwa te kanikina nakoia taan kairiiri n te bong aei, ni kamaiuia membwa ae a moanna ni maenako. A mwaiti anainano n te aonaaba aei ae, ti tebo ma taan iraa, e kona ni kararoaia membwa man ana taeka te euangkerio ae tamaroa. Ti riai n taratararaoi ao ni waekoa ni karaoa te mwakuri ngkana e bua temanna man Ana nanai.”

E taekina ana taeka Beretitenti Gordon B. Hinckley (1910‒2008), are e taku, “I kantaningaia, bwa n na tataro, bwa ngaira n tatabemanira … ti na ibuobuoki ni ukoukoria naake a kainnanoi buokaia, ake a kainnanoa te buoka ae waekoa, ao kainnanoia aika matoatoa, ni kaungaia ma katei n tangira bwa a na okira te Ekaretia, ike aomata aika tamaroa man n tangira a na raoiroi nakoia, kamweraoia, kamatoaia, ao ni buokia ni karekea te maiu ae kakukurei man uaana.”¹

Bwai aika a na taraki

1. Gordon B. Hinckley, “Reach with a Rescuing Hand,” Ensign, Nobembwa 1996, 86.

Kakaaea Temanna Ae Bua

Final official portrait of Elder L. Tom Perry of the Quorum of the Twelve Apostles, 2004. Passed away 30 May 2015.

“E kakawaki ibukira n tatabemanira nako bwa e kanga aron te namakin iai ngkana ko a bua ao tera ae nanonaki n rikim bwa te tia kawakintibu n te maiu n tamnei ae kitaniia 99 n nako ni kakaea temanna are bua. Te aeka n tia kawakintibu anne e na kainnanoa rabakaun ao ana ibuobuoki te tiim ni kakae ao ni kamaiu, ma iai ikai, a tei ibukina, ao n tamwarake irarikiia ni kamaiuiia aika bati bwa a kakawaki i matan te Atua, bwa bon Natina.”

Unimwaane L. Tom Perry man te Koram n Abotoro n te Tengaun ma Uoman, “Bring Souls unto Me,” Riaona, Meei 2009, 112.

E kona Amureki N Reireiniira Naba

Amureki bon ngaia naba temanna ae ninikoria man Ana Boki Moomon. E kaotia bwa tera aron te aomata ngkana e okira kawain te raoiroi.

Amureki te aomata naba ae kaubwai ao e tanoata taekana, e kaotia i kanne bwa e kakoauai kakai ao mwaakan te Atua ma e kamatoa nanona.“E bon bati te wewete nakoiu ao I bon aki ongo; ngaia ae I atai bwai aikai, ma I bon rawa n atai,” e taku (Aramwa 10:6; tarai naba kibu 4‒5).

Ma te Uea e kanakoa te anera bwa e na tuanga Amureki bwa e na butimwaea Aramwa, are te burabeti, nakon mwengana. E kaamwarakea Aramwa Amureki, ao e kakabwaia ao n reireina Amureke ma kain mwengana. Mai ikanne e a ira Aramwa Amureki ni mwakuri, n riki bwa ngaia te kauoman n tia kakoaua i bukin te euangkerio. (Tara Aramwa 10:7‒12.)

E riki Amureki bwa toan Aramwa ni weteiia aomata nakon te rairannano, ao e kabwarabwara te euangkerio ma te korakora ao te kariaiakaki n te aro are a tounako aomata irouna (tara Aramwa 11:46). A kabaeaki ao a karenakoaki nako nanon te karabuti, ma a reke birinakoia Aramwa ao Amureki n te aro ni kakai, a katea te Ekaretia i Titom, ao a reiakina te euangkerio ni kabuta te aba (tara Aramwa 14; 15; 31).

N aron Amureki, a mwaiti aomata n te Ekaretia n te bong aei ake, ngke a oki ma te kakaonimaki, a na kunea bwa te Uea e na kakabwaiaiia ao ni kona n riki bwa taan tia kaotioti aika ninikoria n te koaua.