Beku n te Ekaretia

Kairiiri N Aron te Tia Kamaiu

Iroun Ryan Carr

Ana Maekatin te Ekaretia

Te Aine ae Kamaiuaki, iroun J. Kirk Richards

Iai te kaokoro ae matata imarenaia taan kairiiri aika buakaka n te aonaaba ao te tia kairiiri ae raoiroi, te Tia Kamaiua te aonaaba. E kamatata Beretitenti Spencer W. Kimball (1895–1985): “Taan kairiiri akanne inanon te rongorongo ake e rang ni korakora aia kairoro iaoia aomata ibukina bwa akea teutana irouia anuan Iesu Kristo. Bwa ngkai e aki tii tabeakinna i bon irouna Iesu, a bon tabeakinia i bon irouia. Bwa ngkai Iesu e tabeaianga ma te inaomata, a tabeaianga ma te kairiiri. Bwa ngkai e tabeaianga Iesu ma te mwakuri n ibuobuoki, a tabeaianga ma te nakoa. Bwa ngkai e tabeakin raoi kainnanoia tabeman Iesu, a tabeaianga ma tii oin kainnanoia ao baike a tangiri. Bwa ngkai e tabeaianga Iesu ma rikirakeia ana reirei, a ukoukora anaakin nanoia aomata. Bwa ngkai e kaonaki Iesu ma te nanoanga ni baeranti ma te motiraoi, a kaonaki n angin te tai ma te takutaku ao te motibuaka.”¹

N tokanikai n aroia taan kairiiri n ana Ekaretiea te Uea, ti riai n ira Ana katoto. Iango aika imwina a kona ni buokiko n riki n aron Kristo inanon ara kairiiri.

Taan kairiiri n aron Kristo a beku “ma mataia ae kaineti nakon mimitongin te Atua” (tara D&C 4:5), n ukoukora karaoan ana kantaninga te Tama are i Karawa. E taku te Tia Kamaiu, “I ruo mai karawa, tiaki i bukin te karaoa oin nanou, ma bon i bukin te karaoa nanon Teuare kanakomaiai” (Ioane 6:38).

Taan kairiiri n aron Kristo a aki katoka aia onimaki iaon “te iriko” (2 Nibwaai 4:34). A tataro ma te nanorinano ibukin te kairiiri. A tataninga te Uea ao n ukoukora karaoan Ana mwakuri n Ana tai ao n Ana kawai n oneamwin onimakinan oin aia tarena ao aia konabwai.

Taan kairiiri n aron Kristo a aki ukoukori nakoa n te Ekaretia; a tarai wewete bwa taai ni beku, tiaki n aron te karikirakeaki. Ao a aki iangoa te kamotirawaki bwa te kakeerikakaki. Te kamotirawaki e roko bwa mwakoron wewete ni kabane.

Taan kairiiri n aroia tooro; a ibuobuoki, a reirei, ao a kaungaia naake a beku ibukia. A ukoukora kakabwaiakia tabeman, n aron are e karaoia te Tia Kamaiu: “Bon akea te bwai ae kakaraoia ma ti bwaai aika a na kawaaka te aonaaba” (2 Nibwaai 26:24). A iangoiia i bon irouia bwa a na tia tei te Uea ni buokia tabeman bwa a na oki Nakoina.

Taan kairiiri n aron Kristo a ukeuke ni karikirakea aia ibuobuoki ibukia tabeman. E reirei Beretitenti Kimball:

“Iesu e onimakinia taan iriiria n tibwaua ana mwakuri ma ngaiia bwa aonga n rikirake. Ane teuana te kabanea ni korakora n reirei ibukin te kairiiri. Ngkana ti aki kariaia ni kan buokia tabeman n te aro bwa e aonga n tia te mwakuri n ae waekoa riki ao n ae nakoraoi, e na taraa n nakoraoi tian te mwakuri, ma akea te rikirake ke te keerake irouia taan iriiri anne ae kakawaki riki. …

“Iesu e angania aomata taian koaua ao aia mwakuri ake a boraoi ma aia konabwai. E aki tautaekania n riaon ae a kona ni karaoia, ma e angania ae bon tau ni karikirakea maiun tamneia.”²

E kabwarabwara te Burabeti Iotebwa Timiti bwa e kanga ni kairiia raoi aomata: “I reireinia reirei aika aeti, ao a bon tautaekania i bon irouia.”³ Aei kakawakin ana kawai te Uea ni kairiiri.

