Tera Ae Ti Kakoaua

Ti Reirei man Mwaakan te Tamnei ae Raoiroi

Ti kakoaua bwa te anga reirei ibukin ana euangkerio Iesu Kristo man mwaakan te Tamnei ae Raoiroi e kakawaki ni mwakoron ana mwakuri ni kamaiu te Atua. Te anga reirei ae nakoraoi e buokia aomata ni karekea riki aia onimaki ae korakora ao nanoia ni maiuakina te euangkerio. Te anga reirei e kona n riki inanon taabo aika bati, n aron te anga reirei ke te maroro inanon te taromauri, ma ti reirei naba ngkana ti maroroakina te boki ae tabu ma kaain ara utu ke ngkana ti kabwarabwara nakoia kaain rarikira bwa tera nanon te nakoanibonga.

“E taku te Uea bwa taan tia reirei ibukin te aro aei a na anga reirei ibukin ana euangkerio, ake a mena inanon te Baibara ao ana Boki Moomon, are e mena inanona bwaninin te euangkerio.

“Ao a na ongeaba ni berita aika tabu ao bwain te aro ake a na karaoi, ao aikai a na riki bwa aia anga reirei, n aron are a na kairaki iroun te Tamnei.

“E taku te Uea bwa a na anganaki te Tamnei man te tataro n onimaki. E taku bwa ngkana a aki karekea te Tamnei a na aki anga reirei” (tara D&C 42:12–14).

Iangoi reirei aika aua aikai ibukin te anga reirei ae nakoraoi:

• Tangiria naake ko reireinia. Ko na kinaia. Tataromwaaka n iangoi kainnanoia ngkai ko katauraoi n reirei. Katai kabonganai aanga nako n anga reirei aika kakaokoro: ake a kaokoro a kona n roko irouia aomata aika kaokoro (tarai tabeua iango ake n te angatai).

• Reirei mairoun te Tamnei. “Ngkana e taetae te aomata ni mwaakan te Tamnei ae Raoiroi ao a uotaki ana taeka ni mwaakan te Tamnei ae Raoiroi nako nanoia natiia aomata.” (2 Nibwaai 33:1). Ngkai ko reirei, ko kona ni kaoa ana kairoro te Tamnei man kaotan am koaua ao man kabonganan booki aika tabu ao aia reirei burabeti aika maiu ni boong aikai. Tataro ibukin ana kairiiri te Tamnei ae Raoiroi ngkai ko katauraoi nakon te reirei. E kona n anaa nanom bwa ko na ataia bwa ko na kanga n reirei n te aro ae tamaroa.

• Reirei te tua. Karikiram aika a tia ni kariaiakaki man te Ekaretia, n aron booki aika tabu, taian maroro n te maungatabu ni kabuta, ao booki n reirei, ake iai inanon tua—koaua aika akea tokia mairoun te Atua.

• Kaoa te reirei ma te botumwaaka. Ngkai ko anga reirei, uringnga bwa naake a kakaungo a bon bukinaki ibukin oin kan reirenakia. Kaungaia bwa a na titiraki, a na tibwauai aia iango iaon te taobiki, ao iangoia raoi bwa a na kanga ni maiuakin reirein te euangkerio. Aia koaua ibukin reirei akanne e na rikirake ngkana a maiuakin. (tara Ioane 7:17).

Beretitenti Gordon B. Hinckley (1910–2008) e taetae iaon kakawakin te anga reirei ae tamaroa: “Te maiu ae akea tokina e na kaoti tii ngkana mwaane ao aine a reirei ma te korakora ngkai a biti ao a kairi maiuia. A aki kona ni kairoroia nakon te raoiroi ke n nako karawa. A riai ni kairaki, ao nanon anne te anga reirei” (taekinaki mairoun Jeffrey R. Holland, “A Teacher Come from God,” Ensign, Meei 1998, 26).

Ibukin rongorongona riki tabeua, tara Doctrine ao Covenants 50:13–22; Aeniboki 2: Bairean Waakin te Ekaretia (2010), 5.5.4.