Mibati Ko nga Kinahanglang Mohunong

Ronald D. Colby, Utah, USA

Mga paghulagway pinaagi ni Bradley Clark

Adunay tibuok gabii nga kamping nga anaa ang tanang matang sa outdoor nga kalihokan giplano para sa Biyernes ug Sabado, ug ako naghinam-hinam sa pag-uban sa akong anak nga lalaki. Si Carl adunay part-time nga trabaho ug kinahanglang motrabaho sa Biyernes, busa mitanyag ko niya nga hapiton siya Biyernes sa gabii human sa trabaho. Nagplano mi nga mo-park sa may taytayan ibabaw sa kampinganan ug dayon maglakaw paubos.

Sa dihang miabut mi sa taytayan, ngitngit kaayo, nga may gamayng kahayag sa buwan ug pipila ka bitoon sa kalangitan. Ang dalan ngadto sa kampingan pig-ot kaayo sa may pangpang nga nagsubay sa suba. Kami anaa sa mga 300 ka yarda (275 m) ibabaw sa suba sa dihang gisugdan namo ang among lakaw.

Dili pa lang layo diha sa agianan ang among flashlight misugod na sa pag-awop, ug ang dalan usahay dili na makita tungod sa gubaong flashlight. Sa kalit mibati ko nga kinahanglang mohunong. Dali kong mihunong ug dayon milakaw pa og duha ka lakang. Ang pagbati o ang tingog dayon mibalik, “Hunong!”

Mihunong ko pag-usab. Si Carl, duol sa akong luyo, hapit misaylo nako.

“Unsay nahitabo, Pa?” nangutana siya.

Giingnan nako siya kabahin sa aghat, nagdugang nga kinahanglan kaming mouli ug mobalik inigka buntag.

“Pa, ako nang nakita ang campfire,” siya mitubag. “Wala na kini kaabut og sobra usa ka milya (1.6 km).”

Nasayud nga ang aghat gikan sa Espiritu Santo, namugos ko nga didto ra mi kutob. Ang flashlight wala na mosiga, busa mabinantayong mi nga milakaw balik sa agianan. Si Carl nasagmuyo ug wala na kaayo moistorya sa among pagpauli.

Sayo sa buntag mibalik mi sa taytayan ug misugod sa paglakaw og usab. Si Carl makaapil ra gihapon sa mga kalihokan sa Sabado. Kami nagdali subay sa dalan hangtud, sa kalit lang, ang dalan nawala! Dayon nakahunahuna mi. Miabut mi sa samang dapit kon asa mi mihunong pagkagabii.

“Pa, dili ni moubos og 100 ka yarda (91 m) diretso sa suba,” miingon si Carl. “Mahimong mamatay na gyud unta ta!”

Ang pang-pang hilabihan ka tip-tip diretso sa suba. Atubangan namo adunay kal-ang sa agianan nga mga 12 pye (3.6 m) ang gilapdon, resulta sa bag-ohay lang unos.

Nagginaksanay ming duha samtang nagluha. Dayon mikat-kat sa lain nga agianan ug nakaabut sa gikampingan. Untop ming miabut para sa pamahaw.

Usa ka timaan ang ibutang unta diha sa unang dalan apan wala mahimo. Salamat, usa ka timaan sa pasidaan among nabati gikan sa Espiritu Santo.

Dili pa lang layo diha sa agianan ang among flashlight misugod na sa pag-awop, ug ang dalan usahay dili na makita tungod sa gubaong flashlight.