Pagpangandam sa mga Oportunidad sa Kinabuhi

Gustong makaangkon og maanindot nga kaugmaon? Pag-eskwela!

BACKGROUND PINAAGI SA Hemera/Thinkstock; MGA BANNER PINAAGI NI Kelly-Anne Leyman/iStock/Thinkstock

Kon ang inyong homework nagtipun-og ug nagduhaduha kon angay ba kining paningkamot, hinumdumi kining tambag gikan sa Unang Kapangulohan. Ang ilang mga pulong sa kaalam makatabang ninyo nga madasig nga humanon ang mga tun-anan nga may gamayng pag-aghat.

Tungod kay ang edukasyon adunay dakong impluwensya sa inyong kaugmaon ug “importante nga bahin sa plano sa Langitnong Amahan sa pagtabang kaninyo aron mahimong mas mahisama Kaniya” (Alang sa Kalig-on sa mga Kabatan-onan [2011], 9), inyong madiskobrehan nga kini angay sa matag paningkamot.

Presidente Thomas S. Monson

Langitnong Pagtulun-an

“Pipila sa mga leksyon sa kinabuhi nakat-unan gikan sa inyong mga ginikanan, samtang ang uban inyong nakat-unan gikan sa eskwelahan o sa simbahan. Hinoon, adunay mga higayon nga kamo masayud nga ang atong Langitnong Amahan nagtudlo ug kamo Iyang estudyante.”

“Who Honors God, God Honors,” Ensign, Nob. 1995, 48.

Ang Dagat sa Kinabuhi

“Ang kinabuhi sama sa dagat diin ang mga mapagarbuhon napaubos, ang tawo nga wala magbuhat sa ilang buluhaton makita, ug ang lider mopatigbabaw. Aron luwas nga makalawig ug makaabut sa gitinguha nga pier, kinahanglan nga ang tsart anaa sa kamot kanunay ug na-update. Kinahanglan ninyong makakat-on sa mga kasinatian sa uban, lig-ong mobarug sa mga baruganan, mopalapad sa inyong mga interes, makasabut sa mga katungod sa uban nga molawig sa samang dagat, ug masaligan sa pagbuhat sa inyong katungdanan.

“Ang inyong mga paningkamot sa pag-eskwela adunay dakong epekto sa inyong mga oportunidad human sa inyong pag-eskwela. Samtang kamo naningkamot nga makakuha og dakong grado, ayaw ibaliwala ang kaimportante nga tinuorayng makat-on.”

“Great Expectations” (Brigham Young University debosyonal, Ene. 11, 2009), 4; speeches.byu.edu.

Pagpangandam Nag-una sa Pasundayag

“Ang pagpangandam sa mga oportunidad ug responsibilidad sa kinabuhi hilabihan kaimportante. Kita nagpuyo sa nag-usab-usab nga katilingban. Grabe nga kompetisyon kabahin na sa kinabuhi. Ang tahas sa bana, amahan, apohan, tigsangkap ug tigpanalipod lahi na gyud kon ikompara sa nanglabay na nga henerasyon. Ang pagpangandam dili usa ka butang nga tingali o basin. Kini usa ka sugo. Ang karaan nga sanglitanan ‘Ikalipay kay wala masayri’ dugay nang nawala. Ang pagpangandam nag-una sa pasundayag.”

“Duty Calls,” Ensign, Mayo 1996, 43.

Presidente Henry B. Eyring

Kinaiya sa Pagkat-on

“Isip anak sa Dios, ang inyong destinasyon, kon kamo naningkamot pag-ayo ug matinud-anon, ang mahisama Kaniya. Kana nagpasabut nga adunay usa ka butang nga tinuod nga dili ninyo makat-unan, tungod kay Siya nasayud sa tanang kamatuoran.

“Kadaghanan sa mga tawo mihunong sa pagkat-on tungod sa kahadlok. Sila nahadlok nga sila dili makakat-on. Kamo dili na angay mahadlok kon kamo matinud-anon. Ang inyong pormal nga pag-eskwela mahunong tungod sa pipila ka rason, apan gusto ko nga masayud mo uban sa kasiguradoan nga kamo makakat-on bisan unsay gusto sa Dios nga inyong makat-unan. Ang talagsaong mga tigkat-on nagtuo niini. Sila adunay kinaiya nga sila makakat-on.”

“Do What They Think You Can’t Do,” New Era, Okt. 1989, 6.

Ang Ginoo Nakaila Kaninyo

“Ang inyong kinabuhi mabinantayong giamuma, sama sa akoa. Ang Ginoo nasayud sa unsay Iyang ipabuhat ninyo ug sa unsay inyong angay nga masayran aron buhaton kini. Mahimo kamong makasalig nga Siya nag-andam kaninyo og mga oportunidad aron makat-on. Dili ninyo hingpit nga maila kadtong mga oportunidad, sama nako. Apan kon inyong unahon ang espirituhanong butang sa inyong kinabuhi, kamo mapanalanginan nga mobati nga nagiyahan ngadto sa usa ka butang, ug kamo mas madasig pa nga magkugi.”

“Real-Life Education,” New Era, Abr. 2009, 6.

Presidente Dieter F. Uchtdorf

Gisugo nga Magkat-on

“Alang sa mga miyembro sa Simbahan, ang edukasyon dili lamang usa ka maayo nga ideya—kini usa ka sugo. Kita gikinahanglan nga magkat-on ‘sa mga butang diha sa langit ug diha sa yuta, ug sa ilawom sa yuta; mga butang nga diha na, mga butang nga anaa, mga butang nga sa mubo nga panahon mahinabo; mga butang nga anaa sa panimalay, mga butang nga atua sa layong dapit’ [tan-awa sa D&P 88:79–80].”

“Duha ka mga Baruganan alang sa Kaayohan,” Liahona, Nob. 2009, 57.

Mapailubong Pagkamakanunayon

“Sa dihang nag-edad ako og 10 anyos, ang akong pamilya nahimong mga langyaw sa bag-ong yuta. Kanunay akong buotan nga estudyante sa eskwelahan—ingon niana, hangtud nga kami miabut sa West Germany. …

“Tungod kay daghan kaayong kurikulum nga bag-o ug dili pamilyar kanako, naulahi ko. Sa unang higayon sa akong kinabuhi, nagsugod ako sa paghunahuna nga tingali dili gayud kaayo ko maayo sa pag-eskwela.

“Maayo gani kay aduna akoy magtutudlo kinsa mitudlo kanako nga magmapailubon. Iya akong gitudloan nga ang malungtaron ug makanunayon nga buhat—mapadayunon nga pagpailub—makatabang kanako sa pagkat-on.

“Sa paglabay sa panahon, ang malisud nga mga subject nahimong mas klaro—bisan gani ang Iningles. Sa hinay-hinay misugod na ako sa pagkamatngon nga kon makanunayon akong magpraktis sa akong kaugalingon, makakat-on ra ako. Wala kini moabut nga diha dayon, kondili uban sa pailub, miabut ra gyud.”

“Ipadayon ang Pagpailub, Liahona, Mayo 2010, 57.