Rongorongo man te Moan Beretitentii
Te Berita ni Karairaki Naano
E rikirake tinau, Mildred Bennion Eyring, n ana botanaomata n uniuniki ao ni kawakiniman Granger, Utah, USA. Roy, temanna mai buakoia mwaanena, e toua mwiia ana utu ni karikirakeia tiibu. Ngke te teeinimwaane ngaia e bane mwaitin wiki aika bati ni kitanan mwengana. N aroarona aio, e riki iai ni mamaara nanona n te Ekaretia. N tetaina e a mwaing nako Idaho, USA, e iein, ao e karikiia teniman natina. E a mate ngke 34 ana ririki ngke ai tibwa 28 ana ririki buna ao natiia a uarereke.
E ngae ngke ana utu Roy ae karako aei a mena i Idaho ao tinau e mwaing nako New Jersey, USA, tao 2,500 te maire (4,025 km), e katoatai ni kororeta n tangira ao ni kaungaunganano nakoiia. Ana utu ai au karo e atoatonga tinau ma nanona n tangira bwa “Aunt Mid.”
Ririki aika bwakanako, ao teuana te bong e roko te tarebon nakoiu mai iroun temanna ai tariu. I tuangaki bwa e a mate bun Roy. E taku ai tariu, “E tangiriko Aunt Mid bwa ko na ataia.” E a maan n tia ni mate Aunt Mid, ma e bon namakina ana tangira ao e a karoko irou n tuangai.
I iangoa taekan mwaitira are e a tia ni karaoia tinau n ana utuu are ti tearona ma wakiia burabeti n Nibwaite ake a karaoi n aia utu n tikuia ni kaan nakoiia aia koraki ake a tangiriia bwa a na ongo ana euangkerio Iesu Kristo. E korea teuana te rongorongo are e taku bwa e na anai nanoia natiia tarina nako n okira aia onimaki aia tamanuea, Riaai. A kaota te tangira ae ti tearona natin Motiaea mwaane n te tai are a taetaekina te euangkerio nakoiia kanoan Riaai.
E a tia te Uea n anganira kawai n namakina te tangira n utu ake a kona n reitinako n aki toki. Aomata aika a raa n te Ekaretia n te bong aei a nanamakin nanoia n rairakiia aia utu. A ukeukeri araia kaain aia utu ake a aki reke irouia te tai ni karekei otenantin te kamaiu n te maiu aio. A uoti aara akanne nakon te tembora. N te tai are a rin n te ran ni bwabetito, e reke irouia aia tai n namakina ana tangira te Uea ao kaain aia utu ake a kakaraoi onomwi n otenanti.
I kona naba n uringa te tangira ni bwanaan ai tariu are e wewete ao e taku, “E a mate tinara, ao e tangiria Aunt Mid bwa ko na ataia.”
Iroumi ake a karaoi otenanti ibukiia kaain aia utu a aenako n aia tangira, n aron ake a karaoi natin Motiaea mwaane ao te Nibwaai te burabeti. N aekaia, ko na namakina te kimwareirei ibukiia ake a butimwaea am anganano. Ko kona naba ni kantaningaia n namakina te rauaki ae takabubura ae ti tearona n aron Amon, are e taekina ana mwakuri ni mitinare ibuakoia kaain aia utu ake a kakironako:
“Ngaia are, ti na kakatonga, eng, ti na kakatonga iroun te Uea; eng, ti na kukurei, bwa e a onrake kimwareireira; eng, ti na neboa Atuara n aki toki. Noria, bwa antai ae kona n tau aron kakatongana iroun te Uea? Eng, antai ae kona n tau aron ana taeka ibukin korakoran mwaakana, ma ana nanoanga, ma ana taotaonannano i nanon te tai ae maan nakoiia natiia aomata? Noria, I taku nakoimi, I I aki kona ni kabwarabwaraa are e uarereke are I namakinna” (Aramwa 26:16).
I taekina au kakoaua bwa taian namakin n tangira are iai iroum ibukiia kaain am utu—bwa tao a mena ia—bon kakoroan bukin te berita are e na roko Eria. E bon roko. Nanoia naati a a rairaki nakoiia tamaia, ao nanoia taama nakoiia natiia (taraa Maraki 4:5–6; Joseph Smith—History 1:38–39). Ngkana ko namakina te tangira ni kakaaean araia am bakatibu ao n uoti aara akanne nakon te tembora, ko a nora kakoroan bukin te taetae ni burabeti arei.
Te kakabwaia te maeka n te tai ngkana te berita ni karairaki naano e a tabe ni koro bukina. E namakina te kairoro i nanona Mildred Bennion Eyring. E tangiriia ana utu tarina nako, ao e karoko nakoiia. A namakin nanoia n rairaki n te tangira nakon Aunt Mid ibukina bwa a ataia ae e tangiriia.