Aduna koy higala kinsa kanunay nga dauton ang iyang kaugalingon. Unsaon nako sa pagtabang kaniya nga mas maayo ang bation sa iyang kaugalingon?

Unsaon ninyo pagsulbad sa problema sa inyong higala mag-agad sa ka seryuso niini. Sama pananglit, siya tingali nagsaway sa iyang kaugalingon aron makita nga mapaubsanon o makakuha og pagdayeg o mga pagdasig gikan sa uban. Kon mao, padayon ug dasiga siya apan usab paningkamuti sa hinay-hinay nga dili na kaayo siya mo-focus sa iyang kaugalingon ug mas mo-focus na ngadto sa uban. Mao kana ang paagi nga makakita siya og mas dakong katagbawan ug bili sa kaugalingon, ingon man usab sa tinuod nga pagkamapainubsanon.

Si Presidente Dieter F. Uchtdorf, Ikaduhang Magtatambag sa Unang Kapangulohan, miingon: “Dili nato madiskubrihan ang pagpaubos pinaagi sa dili kaayo paghunahuna sa atong kaugalingon; atong madiskubrihan ang pagpaubos pinaagi sa dili kaayo paghunahuna kabahin sa atong kaugalingon” (“Garbo ug ang Priesthood,” Liahona, Nob. 2010, 58).

Kon ang problema ingon og mas grabe pa—kon kamo nagtuo nga siya nag-antus gikan sa dakong depresyon—i-awhag kaniya nga makig-istorya sa iyang mga ginikanan, magtatambag sa eskwelahan, o sa iyang bishop. O adtoa sila mismo ug ipasabut ang sitwasyon. Sila makasiguro nga makuha niya ang tabang nga iyang gikinahanglan, lakip ang propesyonal nga tabang kon gikinahanglan.