Bwaai aika a na taraki

1. Spencer W. Kimball, “Jesus: The Perfect Leader,” Ensign, Aokati 1979, 7.

2. Spencer W. Kimball, “Jesus: The Perfect Leader,” 6.

3. Reirei mairouia Beretitenti n te Ekaretia: Iotebwa Timiti (2007), 211.

4. Teachings of Presidents of the Church: Lorenzo Snow (2012), 151.

5. Taraa Thomas S. Monson, “Duty Calls,” Liahona, Turai 1996, 42.

“Ma I Tuai n Taneiai n AronTe Waaki ni Kairiiri!”

Tai raraoma ngkana ko tuai n rinanon raoi anne. Ko a tia ni weteaki man ana kairi te Tamnei, mairoun te aomata ae iai irouna te kariaiakaki (taraa Reirein te Onimaki 1:5). Te Uea e ataa am konabwai. Weteam ni kairiiri e kona n riki bwa am tai ni karikirakei korakoram ao n tokanikai iaon mamaaram.

Inanon te bitineti ao botaki tabeua, a na reirei te tia kairiiri ao ma ana taneiai bon kariaiakam aika kakawaki, ma ana kawai te Uea e bon kaokoro. E reirei Beretitenti Lorenzo Snow (1814–901): “[Taian] abotoro ake a weteai mairoun te Atua, are Iesu, are a weteaki iroun natin te Atua, … a bon aki reirei; a aki ota n te tiaientit, a aki tau nakoa aika rietata i Iutea—a kabi ni wareware ao ni koroboki; nakoaia ae nanorinano inanon maiuia. … Eng, ngkanne, te Uea e kaokoro. E kaokoro Ana wewete ma wewete ake a karaoaki irouia aomata.”¹ Ma tetekeraoi, bwa are E weteia te Uea ao e rang n tau Irouna!²

Ibukia Taan Kairiiri Ake a Reirei ma Membwa n te Ekaretia

Ngkai ko kaitibo ma kaain te Ekaretia ake a kainnanoa am ibuobuoki, a na bae n tangiriko bwa ko na buoka aia kaangaanga. Ma ni karaoakina e na tuuka rikirakeia ae onoti. A na bae ni kantaninga te kaeka ae waekoa, a na tangira te tai ae bati ni mwakuria aia kaangaanga. Iai tabeua kakaewenako aika kinaaki. Titiraki aika imwina, aika baireaki irouia taan kairiiri n te nakoanibonga, a kona ni buokiko ngkai ko katauraoi n reirei ma membwa:

• Ko reirei ao ni buokia membwa n te kawai are a na tokanikai iai iaon kakaewenakoakia are e tiku bwa mwiokoaia?

• Ko kairiia membwa ni kakaei aia kaeka i bon irouia?

• Ko ririmwin taian mwakuri ake a butimwaai ni karaoi?

• Ko buokia ni karekei bwaai n reirei ake a na buoka iai oin aia kaangaanga?

• Ko kaungaia bwa a na tataro nakon te Uea?

• Am reirei e kaungaia membwa bwa a na rikirake?

E koaua, kaangaanga ni kabane a kakaokoro, ngaia are e kakawaki bwa ko na iriira ana kairiiri te Tamnei. Te beku ma te tangira, tataonakinnano, ao te kakanamakin n te maiu n tamnei e na kairiiri nakon uaa aika raoiroi.