Kaain te Moomon A Bon Kakoaua te Atua
E maeka te tia korokaraki i Chihuahua, Mexico
N te marae ni wanikiba ae raroa nako man mweengau, e reke au tai n tibwaua te euangkerio ma te ianena.
Kamatata n te korotamnei iroun Steven Keele
I mwananga mai Metiko nako Montana, USA, ao I tiku tabeua te tai i Denver, Colorado. I nakonako ni katobibia te marae ni wanikiba, n tataratarai tikun ao kiban wanikiba rinanon wintoo aika bubura. E nako nanou ibukina bwa I bon tuai ma ni kikiba mai mwaaina. E tara n rang ni bubura te marae ni wanikiba.
I tara au tiketi ao I nooria bwa ai tii uoua riki te aoa imwaain ae e nang nako baou. I baireia bwa N na kakaea te tabo ae N na tekateka iai ao ni wareware ni karokoa ae I toka n te wanikiba. I namakina te maaku ngkai I kakaea au tabo n tekateka. A kuri ni bane ni kebo kaintekateka. I baireia bwa N na tekateka irarikin te aine ae e a ikawai are e tara n tiku n tii ngaia. Bon tii ngaia are e tara n aki kakamaaku irou.
Teuana te aoa ke e nako riki I a baireia bwa N na taetae nakoina. I kabwarabwarai nakoina, e tara n tikiraoi ao n ingainga ni kan karakina nakoraoin ana kekeiaki tibuna. E titirakinai ibukin rongorongou teutana, ao I karakina nakoina rongorongon nako maiu i Metiko. Imwiina I a tangiria ni kan tibwaua te euangkerio nakoina. E titirakinai au aro, ao I tuangnga bwa bon te membwa Ngai n ana Ekaretia Iesu Kristo ni Boong aika Kaitira.
E taku neiei bwa e tuai man ongoongo taekana mai imwaaina.
I moangare ao n taku, “Ti kinaaki naba n arara ae te Moomon.”
E a bita kateina n te tai naba arei. Taraan moana ao tein ana taetae nakoiu a bitaki. E taraa n aki ataa te bwai ae e na taekinna. I kanamakinna bwa ara maroro e nang roko n tokina, ma I kataia ni kateimatoai n taetae nakoina. I titirakinna bwa tera ana aro. E kaeka ma te aki baenikai, “Ngai te Katorika.”
Imwiina e taku, “I aki oota. Bon te ataeinaine ngkoe ae ko tamaroa. Ko tararaoi. Bukin tera, ngkanne, ngkai ko a kan riki bwa te Moomon?”
I bon tounako n te taetae aei, ao I aki ataia bwa e na kanga au kaeka. I karaurau n tataro, ni butiia te Tama are i Karawa bwa e na buokai ni kamatata bwa tera nanon ae ko riki bwa te Aomata ae Itiaki. I tuanga neierei bwa I tangiria n riki bwa te membwa n te Ekaretia, ao ibukin reirein te euangkerio, I a kona n riki bwa te aomata ae raoiroi ao n tarai bwaai ma te kantaninga.
E tara ni miimi ao e taku, “Kaain te Moomon a aki kakoaua te Atua.”
I kataia n aki ngare n te taetae aei; n onean mwiina I moangare ao n nooria bwa aio au tai n tibwaua te koaua nakoina. I kamatatai tabeua aan ara koaua. I reireinna taekan te babaire ni kamaiu ao kakawakiia utu. E taraa n aki anaaki nanona, ngaia are I a baireia bwa N na kaota au kakoaua nakoina. Ikanne inanon te marae ni wanikiba ae bubura, I kakabwaiaki n ninikoriau n tibwaua au kakoaua ibukin Iotebwa Timiti, n taekan te burabeti ae maiu ao Abotoro, ao taekan te tangira are I namakinna ibukin te euangkerio ao n ana Boki Moomon.
I tara te tai. E a boo au tai ni kaea baou te wanikiba
Te bwakantaai anne e kakorakora au kakoaua n te aro are I tuai man noria mai mwaaina. I kukurei bwa I tibwaua au kakoaua ma ngaia ao ni kakaitau bwa I kona ni buokia ni bita ana iango ibukiia kaain ara Ekaretia. I a kona ngkai n onimakinai riki ngkana iai ae e titirakinai taekan te Ekaretia.