Ka Kororaoaki iroun Kristo
Ataakin raoi te tangira are e reke man ana mwakuri ni kamaiu Iesu e kona ni kainaomataira man bukinakira ibon iroura, bwaai aika aki eti, ao kantaninga aika kairua n nanon raoi te kororaoi.
Light of the World, iroun Howard Lyon, e na aki katotongaki
Ti anene ma natira, “I feel my Savior’s love, the love he freely gives me.”1
Ana tangira ni kamaiu, e anga n akea boona, kaanga ai aron “miriki ao te anii, n akea te mwane ao akea boona” (2 Nibwaai 26:25). Akea tiana ao akea tokina (tara Aramwa 34:10), te Mwakuri ni Kamaiu e kaoira n “nakon Kristo, ao ni kakororaoaki irouna” (Moronai 10:32).
Ataakin raoi te tangira are e reke man ana mwakuri ni kamaiu Iesu e kona ni kainaomataira man bukinakira ibon iroura, bwaai aika aki eti, ao kantaninga aika kairua n nanon raoi te kororaoi. Te atatai anne ti kona iai ni kanakoa te maaku n te aki kororaoi—ti maaku bwa ti karaoi kairua, ti maaku bwa ti aki tau, ti maaku bwa taan kabwaka ngaira ni kabotauaki ma tabeman, ti maaku bwa ti aki tau ni karaoi mwakuri aika raraoi ni karekea Ana tangira.
Ana tangira te Tia Kamaiu are e reke man ana mwakuri ni kamaiu e buokiira ni kona riki n ikabwarabure ao n aki momotiki taekaia tabeman ao bon ngaira. Te tangira e kamaoa ara reitaki ao e anganiira te tai n tangira, n ota, ao ni beku n aron are e na karaoia te Tia Kamaiu.
Ana tangira ni kamaiu e bitii ara iango n te kororaoi. Ti kona ni katikui ara onimaki Irouna, kawakin raoi Ana tua, ao n reitinako inanon te onimaki (tara Motiaea 4:6)—ai arona naba ngkai ti namakina te nanorinano ae korakora, te kakaitau, ao n inaomata n Ana mwakuri aika raraoi, nanoanga, ao ana akoi (tara 2 Nibwaai 2:8).
N iangoana ae tabangaki, rokom nakon Kristo ao ni kakororaoaki Irouna e karekea te kororaoi bwa mwakoron te rikirake ae akea tokina n tamnei ao rabwata—ni koauana, mwanangan tamneira ae akea tokina (tara D&C 88:15). Te riki ni kororaoi e reke man te mwananga rinanon te maiu n rabwata, te mate ao te manga uti ngkana a bane ni kaokaki bwaai ni kabane “nakon aroia ni kororaoi” (Aramwa 40:23). E rin naba karaoan te bungiaki n tamnei, are e uota “te bitaki ae korakora” iroura ke inanora (Motiaea 5:2). E kaota itiakin maiura imwin kaitiakan maiura rinanon ana mwakuri Kristo ao n ongotaeka nakon ana tua nako te Tia Kamaiu ao ara berita aika tabu. Ao e ata kakororaoan te reitaki imarenaia aika maiu ao ake a tia ni mate (tara D&C 128:18).
Te taeka kororaoi, n taraakina, n tabetai e kairuruaki ma akean karaoan te kairua. Tao ngkoe ke temanna ae ko kina, e kabanea korakorana bwa e na kororaoi n te aro aei. Ibukina bwa te te kororaoi n tainako e tara n aki kona n reke, tao bon ara kabanea ni kona e kona ni kaingaingaira, kabwarai nanora ke ni kakuaira. Ti aki kona n tokanikai n ara waaki nako ao aomata ake irarikira. Ti un n mamarara ao n ara kairua. Ma ni koauana, ngkana ti kabanea ara kona ni kataia, e na raroa riki n reke iroura te kororaoi are ti ukoukoria.
Tera are imwiina, I kataia ni karakaa ara kakaitau ibukin te reirei n ana Mwakuri ni Kamaiu Iesu Kristo ao ibukin te tangira ao ana nanoanga te Tia Kamaiu are e anganiira n akea boona. I kaoi ngkami bwa kam na katai otami n reiakina te Mwakuri ni Kamaiu bwa e a onga ni buokiko ibon iroum ao tabeman, n ikotaki ma mitinare, ataein te reirei, ikawai ake a tuai n iein, karo, tina, naake aki iein ake a riki bwa atuun te mweenga, ao tabeman ake tao a namakina te kairoro ni kakaea te kororaoi ke te tamaroa.
