Ko Kamaiua Au Mare

Neil S. Roy, Yorkshire, England

Ngke I karaoa te mwakuri ni kateitei i Oman man 1979 nakon 1986, I mwakuri ibukin te botaki n tautia. Ana tabo ni mwakuri te Tautaeka aio e anganai karikirake ake a mena ni mwakoro ake e kanganga te roko iai n te aba, ao ni mwaitin te tai bon tii ngai te mataniwi ae e tararua te karikirake. Bon tii ngai te membwa n te Ekaretia ni mwakuri n te aobiti aei.

N te bong teuana ni kautuun ara kambwana, I kaitibo ma te intinia n te iti are, e a tia n tai aika a nako ni kabuakaka te Ekaretia. I taobarai ana rongorongo ibukina bwa I mena n te etekuata n te tai ae uarereke imwain ae I nakon te mwakuri ni karikirake are teuana.

Imwiina, e ngae n anne, te aomata aei e katabeaki bwa e na tuoi mwakuri n te iti ni karikirake ake a tia ni kateaki iaon tian Oman ao Yemen. Ti baireaki bwa ti na kabanei tabeua aoa n ikotaki imwain ae tina manga kiba n oki nakon te etekuata.

Ngke e roko, e tuoa te mwakuri ao bwai ni kabane ake e kunei a bootau ma nanona. Inanon ara tai n ikotaki, I kabotoa ara maroro iaon te mwakuri ao imwiina I katoka n te kaa nakon te marae ni kabo ma ngaia.

Bon tain te angibuaka te tai anne, ao te marae, are e mena n iteran te maunga 6,000 te buti (1,830 te mita) i etan Marawan Inria, e rabunaki n te nang. E na bae n taonaki kiban raou ni mwakuri.

E tata buroou ngke I a ataia bwa Nna tataninga inanon te kaa ma te aomata aei. Imwiin au tataro inanou, e roko te iango n au iango bwa Nna titirakina te mwane aei taekan ana utu, riki kainnabana.

I karaoa anne, ao te intinia aio e waekoa n tinako ranimatana, n taekinna bwa e a tibwa karekea te rongorongo bwa kainnabana e tangiria n raure. Te taeka tangira e waekoa n roko n au iango, ao inanon uoua te aoa ake imwiina ao ti maroroakina taekan te tangira are e na riai n iai iroura nakoia tabeman ao ana tangira te Uea Iesu Kristo ibukira ni kabane. Imwain are I ataia, tia riki bwa rao ngaira. Ngke e moti ara maroro, ao akea bwa e a itiaki te nang ao e toka ni baona te intinia. N te tai ae waekoa I ongo bwa e buuta arana man ana mwakukri ao e okira mweengana.

Tabeua te ririki imwiina ngke ti kaembwa ma te Nakoanibonga n te Aaron irouia kairake ni mwane i Plymouth, te kaawa i Engiran ae mena i meangin taari, I noora te mwane ae e kaineta kawaina nakoiu. Ngke e a kaan, e taku, “E a era kanga I bon taku bwa ngkoe, Neil.”

Bon te intinia n te iti mai Oman. Te taeka are imwina ake e taekin e tiku inanou: “Ko rabwa ibukin am maroro nakoiu ibukin te tangira n te bong arei iaon te maunga. Ko kamaiua au mare, ao I kukurei n aki toki.”

Ti tibwai tabeua ara maroro, ao imwina e nako naba. I aki manga nooria imwiina.

I kakaitau n tainako ibukin te namakin are I karekea i Oman. E kakabwaia te intinia ao e anganai te korakora ni kawakina au koaua n te Ekaretia ngkana I tiku tii ngai ao n raroa man mwengau.