E Kaeka Au Titiraki Nibwaai

Judy M. Smith, Kansas, USA

I bungiaki inanon te Ekaretia, ma aki rangin n roroko au utu ngke I a ikawai rake. E ngae n aei, I aki toki ni karekea angau n nako n taromauri bon irou. Ni moan 1970 I beku bwa te tia reirei n te tieminari i Pittsburg, Kansas, USA. Ngke ti kamatebwaia Ana Boki Moomon, I kaoia kaain te kiraati—n raonaki ma ngai—bwa ti na wareka te boki ni kabane. N te bong teuana ngke I wareware, I karekea te kakoaua ae moan te korakora bwa e boni koaua.

Tabeua te ririki imwiina a roko au karo ibukin te kakawari. Ngke a roko, tamau e uotirake tabeua bwaai ake ti aki boraoi iai ae I aki tangiria ni maroroakinna ma ngaia. E reitianako, ni karokoa ae I a kan un. I kitanna teutana te tai ao n nakon au ru ni matu, ike I katorobubua iai ao n tataro nakon te Tama are i Karawa ao ni Bubutia ibukin te ibuobuoki ni kaineti ma au reitaki ma tamau. E roko te kaeka ni kanga te iango: rongorongon Nibwaai ao te kainikatebe ae uruaki.

I nakon te karaki n te 1 Nibwaai mwakoro 16. I iangoa Nibwaai ngke e rangin n taotaona nanona n nakon tamana, are e a tia ni ngureakina te Uea, n titiraki bwa e ngaara te tabo are n na nako iai ni karekea te amwarake (tara te kibu 23). Ma te iango anne, I namakinna bwa N na nakon tamau ao n tuanga ibukin ana kairi n raonaki ma te kakabwaia n te nakoanibonga.

Ngke I oki nakon te ru ni matu ao n tuanga Dad ibukin ana kakabwaia, e ringaki nanona n te nanokawaki ao e moanna n tang. “Kariaia bwa N na iangoia,” e taku.

Inanon tabeua boong ake imwiina e n aki mamatam ao n tataro. Ngkanne, imwain ae nako Tamau ao Tinau, e anganai te kakabwaia ae tikiraoi.

Imwin te mwakuri anne, e moanna Tamau ni karaoi bitaki ni maiuna aika raraoi. Iaon kawaia n oki mai Kansas, au karo a kawara Adam-ondi-Ahman, Missouri, USA, ike e karekea ana atatai tamau ae moan te korakora iaon te tamnei.

Inanon te tai ae uarereke, au karo a riki bwa aomata Aika Itiaki ni Boong Aika Kaitira aika kakaonimaki ao ni korakora nanoia. Inanon ririki aika imwiina riki, a uaia ni karaoi uoua aia mition—teuana i Tiaman ao teuana n te Tembora Tikuea i Salt Lake City. Tamau e riki bwa ana tamanuea te titeiki ngke e mate n te 1987.

E ataia te Uea bwa Tamau bon te mwaane ae tamaroa. Bon rinanon ana Boki Moomon ngke I karekea te kaeka, ao bon rinanon au mwakuri n te wirikiriki anne bwa Tamau e ataia bwa e na riki bwa te tia kairiri ibukin ara utu. Te atatai aei e biti bwai ni kabane ibukira.

I a tia n reiakinna bwa ana Boki Moomon bon te kakoaua teuana ae koaua ibukin Iesu Kristo ao are e koreaki ibukin ara bong. I ataia bwa I kona n rairaki nako iai n tainako ngkana e roko irou te bwarannano man aekan kangaanga nako. Te kaeka ae ti kainnanoi a mena inanon ana Boki Moomon.

Ni koauana, ana “[tuangira] ana taeka Kristo bwai aika [ti] riai ni karaoi” (2 Nibwaai 32:3).