I Nora Ubun Tinam

Randi Reynolds Allen, California, USA

N te Tabati teuana inanon te tiamwa n 2002, I uti n iangoa tinau, are e a bon tibwa mate. I kawara au uoote ni mweengau rimoa n te Pacific Palisades, i California n te USA, are e tataromauri iai tinau n te maan ae kaniia 50 te ririki.

I katorobubua n tataro n tuanga te Uea mwaitin au tangira nakoina ao I bubuti ibukin namakinan te tamnei n te bong anne.

N te bwakantaai anne I baireia bwa nna ira te manga katabu n rawebwana n te Tembora i Nauvoo Illinois n ana kateitei Santa Monica, Californina. I tekebuaka bwa I rang n rimwi n roko ai ngaia are i aki kona ni karinaki n te tietion. I okira au kaa ao n oki rikaaki n te kawai ae rababa.

Ngke I buti, I ongo te bwana ae kangai, “Randi, nako tuoa Mary!” Mary bon te rao ae tatangiraki n ara utu ao bon te membwa ae kakaonimaki n te aro teuana. Ngaia ma natina te aine a maeka irarikin ai tinau ae Ruby n te maan ae raka iaon 25 te ririki. Ibukin bwa akea aia utu ae kaan nakoia, anne bukina ae a riki bwa raora. Imwiin maten ai tinau n 1984, e bon aki toki n roroko tinau ni kawara Mary, n tainako e uouota te bwaintangira ae uarereke ke te bwai are e umwunna.

N te moan tai I aki tabe ma te wirikiriki. I karaoia ae ana akea ae ana ataai ae i roko. I aki naba kona n tareboniia iaon au mobwaera. N te tai ae tawe e manga roko naba te bwana, e a nene n te tai aei: “Randi, nako tuoa Mary!” N te tai aei I a ira te wirikiriki, e ngae ngke e a bon aki tau te tai n otinako man te kawai.

Ngke I roko n ana tabo Mary, e butimwaeai ma e tara n aoraki. I kona nooria ae e a maan n tang. I titirakinna bwa tera ae e riki. E kaeka bwa e bon wene n aoraki ma te maraki n ikoakin roroana. Teuana naba, e a bon rang uarereke amwarakena. E taku bwa e aki kona n rianna nakon te tabo ni bwainaoraki ke te mwakete ibukin aorakina.

Ngke I titirakinna bwa bukin tera e aki wetea temanna n ara utu ibukin buokana, e taku, “I tataro ni bubutia Tamau are i Karawa bwa terana ngke e kanakomaia temanna bwa e na kona ni buokai.”

I tuangnga bwa e ongo ana tataro Tamara are i Karawa ao e kanakomaiai. Ti inga, ao imwina e tuangai te bwai teuana ae I aki kona ni mwaninga. E taku, “Ngke ko roko n au mataroa, I noora ubun tinam, tiaki ubum.”

I waekoa n namakina tamnein tinau ae tangira ni kaan irarikiu, ao I namakina te wirikiriki bwa Nna beku n ai aron are e a tia ni karaoia tinau. Ni maiuna, ni bwai ni kabane, e kaonaki nanou ni kan buokiia tabeman.

Au kantaninga bwa Nna aki mwaninga kakawakin te kakauongo nakon bwanaan te Tamnei ao ana banna ni katoto tinau are e kateia nakoiu ni buokiia tabeman.