Ana Mwakuri ni Kamaiu Iesu Kristo
E a tia ni katauraoaki man moan karikan aonaaba (tara Motiaea 4:6–7), ana mwakuri ni kamaiu ara Tia Kamaiu e karekea nakoira te reiakinaki, te rairannano, ao n rikirake rinanon ara taneiai ao ara rinerine.
Inanon te kataaki n rabwata, a uaia n airi “te reirei iaon te reirei” (D&C 98:12) rikirake n te maiu n tamnei ao ni karekea te “bitaki ae korakora” n te nano (Aramwa 5:12, 13; Motiaea 5:2) taneiai n tamnei e buokiira n nakon Kristo ao ni kakororaoaki irouna. Te taeka ae kinaaki “teimatoa ni ua te toki” e kauringiira bwa te rikirake ae akea tokina e uaia n airi n tabetai te tai ma kanoana.
N te mwakoro ni kainiin n ana Boki Moomon, te burabeti ae korakora ae Moronai e reireiniira bwa e na kanga arora n nako Ina ao ni kakororaoaki inanon Kristo. Ti “kakea [mai iroura] bwaai ni kabane aika tiaki aron Atua.” Ti tangira te Atua ma [korakorara] ara iango ao marurungira.” Ao ngkanne e na tau ana Akoi ibukira, “bwa man ana akoi [ti] kona ni kororaoi iroun Kristo.” Ngkana ti aki kakeaa mwaakan te Atua, ti kona ni “katabuaki rinanon Kristo man ana akoi te Atua, n ana berita are e tabu te Tama ibukin kamaunaan [ara] bure,” bwa ti aonga “n riki ni mimitong, n aki memea” (Moronai 10:32, 33).
N tokina, bon ana “kabanea n angakarea ae kakannato” te Tia Kamaiu are e uota te “nanoanga, are tokanikai iaon te motikitaeka, ao n uota te kabwaia nakoia aomata bwa a na kona ni karekea te onimaki nakon te rairannano” (Aramwa 34:14, 15). E koaua, ara “onimaki nakon te rairannano” e kakawaki ibukira n okira Kristo, ni kakororaoaki irouna, ao ni kukurei ni kakabwaia n te “babaire ni kamaiu ae korakora” (Aramwa 34:16).
Kabwaninan butimwaeakin ana Mwakuri ni Kamaiu te Tia Kamaiu e kona ni karikirakea ara onimaki ao n anganiira te ninikoria ni katikui ara kantaninga ake a tianiira ake kaanga a kainnanoaki bwa a na kanakoraoi bwai. Iango aika a kanganga ni bitaki e taekinna bwa bwaai ni kabane e na bon riai n kororaoi ke e na kabwaranano bwa e na uruaki. Ma ti kona ni kukurei ni butimwaia, ngkai natin te Atua aika mwane ao aine, bwa ngaira baina ni mwakuri aika korakora (tara Taian Areru 8:3–6; Ebera 2:7), e ngae n anne ao bon ngaira te karikibwai ae teimatoa n rikirake.
Ngkai ti ota n ana tangira ni kamaiu ara Tia Kamaiu are e anga n akea boona, e toki makura bwa E na roko n un, ni kakai kairua ao ni motikitaeka iai. N onea mwiina, ti namakina te karaunano, “bwa e aki kanakomaia Natina te Atua nako aon te aba bwa E na kabuakaka te aba; ma E kanakoamaia bwa e na kamaiuaki te aba i Rouna” (Ioane 3:17). Ao ti ataia bwa te tai ao kanoana a kainnanoaki ibukin te rikirake (tara Moses 7:21).
Ara Banna ni Katoto ae Kororaoi
Bon ti ara Tia Kamaiu ae maiuakina te maiu ae kororaoi, ao E reirei ao e rikirake rinanon te maiu n rabwata. Te koaua, e aki karekea bwaninna n te moan tai ma e reitinako man te akoi nako te akoi, ni karokoa ae e bwanin (tara D&C 93:13).
