Ara Tabo

Bwabetito ibukin Tibu te Unimwane

I kakaitau bwa ara mataniwi n te roronrikirake e baireia bwa ti na nakon te tembora. Ngke ti katauraoi ibukin te mwananga aei nako Apia, Samoa, ti rang kukurei ibukin te tibwanga ae aki rang kakaraoaki aei. Ti rin ma te kukurei inanon te tembora ni karaoa te bwabetito ibukiia mate—ibukiia naake a mena n te aba n tamnei ake a taningaira bwa a na reke rongorongon ara utu ao ni karaoi mwakuri ibukiia.

N tain te bwabetito, I noora te ataeinimwane n ara kurubu are e bwabetitoaki ibukin Faataga Agavale, tibu te unimwane. I namakina rannanimata ni kukurei i matau, ao I ataia bwa e mena ikekei tamneina. I rangi ni kukurei bwa ti kona ni karaoa te mwakuri ibukina n te tembora.

Saini Agavale, Samoa

Rongorongo aika a kakaawaki mai iroun te Rao

Ngke tebwi tabun au ririki, I aki kan nanako n taromauri, ngaia are I aki ata kanoan te Baibara ke taekan te Atua ke ni kan ataia. Ngke ai 17, raraou temanna e tuangai bwa ngaia kain te Moomon. Bon akea au iango bwa tera te Moomon. I tuangiia raraou, “Ngkana I kan ata rongorongon te aro anne, Nna bon kakaea bon irou.”

Noorakin ae I aki rangi n tabe ma taekan te aro, e anganai ana Boki Moomon ao e tuangai bwa nna warekia ao n tataro ibukina. E aki kairoroai. Rimwi riki imwiin te tairiki anne ngke I kauka te boki, I noora ana koaua are e koreaki n te moaniba. Ngke I warekia, I namakinna bwa I riai n reiakinaki riki taekan ana Boki Moomon. Ngaia are Ia wareka 1 Nibwaai. I aki kona ni katuka te boki. I tangiria ni kan ata riki are imwina.

N te kainutu n te tairiki, ana utu a reireinaki taekan ana euangkerio Iesu Kristo. Bwaai ni kabane a tara ni koaua. N te tai ae waekoa I reireinaki irouia mitinare ao ni bwabetitoaki ao ni kamatoaki bwa te membwa n ana Ekaretia te Uea ni koaua. Te euangkerio e buokai n ataia bwa antai ngai, I nako mai ia, ao tabo ake I kona n nako iai ngkana I kakaonimaki.

Ngke I tanrikaaki, I kona n noora aron te Tamnei ae Raoiroi ni buokai n tangiria bwa nna reiakinaki riki. Ngke Ia reiakinaki riki anuau n taekan te ekaretia ao te Atua e bitaki. N te moan tai inanon maiu, I tangiria ni karaoa are E tangirai bwa nna karaoia.

Ana Boki Moomon e bita maiu, ao I kakaitau ibukiia raraou ake a tibwaia nakoiu. Te rao ni koaua e tibwa te rongorongo n aron aei.

Michael P., Ohio, USA