Beku n iai Bukiia aika Eti
E maeka te tia korokaraki i Paraguay.
Kamatata n te korotamnei iroun Alex Westgate
N 2011, I karaoa teuana mai buakon babaire aika rang ni kakawaki inanon maiu. E uoti kakabwaia nakoiu aika korakora aika I a tibwa karekei. I baireia bwa N na karaoa au mwakuri ni mitinare, ma tiaki te babaire ae bebete.
E anganai au tai te Uea ni kakukureiai n te butibooro inanon au tai n ataei ao ni kairake. I tei ibukin Paraguay ni kauaaban te aonaba, ni mwamwananga ma kaain au tiim ni butibooro ibukin te aba, Libertad, nakon aban Eurobe, Atia, ao Amerika Maiaki.
N tetekeraoiu, au karo a aki toki ni boota au waaki n takakaro ma te reirei ae riai ao te kaikawaaki inanon te maiu n tamnei. Ana onimaki ma ana koaua tinau boni ngaai raoi taian koraa ake a karikirakei au onimaki ma au koaua. Ibukin ana kakaonimaki, I iriira te tieminari n aki ongea katabetaben waakin au takakaro.
E ngae ngke I a tia n ongoongo taekan te mwakuri ni mitinare ae bwanin taina ma ngke I uarereke, I aki kona ni katiaa au iango ni karaoan au mwakuri ni mitinare. E bitaki anne ngke e a butimwaea te wewete tamau n riki bwa kaain te Bitiobiriki n ara uoote. Te babaire aei e boni matoatoa iroun tamau, ngkai bon iai rekerekena ma tabeu n te takakaro. E aki toki n iriira au kataneiai ao au kaboo n te butibooro, ao ti kaai ni kabanea ara tai. Ibukin aei, butimwaean te wewete n riki bwa kaain te Bitiobiriki nanona bwa e nang katoka ana tai ni boutoka au mwakuri.
N tain te bootaki n toa ngke e a kamatoaki tamau, e kaoti te iango ae tamaroa inanon au iango, n tuangai bwa aia anganano tabeman e na matebuaka ngkana I aki anga nanou nakon bwaai aika tamaroa n iai bukiia aika eti. N tain te kaoti koaua, iai temanna ae taetae iaon te iango are ngkana ti ongeaba, ara utu a kona n akea tokiia. E ringaki nanou n te iango anne, ao I baireia bwa N na karaoa are e kaineti ma korakorau n ikotaki ma au utu n aki toki. N tain te kiraati n te Tabati anne, kakawakin te ongeaba nakon tuua e taetaekinaki n angin te tai. Ngaia are e rang ni korakora namakinan ana wirikiriki te Tamnei ae I riai ni beku ibukin te Atua n tain te bootaki n utu n te tairiki, I tuangiia au utu ibukin au babaire ae N na nako ni karaoa au mwakuri ni mitinare.
Nanon au babaire bwa I riai ni katuka moa taekan au reirei n te kuura n ai aron naba kamatoakin au nimaua n ririki ni kaonturaeki ma au kirabu ni butibooro. Mai moan te waaki, e kauki mataroa te Uea ao e riingi naano bwa e aonga ni kamatoaki te kaonturaeki.
Imwiin kanakoan au beeba ni mitinare, I kakauongo n te maungatabu ni kabuta n Eberi 2011 ike Unimwaane Neil L. Andersen man te Kooram n Abotoro n te Tengaun ma Uoman e tibwaua te bwai are e rinanona Sidney Going, are e riki bwa te tia urakibi ae mwaatai ao te membwa n ana tiim n aba Nu Tiran. Te koaua are te Tari Going e karaoa ana mwakuri ni mitinare ao imwiina e a manga oki ao ni waakina nako ana mwakuri are e mwaatai iai are I a karekea te reirei mai iai. Rinanon au mwakuri ni mitinare ao ni karokoa raoi te bong aei, ni kakauongo riki nakon mwaitin te tai n te taetae anne e a tia ni kakabwaiai ao n uota te rau nako nanou. Koaua aika mwaiti ake a tibwauaki nakoiu mairouia te utu, membwa n te uoote, ao titeiki n taai aika bati a aki tii kakorakora au babaire ni kani beku ma a kamatoai n taai aika a matoatoa n au tai ni karaoa au mwakuri ni mitinare.
Teuana rakan kukureiu inanon maiu bon au babaire ni kan roko n te tabo ni mitinare are e a buokiia raoraou teniman ake I rang kinaiia ake a motinnanoa naba karaoan aia mwakuri ni mitinare. A beku imwiina bwa taan tia kairiiri n te tioun, ao taan ibuobuoki nakon te beretitenti n te mition, ao n nakon naba te beretitenti n te mwaanga. Iai matara ni katean kawaira are e na butimwaira ni manga okira iai mweengan te Tama are i Karawa.
Ti aki te aekaki n aomata Ngai n aron are teniua te ririki n nako. Nanou ae te kabanea ni korakora bon karaoan ana kantaninga te Uea. E kakabwaiaai te Uea “tebubua te tai” (Mataio 19:29). Iai au kakoaua ao e maiu ibukin mimitongin te Tama are i Karawa, Natina ae Tangiraki ao Ana Mwakuri ni Kamaiu, ao itiakin mwaakan Tamnein te Atua ae Tabu, ao te mwakuri ae kakuba ma ni kamiimi ni boong aika kaitira, ngke e a tia ni kaokaki te euangkerio nako aon te aba rinanon te Burabeti Iotebwa Timiti (tara Itaia 29:14).
E taorake nanou n te tangira ao te kakaitau ibukin te tai ae tabu aei ao n ataakiia ao tangirakiia tariu ma mwaaneu n te Uruguay Montevideo Mition. Tabeua kakabwaia a tara ni korakora n au tai ni beku ibuakoia. Bon akea riki te bwai teuana ae e a tia n anganai te kimwareirei ae korakora ao te rau ke n anganai kakai aika rang ni mwaiti ma tii inanon au tai n ibuobuoki ni mitinare.