Burabeti n te O Tetemanti

Eria

“Eria ngaia temanna te burabeti ae korakora mairouia burabeti, ao te Uea e anganna te mwaaka ni kabaebae.”¹—President Joseph Fielding Smith (1876–1972)

Ngai ae Eria ngkai te burabeti i Meangin te Tautaeka n Uea n Iteraera.² Ni kaineti ma aia bong ni buakaka Iteraera’, I kabaea karawa ni kaitara te karau, ni karika te rongo iaon te aba. Inanon tain te rongo, I momoi man te karanga ao reben a ana kakaamarakeai, ao imwiina e mau nanon te karanga.³

E tua te Uea nakoiu bwa n na kawara te aine ae e mate buna are maeka i Tarebata, bwa e na anganai te amarake. I nooria ni boboti kaai ibukin te kabanea n amarake are e katauraoia ibukina ma natina te mwaane. I tuangnga bwa ngkana e anganai te amarake moa, ao “[e na aki] kenako kanoan te baketi ni baraua, ke tao [e na] bon aki tare naba kanoan te batoro ni ba, ni karokoa te bong ae E na kanakomaia te ran iai Iehova nako aon te aba.”⁴ E kamwakura ana onimaki, ao te Uea e kakoroa nanon Ana berita.

Inanon tiku ni maeka ma ana utu, te aine ae akea buna e mate natina te mwaane. I korakai n tataro, “Iehova ae Atuau, I butiko bwa ko na kaoka tamnein te tei aei nako nanona.”⁵ Te Uea e ongo banau, ao natin te aine aei e a manga maiu.⁶

Imwiina, I kaota mwakan te Uea nakoia aomata ake Iteraera ni kaewenakoia burabeti ake a maeka i Aaba n te kabo. Burabeti a wetea aran Baara man te ingabong ni karokoa te tairiki ni kanakoa te ai, ma bon akea te ai ae kaoti. I karaoa te baonikarea ao atibu aika tebwi ma uoua, n ai aroni maitin aia baronga natin Iakoba, ao ni kena te rua irarikin te baonikarea. Imwiina e a reke te baonikarea ma te baonikareanikabuokaki are e roto n te 12 te baketi n ran, are ranga nako te ran ni kaona te rua. I wetea aran te Uea, ao E kanakoa te ai are e a kabuoka te kareanikabuokaki, te baonikarea, ao te ran. Imwiina, I tataro nakon te Uea, ao E kauka karawa ni kabwaka te karau.⁷

N tokin maiu, I aki mate ma I aerake nako karawa ma aoti aika ai⁸. Inanon ana tai Kristo n rereirei iaon te aba, I kaoti iaon te Maunga man onikaki ao n anga kiingin te nakoanibonga nakon Betero, Iakobo ao Ioane.⁹

I kaoti naba ni bong aika katira “ni karairaki nanoia kaaro nakoia naati, ao naati nakoia kaaro,” n roko nakon te Kirtland Tembora n Eberi 3, 1836, ao ni kaokii kiingin te mwaka ni kabaebae nakon Iotebwa Timiti ao Oliver Cowdery.¹⁰

Bwaai aika a na taraki

1. Joseph Fielding Smith, Answers to Gospel Questions, ed. Joseph Fielding Smith Jr., 5 vols. (1957–1966), 4:193.

2. See Guide to the Scriptures, “Elijah”; scriptures.lds.org.

3. Taraa 1 Uea 17:1–7.

4. Taraa 1 Uea 17:8–16.

5. Taraa 1 Uea 17:21.

6. Tara 1 Uea 17:8–24.

7. Taraa 1 Uea 18.

8. Taraa 2 Uea 2:11.

9. Taraa Mataio 17:3; Guide to the Scriptures, “Transfiguration”; scriptures.lds.org.

10. Taraa Doctrine ao Covenants 84:20.