Karokoan te Moanrinan n te Mwenga
Ti Riki bwa Kaain te Ekaretia rinanon te Bwabetito ao te Kamatoaki
E maeka te tia korokaraki i Utah, USA.
Reiakina riki taekan ana boto n iango te Moanrinan n te namwakaina aio!
E okira mweengana Mariela man te reirei ma te matanokunoku ni matana. “Tera te bwai ae riki?” E titiraki tinana ngke e tabe n uniki uee inanon te onaroka.
“E berita nakoiu Sonia bwa e na takakaro ma ngai, ao imwiina ao e a manga aki,” E taku Mariela. E kawaekoa n tekateka ma te rawawata iaon te bareka iaontano irarikin Tinana.
“Kabwara au bure,” e taku Tinana. “E kakawaki kakawakinan taian berita. N te wiiki ae e na roko ngkana ko a bwabetitoaki ao ni kamatoaki, ko na karaoi tabeua berita aika rang ni kakawaki, a aranaki bwa berita aika tabu.”
“E koaua?” E titiraki Mariela. E kukurei ni bwabetitoaki.
E katukui tabeua uee i aontano tinau. “Ko berita bwa ko na kawakin tuua. Ko berita naba bwa ko na katokaa aran Iesu Kristo iaom. Tera ana berita te Tama are i Karawa ngkana ko karaoi bwaai aikai?”
E iangoa te bwai are e reiakinna Mariela n te Moanrinan. “Bwa N na karekea irou te Tamnei ae Raoiroi.”
“E eeti anne,” E taku tinana. “Ko na riki naba bwa kaain ana Ekaretia Iesu. Ko na kanga ni kawakina am berita n iri nanon tuua?”
“I kona n akoi, ao I kona n taekina te koaua,” e taku Mariela. “Tera nanon ae N na katoka aran Iesu iaou?”
“Nanona bwa ko na kataia n riki n ai arona ao ni karaoa are E tangiria bwa ko na karaoia,” E taku tinana. “Tera ae ko na karaoia bwa ko aonga n riki n ai aron Iesu?”
E minominota te uee ae beeboo Mariela imarenan tabon baina. “I kona n tekateka ma te ataeinaine ae boou n te reirei. Ao N na kataia bwa N na raoiroi nakon Sonia,” e taku.
“Akanne iango aika nakoraoi,” e taku tinana. “Ao ngkana ko butimwaea te toa, ko kona n uring am berita.”
E wingare Mariela. “I ataa teuana riki te berita—n teboteboki uee n te ran bwa e aonga n reke ara onaroka ae tikiraoi!”