E reiakinna rinanon te maiu n rabwata n “uota iaona mamaaraia … bwa e na ataia ni kaineti ma te maiu n iriko bwa e na kanga ni buokiia ana aomata ni kaineti ma mamaaraia” (Aramwa 7:12). E aki taenikai n ana karirii te bure, ke kataaki ni katoabong, ma E karinanoi kataaki n te maiu n iriko ao kakaewenako (tara D&C 122:8).
N te kabwarabwara iaon te Maunga, e tuangiira te Tia Kamaiu: “Ma ngaia ae kam na moaniban te raoiroi” (Mataio 5:48. Te taetae n Erene ibukin kororaoi e kona n rairaki bwa “bwanin, tia, bobonga raoi” (n Mataio 5:48 kabwarabwaraana b). Ara Tia Kamaiu e tuangiira bwa ti na bwanin, tia, bobonga raoi—ni kororaoi inanon anua ni maiu aika tamaroa ngkai ngaia ao Tamara are i Karawa bon banna ni katoto n anua ao aroaro aika kororaoi.2
Tina noora aron karaoan nanon te reirei n te Mwakuri ni Kamaiu ae e na kona iai ni buokiia naake a namakinna bwa a riai ni kakaea te kororaoi ke n te tamaroa.
Kan Kororaoi
Te aki ota raoi n nanon te kororaoi e kona n reke iai te kan kororaoi—bon te anua ke te aroaro are e na mataiakinaki aron karekeana bwa te tamaroa e na kona ni bitia nakon te bwai ae aki kantaningaki n te kororaoi ngkai. Kan kororaoim n tabetai e riki man te namakin irouia naake a tangiria ni kororaoi a tatangiraki ke ti aki kona ni kukurei ni karokoa ti kororaoi.
Te kororaoi e kona ni karekea te nimatutu, nakonnano, tataonakin te tai, bwarannano, motikitaeka ibon iroum, ao te nanokawaki. Namakin aikai a kona ni kabirinakoa te rau, kukurei, ao te kamanoaki are e tangiriira ara Tia Kamaiu bwa ti na karekei.
Mitinare ake a tangiria ni kan kororaoi ngkai a kona n nakonnanno ke ni bwarannano ngkana a reiakina taetaen aia mition, noorakiia aomata ni bwabetito, ke karekean nakoaia n te mition n te nakoa ni kairiiri e aki kona n riki n te tai ae e waekoa. Ibukiia kairake ake a konabwai ake a taneiai n tokanikai, te mition e kona n riki bwa te moan kakaewenako ae korakora. Ma mitinare a kona n ongotaeka raoi n akean te kororaoi. A kona n noora aia tokanikai ti man kabaeakiia nakon tibwangaia n ibuokiia kain nako aia utu n “riki bwa membwa aika a kakaonimaki n te Ekaretia are a kukurei n raonakiia iroun te Tamnei ae Raoiroi.”3
Ataein te reirei ake a waaki n te reirei n te ririki ae boou, riki nakoia naake a kitani mwengaia ni kaei reirei ake a rietata, a kaitara ma te kukurei ao te raraoma. Ataei ake a wanawana, taan takakaro, taan korotamnei, ao a mwaiti riki aia waaki nako n riki bwa ai aron te “ika ae bubura inanon te nei ae uarereke” nakon namakinan te ika ae uarereke inanon te marawa ma airana ae aki taneiai iai ao ni betinako, n te aira ae korakora. E bebete irouia ataein te reirei aika iai irouia te kan kororaoi n namakina anne, n aki tabe bwa matoara aia kona, a tia ni bwaka ngkana aki moanna ni bwaai ni kabane.
N anganaki kairoro ake a kainnanoaki n te maiu, ataein te reirei a reiakinna bwa e na nakoraoi karaoan bwaai aika a konai, bwa e aki kona n riki n tainako ae a na riki bwa te kabanea n tamaroa.
Ti katei naba kantaninga n te kororaoi inanon mweengara. Te karo ke te tina e kona n namakina bwa e na riai n riki bwa te kainnaba ae kororaoi, karo, te tia tararua ao ni kaikawaia ataei n te mweenga, te tia kamwarakea ana utu, ke n riki bwa mwakoron aia utu aika a itiaki ni Bong Aika Kaitira—ngkai.
