Uoua Reta mairoun te Tina
Ken Pinnegar, California, USA
Inanon 1996 Ngai ma kainnabau iai natira uoman mwane, aia ririki aua ao itiua. Bon te utu ae rang n tatabetabe, te utu ae kairake. Ni bwakanakon te tai n te tairiki teuana kainnabau e karekea ana tai ni korea ana reta nakon ai natiu te mwane, Glen, are e mitinare n te tai anne i Finland.
Ibukina tabeua, e namakinna bwa e riai ni korea te reta ae ananau—tebaana are e onrake n rongorongoia kain te utu are a karaoia, ibukina aroia ni maiuakina te maiu n tamnei, ao bwai ake a riki n nakoau ao n nakoan neiei n te Ekaretia, rongorongon aron rairakina, ana namakin ibukin te mwakuri ni mitinare, ao ana koaua n te euangkerio.
Bon te reta ae kakaongora, ma I titiraki ngkana arona bwa ai natiu te mwane aio e kainnanoa mwaitin te rongorongo anne. Imwina e a manga korea naba ana reta nakoina.
Onoua te ririki imwina, ngke I riki bwa te bitiobi ao ara ataeinimwane ai 10 ao 13 aia ririki, e waekoa ni bitaki au aonnaba. N Tianuare 2, kainnabau ai tibwa 42 ana ririki, e mate bwa e toki buroona.
N te mweenga I kataia n reitinako n ira te reirei inanon “Te Utu: Te Katanoata nakon te Aonaaba.”1 I kunea bwa I kona n tararua ao ni katauraoi, ma E aki tau au kona n anganiia natiu te tararua are a kainnanoia. E ngae n anne, ti waaki nako n ara kabanea n tamaroa.
Inanon Tuun 2012 natiu are uarereke, Sam, e a riki bwa te mitinare ae bwanin ana tai n te Colorado Denver Mition Meang. “Te bwai teuana ae tamaroa ae riki n te wiiki aei,” e koroia. “A reke uoua reta mai iroun Tinau.”
E kabwarabwara bwa e karekei uoua bakete mai iroun ai tarina Glen are raon reta ake e korei tinau nakoina ngke e mena i Finland.
“E tuangai bwa reta aika uoua e kanakoi nakoina Tinau iaon ana mition a bon koreaki ibukiu ngkai I a karaoa au mition,” E koroboki Sam. “Ngaia are e a kanakoi nakoiu, ao a bon rang n nakoraoi!”
N reiakinaki man ana maroro tinana, koaua ao ana namakin ni kaineti ma te mwakuri ni mitinare bon te “boutoka ae korakora n te maiu ae mamate n te tai aei,” E koreia Sam. E taku bwa e iangoia ni karekei katotoon reta aikai ao e kaoka te oi nakon mweengana.
“I aki kakoaua ae ko a tia n riki bwa te beretitenti n te kooram n unimwane ke mataniwiin te mition uoote,” E koreia Sam. E a ataia bwa ngke aua ana ririki, e “kibakiba iaon ana kainiwene imwiin ana tataro n takarua ‘I kan riki bwa te mitinare.’”
Imwina e reitia ma te bwai teuana are e a tia n reiakinna iroun tinana: “Tinau tao e a tia n ataia bwa Nna riki bwa te tia borabwata ibukina bwa e taku bwa I kan n riki bwa raraon te tia borabwata ae bane arona. :)”
I rotaki ao a bwaaka rannimatau n ana namakin Sam ibukin taian reta. Tabeua te wiiki imwiina ao e meerinii n oki. A bon korakora, a kaineti nakoira, ao a riinga te nano ngke a koreaki inanon 1996, ma n anganakin bwaai aika a riki n ririki ake imwina, a bon korakora riki.
Ana reta kainnabau a anga te korakora nakon ai natiu, ma n aron “kaki am berena iaon te ran; ba ane e na manga reke iroum i mwini bong aika bati” (tara Minita 11:1), a oki rikaaki ririki ake imwiina ni kakabwaia natina are e mitinare ao kainnabana.