Ngke I maroro ma raoraou ibukin taekan te Ekaretia, a taku bwa akea nanoia iai ibukina bwa e rang ni mwaiti ana tua. Tera ae N na kona n tuangiia?

Ara katei nakon “tuua” nako e mwaiti rekerekena ma ae ti tataneiai ni karaoia. Ngkana raoraom a taneiai n aki buburatin wiia ao ko tuangiia ae ko buburati ni katoa bong ibukina ngkai ko a tia n reireinaki iai, a na kunea aei bwa te tua ae kakua. Ma ko aki te roko n iangoia naba teutana ae aei bon te tua ibukina bwa e a bon riki bwa ai te anua, waakin te maiu. Ngke a tabe n iangoia bwa e aki te roko n reke aia tai ni buburatin wiia bon te aro n inaomata, ko na ataa te kaangaanga are e na kairiko nako iai ao a na tamaroara riki namakinan te wii ae itiaki man nakoraoi.

Titebo te kaangaanga ma “tuan” te Ekaretia. A bae n iangoia raoraom bwa kainibaire ake ti iri a boni matoatoa ma ko ataia bwa te Uea ma Ana toro a tia ni kanakoi nakoira bwa a na buokiira ni maiuakina te maiu ae raoiroi ao n oki nakon te Tama are i Karawa. N arona naba anne, te ongeaba nakon ana tua te Atua e uoti kakabwaia n taainako, are teuana mai buakona bon ana iraorao te Tamnei ae Raoroi. Ko kona ni kataia ni kabwarabwarai buoka ao kakabwaia aikai nakoia raoraom, ao ko na tuangiia bwa tii te kawai ni kan ataia raoi ngkana “tuua” aikai bon mairoun te Atua ti na kataia ni karaoi (tara Ioane 7:17).