Tera ae e kona ni buokiia naake a kaitara ma te kan kororaoi? Anganiia titiraki aika ana kona n anga te boutoka ao ana tangiri kaeka aika koaua, kaeka aika a bwarabwara raoi e buokiia n ataia bwa ti tangiriia ao ti butimwaiia. Kaoia tabeman bwa a na iangoi bwai aika raraoi. A anganiira aron kabwarabwaraan ae ti namakinna ae e nako raoi. Utu ao rao a kona n totokoi kabotau aika kaiangatoa n onea mwiin te kaunganano ae nano.
Teuana naba anuan te kan kororaoi bon taumatoakia tabeman bwa a na maiuakina arona n aki kani kororaoi, motibuaka, ke kainibaire n aki ikabwarabure. Anua akanne a kona ni kakeaki ke n tiani taian kakabwaia n ana mwakuri ni kamaiu te Tia Kamaiu inanon maiura ao ni maiuia tabeman. Te katooto, ikawai ake a tuai n iein a kona ni karaoa te rinan n anua irouia buuia ake a na iein ma ngaia ma aki kona n iein ibukina bwa e aki koaua aia kantaninga ibukin te rao ae kororaoi.
Ngaia are te titita e kona n aki kukurei nanona n iangoa te maroro ae tamaroa, ma te tari ae nakoraoi ae tau ae aki roko n ana tikera ni kan kororaoi—e aki rang bwati n taenti, e aki baireia bwa e na kaubwai, e aki mitinare, ke butimwaea te kanganga are e a tia n riki mai imwaina n irekereke ma tamnei n tangako aio are e riai ni kaitiakaki rinanon te rairannano ao te maroro.
N aekan aio, te tari e kona n aki iangoa te maroro ae tamaroa ma te titita ae e itiaki are e aki rin n ana karinan are e tangiria—e aki tatangira te takakaro, te beretitenti n te Botaki n Aine, te ueanaine n tikiraoi, te tia kataumwane ae bane arona, ke e kaotia ae iai ana kanganga ma Tuan te Mauri ma e a tia ni kaitiakia.
Te koaua, ti riai n iango anua ake ti tangiri ibon iroura ao iroun buura are ti na iein ma ngaia. Ti riai ni kateimatoa ara kantaniga ae te kabanea n rietata ao kainibaire. Ma ngkana ti nanorinano, ao ti na mimi n aron tamaroan n tabo aika ti aki kantaningai, ao ti na kona ni karekea te tai ni kaan riki nakon temanna are n aekakira, e aki kororaoi.
Te onimaki e butimwaea are, rinanon te rairannano ao mwaakan te Mwakuri ni Kamaiu, mamaara e kona ni kakorakoraaki ao rairannano ni koaua e kona ni kabwaraaki ana bure.
Mare aika kakukurei tiaki te kanganga irouia aomata aika uoman aika kororaoi ake taekin aia berita. Bon, te kabaeaki ao te tangira ae rikirake nakoia aomata aika uoman aikai aika aki kororaoi ma a kataia ni mwakuri korakora bwa aonga n reke irouia te kakabwaia, ibuobuoki, kaunga, ao ikabwarabure inanon kawaia. Buun te burabeti ae ngkai e titirakinaki n te taina bwa aekakira aron te iein ma te burabeti. E kaeka ma te wanawana bwa e aki mare ma te burabeti, e bon mare ma te mwane ae bane nanona ma ana tai nakon te Ekaretia n aki tabe ma te wewete are e karekea.4 N taekana teuana, ni wakin te tai, buumwane ao buuaine a uaia n rikirake—temanna ma temanna n aroia taanga.
Te tataninga ibukin te kainnaba ae kororaoi, te reirei ae kororaoi, mwakuri ae kororaoi, ke te auti ae kororaoi e na riki n abwabwaki ao ni kamaroa. Ti wanawana ngkana ti ira te Tamnei ni karaoan babaire aika kakawaki ao n aki kariaia te nanououa n ara kan kororaoi bwa e na totokoa rikirakera.
