Rabwatau Bon te Tembora
Ngkai ti tararuai rabwatara n te kawai are e a tia n tuangiira te Atua, ti na kakabwaiaki! (Tara Motiaea 2:41; D&C 89:18–21.)
Bukin tera ngkai iai rabwatara?
Imwaain buangiakira, bon tamnei ngaira n akea rabwatara. A mwaiti bwaai ake ti aki kona ni karaoi ni karokoa are a reke rabwatara. E kanakomaira te Atua nakon te aonaaba bwa ti na karekei rabwatara. Ti kainnanoi uoua bwaai ae te tamnei ao te rabwata bwa ti aonga n riki n ai aron Tamara are i Karawa. (Tara D&C 88:15.)
Tera kakannaton ae iai rabwatara?
Rabwatara a rang ni kakawaki ma n tabu bwa te Uea e aran bwa taian tembora (tara 1 I-Korinto 3:16–17). Ao karekean te rabwata e boni kakukurei naba! Rabwata a kona ni biri, n anene, n tamwarake, ni ngarengare, n uaua, n taenti, ao ni karaoi waaki ni kakukurei riki tabeua. Ao riki ti kona ni kabonganai rabwatara n reirei, ni buokiia aomata, ni karikiia ara utu, ao ni karaoa te aonaaba bwa te tabo ae tamaroa.
Bukin tera ngkai tiaki ti tearona taraaia aomata ni kabane?
Rabwata a roko n teia karaia, ao ni katuia, aika kakaokoro, ao aei bon mwakoron ana babaire te Tama are i Karawa. E ngae ngke a kakaokoro rabwata n tatabeua, ngaira ni kabane ti karikaki ni katotongan te Atua (tara Karikan B’ai 1:26). Are nanona bwa rabwatara bon bannan rabwatana ae kororaoi. Rabwata n tatabeua nako a tamaroa ibukina bwa bon bwaintangira mairoun te Tama are i Karawa.
Tera ngkana iai baika I aki tangirii man rabwatau?
N tabetai rabwatara a aki taraa, ni mwaing, ke ni mwakuri n te aro are ti tangiria bwa a na karaoaki nako iai. Ma E aki kakawaki bwa aekakira tein rabwatara ngkai, ti kona n rineia bwa ti na kakaitau ibukiia ao ni kabonganai ni karaoi bwaai aika tamaroa ikai iaon te aba. N tebongina, ngaira ni kabane ti na manga kautaki ao ni karekei rabwatara aika kororaoi (tara Aramwa 40:23). E tangiriira te Atua e ngae ngke e aki kakawaki bwa aekakira rabwatara.
N na kanga n tararua rabwatau?
Ti riai n tararuai rabwatara n te aro are ti kona ni kawakina iai te kaubwai ae bobuaka—ma te tangira ao te karinerine. Rinanoia burabeti ao Tuan te Mauri, e a tia n tuangira te Tama are i Karawa bwa baikara bwaai aika buakaka ao aika raraoi ibukin rabwatara. A mwaiti bwaai aika ti kona ni karaoi n tararuai rabwatara iai:
-
Kang amwarake aika kamarurung ao karaoa te mwakuri ni kamarurung.
-
Kunnikainiko n aki kamoamoa ao ni kawakin rabwatara bwa a na itiaki.
-
Karinei rabwataia aomata tabeman.
-
Ti na aki kakunikun rabwatara n orotaitai ke n ewaewari.
-
Tai kabonganai turaki, arekooro, baakee, kobee, ke te ii.
-
Karaoi takakaro ake ko mano iai ao a kaunga ao ni kararoako man waaki ni kakukurei ake a kamamate.
Ngkana ti tararuai rabwatara, ti a kona riki n namakina te Tamnei ae Raoiroi.