Ibukiia Ataei Aika A Uarereke
E Nakonako ma n Nakonako Tiera
E maeka te tia korokaraki i Utah, USA.
E kibakiba iaon waeana uaai Tiera imwiina i aon teaina ao manga are teaina. E a tauraoi n nakonako n rauniia Silver Lake ma ana utu. Mwaanena, ae Josh, e biri rimoana.
N te tai ae e aki maan e a moanna kabuebuena taai iaon bain Tiera. A moanna ni kakaii rangana.
“Tai raraoma,” e taku Tinana. “Ti a kaan okirikaaki nakon ara kaa.”
E Kainaki te Buriiti
Imwiina e a noora te roobu ae aoranti ae bubura Tiera n tuuka te kawai. “E a uruaki te buriiti,” e taku Tamana. “Ti nang manga rianna n oki n rauniia te nei.”
“Ma I a bon rang ni kua!” E taku Tiera. E tekateka Josh inano iaontano ao e matanokunoku.
“Ko uringa rongorongoia bwaeoniia?” e titiraki Tinana.
E katoutoua atuuna Tiera. E tangiriia bwaeoniia.
“A na bon mwananga n te kawai ae abwabwaki,” e taku Tinana. “N tabetai e bon rang ni kabuebue, ao n tabetai e a manga rang ni kamwaitorotoro. Ma a bon waakinako n nakonako. Ngke a roko ni mweengaia ae boou, a katei taian auti ao tembora.”
E kukurei Tiera ngke a teimatoa n nakonako bwaeoniia. E na teimatoa ngaia naba n nakonako. E kaenakoa baina nakon Josh. “Kawaekoako,” e taku. “Teutana riki nakonakora ao ti a roko.”