Ibukiia naake a namakina te rawawata ae reitinako ke te raraoma, bon titirakiniko iroum, “I kabwaranakoa kororaoi ao tokanikai man ana reirei te Tia Kamaiu n ana tangira ni kamaiu ke man ana kainibaire te aonaaba? I ana abwakin te tokanikai ke kabwaka iroun te Tamnei ae Raoiroi ni kamatoa nanou n etieti ke tao man ana kainibaire te aonaaba tabeua?“
Ibukiia naake a namakina te kua n tamnei ke n rabwataia, moana ni karekea te matu n tainako ao te motirawa, ao karekea te tai n amwarake ao n rau. Kona ataia bwa te aro n tabetabe tiaki aron ae tau, ao te aro ae tau e aki kannanoa te kororaoi.5
Ibukiia naake a kona n noori kabwakaia ke nakobuakaia, bukamarua ao kakaitau n aron bwaai ake ko karaoi aika nakoraoi, e aoria ngke e bubura ke e uarereke.
Ibukiia naake a maaka te kabwaka ao ake a tataona aia tai, n tabetai man taonakon aia katauraoi, kakoaua ao kaungaa bwa akea kainnanoan te bubai man mwakuri ni kakaewenako ake a kona n uota te rikirake ae korakora!
Ike e kainnanoaki ao riai, n ukoukora ana reirei te tamnei ke ana nonori taan kuakua aika mwaatai ni buokiko bwa ko na rau, karikirakea te kawai ae ibuobuoki n iangoa ao ni katea maium, kakerikaka te anua n taenikai ibon iroum, ao ni kataneiaiko ao kabatia riki te kakaitau.6
Te aki tataonannano e kawaeremwea te onimaki. Te onimaki ao tataonannano e na buokiia mitinare bwa ana waekoa n ota n te taetae ae boou ke te katei, n aroia naba ataein te reirei ana waekoa naba ni mwaatai iaon bwaai aika boou, ao kairake n ikawai aika tuai iein a waaki ni katea aia reitaki nakon ae a tataninga ibukin bwaai ni kabane bwa a na kororaoi. Te onimaki ao te tataonannano e na ibuobuoki naba nakoia ake a a tataninga te kabaeaki n te tembora kaitiakan ke manga kaokan te kakabwaia n te nakoanibonga.
Ngkai ti mwakuri ao tiaki ae a karaoaki mwakuri nakoira (tara 2 Nibwaai 2:14), ti kona ni maiuakina te maiu ae baeranti ae tamaroa. Aikai a kona ni kaoti inanon te “kaitara,” n riki bwa ti teuana te rabwata” (2 Nibwaai 2:11).
Ibukin te katoto, ti kona ni katoka te taningaroti (tara D&C 88:124) bwa e aki katauaki bwa e na kabirimwaaka riki te aomata nakon are riaon korakorana (tara Motiaea 4:27).
Ti kona n ingainga ni kabaeaki ni bwaai aika a raraoi (tara D&C 58:27) ao ti kona naba inanon te tai n “tei moa ao kam na atai ba te Atua Ngai” (Taian Areru 46:10; tara naba D&C 101:16).
Ti kona ni karekea maiura man kabuaan maiura ibukin te Tia Kamaiu (tara Mataio 10:39; 16:25).
Ti kona n “aki toki ni kakaraoa ae raoiroi” (D&C 64:33; tara naba I-Karatia 6:9) ngkai ti karekea te tai ni manga kabowi maiura n tamnei ao n rabwata.
Ti kona ni kabebeteaki nanora n aki kabebeteaki ara iango.
Ti kona ni kaai ni ngare ma temanna ma n aki bwainingarea temanna.
Ara Tia Kamaiu ao Ana Mwakuri ni Kamaiu e kaoira n “nakon Kristo, ao ni kakoroaoaki irouna.” Ngkai ti karaoa aio, E berita bwa Ana akoi e na “tau ibukim, bwa man ana akoi ko na kona ni kakororaoaki iroun Kristo” (Moronai 10:32).
Ibukiia naake a karawawataaki man tabeakinan kakaean te kororaoi ke ni kakororaoaki ngkai, ara Tia Kamaiu e anga ana tangira ni kamaiu ni kamatoa nakoira:
“Bane mai nako Iu ngkami akana kam kua ao kam rawawata ao N na motiki rawami.
“… Bwa e aoraoi amou ao e bebete uotau” (Mataio 11:28–30).7