Abliha ang Imong Basahon ni Mormon

Eduard Mayer, Upper Austria, Austria

Isip sakop sa Stake high council sa Vienna Austria, magtambungan ko og usa ka ward sa Vienna kausa sa usa ka bulan. Tungod kay nagpuyo ko og 120 ka milya (190 km) gikan sa Vienna, kasagaran mosakay ko og tren aron makaabut didto.

Usa ka Dominggo, sa akong pag-abut sa balay gikan nagbisita sa ward, ako naguol sa pagkadiskubri nako nga wala na ang akong pitaka. Nabalaka ko tungod kay wala ko masayud kon nawagtang ba akong pitaka o kon kini ba gikawat. Sa akong pitaka ako adunay gamay nga kantidad nga kwarta, akong rekomend sa templo, credit card, ug ubang importante nga mga kard.

Pagkasunod nga adlaw naglisud ko sa pag-focus sa trabaho. Balik-balik ko nga nangutana sa akong kaugalingon, “Kanus-a nako katapusang gigamit ang pitaka? Gibilin ba kaha to nako sa usa ka dapit?” Gitawagan nako ang pulis, estasyonan sa tren, ug ang bishop sa ward nga akong natambongan. Walay nakakita niini. Nag-ampo sab ko, ug nagkakusog akong mga pag-ampo samtang nagpadayon ang adlaw. Wala ko kaayo nakatulog niadtong gabhiuna.

Panahon sa akong mga pag-ampo matag buntag, kusog akong pagbati nga ablihan akong Basahon ni Mormon aron makakaplag og tubag sa akong problema. Gibaliwala dayon nako ang pagbati tungod kay walay kasulatan sa Basahon ni Mormon nga may kalabutan sa akong nawala nga pitaka.

Ang pagbati nagpadayon: “Nganong nagduha-duha ka? Ang hugot nga pagtuo mag-una sa milagro! Ablihi lang ang basahon. Ang unang kasulatan nga imong basahon mohatag sa tubag sa imong problema.”

Gibaliwala nako kining pagbati kay kini imposible. Nagkakusog ang akong pagbati ug mihukom nga sundon kini. Ako mibarug, miadto sa akong lamesa, ug gikuha ang akong Basahon ni Mormon. Ang akong kasingkasing naghinam-hinam og maayo. Wala gyud ko mopakli og pahina. Simple lang nakong giablihan ang basahon ug gibasa ang Jacob 3:1: “Tan-aw ngadto sa Dios uban ang kalig-on sa hunahuna, ug pag-ampo ngadto kaniya uban sa hilabihan ka hugot nga pagtuo, ug siya mohupay kaninyo sa inyong mga kasakit, ug siya mohangyo alang sa inyong katuyoan.” Natandog ko og maayo ug dili na makapadayon sa pagbasa.

Ang Ginoo mohangyo sa akong katuyoan! Mitrabaho ko nga relaks ug nahupay. Alas-11:00 sa buntag nakadawat og tawag gikan sa pulis sa estasyunan sa tren nga nagpahibalo nako nga ang akong pitaka nakit-an. Usa ka adlaw ang milabay akong nadawat akong pitaka. Walay nawala.

Ang Ginoo naghupay nako sa akong mga kasakit. Siya mihangyo sa akong katuyoan. Pinaagi sa Basahon ni Mormon ang akong Langitnong Amahan mitubag sa akong mga pag-ampo sa usa ka direkta, personal nga paagi. Kanunay kong ganahan sa Basahon ni Mormon, ug pagkahuman niining kasinatian, kini nahimong mas bililhon alang kanako.

Panahon sa akong mga pag-ampo matag buntag, kusog akong pagbati nga ablihan akong Basahon ni Mormon aron makakaplag og tubag sa akong problema.