Ang Pagsunod sa Ebanghelyo Nagpanalangin sa Akong Pamilya

Pagkat-on og dugang mahitungod sa tema sa Primary karong bulana!

Unsa ang pipila sa mga panalangin nga gihatag sa Langitnong Amahan kaninyo? Ang pipila sa mga panalangin sayon ra nga makita, sama sa matahum nga kalibutan nga gilalang sa Langitnong Amahan o usa ka bag-o nga igsoong lalaki o babaye sa inyong pamilya. Apan usahay gikinahanglan ninyong mohatag og atensyon aron makabantay sa mga panalangin sa Langitnong Amahan. Niini nga istorya mahitungod ni Nephi, tan-awa kon makita ba ninyo ang mga panalangin nga gihatag kang Nephi ug sa iyang pamilya tungod kay sila misunod sa ebanghelyo. (Mahimo usab ninyong basahon ang istorya sa 2 Nephi 5.)

Ang Ginoo mipasidaan kang Nephi sa pagdala sa iyang mga katawhan ngadto sa kamingawan aron dili sila mapasakitan sa mga Lamanite. Si Nephi nagmasulundon. Iyang gipundok ang iyang pamilya ug ang tanan nga mituo sa mga pulong sa Dios. Sila mipanaw sa kamingawan sulod sa daghang mga adlaw. Sa katapusan sila mitukod og kampo ug misugod sa pagtrabaho. Nagtanum sila og mga liso, ug maayo ang pagtubo sa ilang mga tanom. Nagbuhi sila og daghang mga hayop. Mitukod sila og mga building ug usa ka templo, diin sila makasimba sa Dios. Si Nephi mitudlo sa mga katawhan gikan sa mga kasulatan, ug sila misunod sa mga sugo.

Si Nephi misulat nga ang iyang mga katawhan “mipuyo subay sa matang sa pagkamalipayon” (2 Nephi 5:27). Kana nagpasabut nga sila nagpuyo sa paagi nga nakatabang kanila nga magmalipayon. Kon kita magsunod sa ebanghelyo, kita makadawat og mga panalangin nga makatabang kanato nga magmalipayon.

Ang Templo ni Nephi, ni Michael T. Malm; paghulagway pinaagi ni Thomas Child