Bukin tera e karikiira te Atua?

E kakawaki ae ti na ataia bwa te Atua e aki “karikiira” n te kantaninga are e karaoira bwa ti na aki riki man te aakea. Tabeua oin mwakorora a riki imwaain bungiakira n te maiu n tamnei: “A kaman maeka naba aomata ma te Atua ni moan karikan bwaai. Te wanawana, ke ootan te koaua, e aki karikaki ke ni karaoaki, ke ni koauana e aki kona” (D&C 93:29). Ibukina ngkai ti ataa aei, ti ataia naba bwa ana kaunganano Tamara are i Karawa ni karikakira e aki manennanti ke tii te tai ma bon iai bukina ni koaua. E reirei te Burabeti Iotebwa Timiti, “Te Atua i bon irouna, e kunea bwa e mena ibuakoia tamnei ao te mimitong, ibukina bwa e wanawana riki, e noora ae riai ni barongaan ana tua n te aro bwa ngaira ni kabane e na reke ara tai n rikirake n ai arona” (Aia Angareirei Beretitenti n te Ekaretia: Iotebwa Timiti [2007], 210; tara naba Moses 1:39). Ibukina ngkai e tangiria te Tama are i Karawa bwa e na reke ara tai n rikirake ao n riki n ai arona, E kariki tamneira, ao E katauraoa ana babaire ni kamaiu ao ni kakukurei are e irianaki ma te taneiai n te maiu iaon te aba. Tao, n arona anne, te kabanea ni bebete ao n tamaroa ni kaekaan te titiraki aei boni kaekaan naba bwa bukin tera te Atua e karaoi bwaai nako: ibukina bwa E tangiriira.