Ibukin Kakorakoraia Kairake
Mwakuri Antai ae Kainnanoia?
Te mwakuri e kona ni manga aki kaunga n tainako, ma kona bon bae ni mimi bwa e kona ni karekea te namakin iroum ae tamaroa.
Kamatata iroun Brian Call.
Ngke I kairake, I tatangiria n takakaro ao ni kakukureiai n aroia aomata nako. Ao ngke ai 16 au ririki, I tatangiria ni maroro ao n airiiri ma raraou. I tatangiri riki waaki akanne nakon te mwakuri.
Ma, n aroia aika a mwaiti ibuakomi, bon iai au mwakuri. Tamau e mwakuri n te bitineti ni kateitei, katei mweenga, ao n tabetai e weteia teniman tariu ao ngai bwa ti na buokia. Te mwakuri e kabueroro ao e ana te tai ae mwaiti; iai taai are ngkana ia bon aki kan mwakuri iai. Ma iai tokin ara tai are ti taua ao mwakuri ake ti na katiai, ngaia are ti mwakuri korakora ni katoa bong ni karokoa e tia te mwakuri. E ngae n anne, I aki ataia n te taina, mwakuriu ma te utu e reireinai reirei aika a mwaiti.
Te Raunnano e Roko man te Mwakuri ae Karaoaki Raoi
Katean te mweenga e tangira te tai ae mwaiti, mwakuri ao ni kaetaki raoi. N te tabo teuana are I taku bwa e aki kainnanoa kaetakina bon kenakin aan te auti. Au karo e kaokoro n iango.
Ni kawenean aan te kateitei ibukin te mweenga, te moan ko na kenna ao ni karaoa te kabwaro timanti. Te kabwaro bon timanti ake a rababa riki nakon aan te kateitei. N te tai are e tia te kabwaro ao ni kamwauaki, ko kabwaroa te timanti iaon te mwanono. Imwiina ko rabunna n te tano ni kaboraoia.
N tabetai I iangoia ngkana e bon riai bwa e na karauaki n tikueanaki timantin aan te kateitei. Are e na bon rabunaki n te tano, akea ae e kona n noria, ao e aki kamamara katean te auti. Ma tamau e bon tangiria naba n tikueana te timanti ao ni kaboraoia, n anaa raoi abwakina ao n taraia raoi bwa e karaoa aio nakon auti ni kabane ake e kataei.
N tanrikaki, I noria bwa tamau e karaoi bwai nako ake e karaoi n ana mwakuri ma te taratara raoi, aron naba bwai ake e aki kona n nori te tia bwaibwai. Anuana n taratara raoi nanona bwa e kona n onimakinaki irouia aomata ni karaoa te mwakuri ae tamaroa, ao e karekea te nanoraoi n ataakin ae ana mwakuri bon te kabanea n tamaroa ao te tia bwaibwai e na rang kakaitau iai.
E na reke te tai are akea temanna ma bon tii ngkoe ao te Uea ae ata tamaroan am mwakuri are ko riai ni karaoia. Motirawa ni kakoaua bwa te Uea bon ata am mwakuri. Ngkai ko karaoa am kabanea n tamaroa, ko na kukurei ibon iroum, n ataia bwa ko karikirakea te etieti, te onimakinaki, ao konabwai ae bongana.
Ko na reiakinaki inanon am taneiai kakaawakin ana tua te Uea ni kiniki ua: ba te bae e unikia te aomata, ao e na manga kana naba uana.” (I-Karatia 6:7; tara naba D&C 130:20–21).
Te Anua e Roti Bwai Nako
Kenakin aan te kateitei e kananonai, aoa inanon te kabuebue, ao Nna kaotia, I aki rang tatangiria. N te tai are e kuneai iai tinau ni meremere ibukin te mwakuri e na kangai, “Tarataraiko. Ko nang kabuai am kakabwaia, ao ane ko na bon mwakuri naba!” (Tara D&C 58:28–29.) E bon eti are e taekinna. Te meremere e aki kona ni kamwawa te mwakuri, e kanakoa te raunnano ao kakabwaia ni karaoakina.
I kunea bwa ngkana I rineia n ongo iroun tinau ao ni karaoi mwakuri ma te nano ae kukurei, te tai e baiti ni biribiri, te mwakuri e na tamaroa riki ngkana e tia, ao Nna rang kukurei riki nakon are mai imwaina ngkana I meremere. Te Anua e rooti bwai nako.
Te Mwakuri ae te Kabanea ni Kakawaki bon ana Mwakuri te Atua
Karaoan te mwakuri ni mitinare bon te mwakuri ae tamaroa irou. Ia tibwa ataia bwa akea riki te 3 mwakuri ae kakaawaki riki nakon ana mwakuri Tamara are i Karawa, are e na kakabwaiai maiuira. Ana mwakuri ao mimitongina bwa e na uota te aki mamate ao te maiu are akea tokina nakoia aomata (tara Moses 1:39).
Ngkai ko kabaeaki inanon ana mwakuri Tamara arei Karawa ni beku ibukiia Natina, ko na kunea, n aron are e kunea Aramwa, te kukurei ae korakora n riki bwa “N na kona n riki bwa te bwai ni mwakuri inanon bain te Atua bwa N na kairia aomata tabemwaang nakon te rairannano, ao aio kimwareire[iu] (Aramwa 29:9).
Te Kakao
Ngaia antai ae kainnanoa te mwakuri? Ngaira ni kabane! Bon te tina n toronibwai, barongaaki raoi, ao te kukurei n te maiu aei. Ngkai ko kakukureiko ni kabaeaki inanon te mwakuri, ni kabane ake a katobibiko a na karekea te ua ae korakora ibukin te kora are ko unikia.
Ngkai ko waki inanon am wiiki, I kaoko bwa ko na iangoa te reirei are I tia n reiakinna ao imwina kata aei: are imwiina ngkana ko anganaki te mwakuri bwa ko na karaoi, kabanea am tamaroa nako iai, karekea te anua ae tamaroa, ao nooria bwa tera ae e riki. Ko na bae ni mimi n aron kukureim ao tamaroan am namakin.