Nganong Ganahan Kaayo Ko sa Basahon ni Mormon
Steve Rahawi, California, USA
Hapit 30 ka tuig ang milabay mibyahe ko sa Utah sa unang higayon. Wala ko magkinabuhi nga nagsunod sa pagtulun-an ni Kristo apan gusto kong mausab. Wala lang ko mahibalo kon unsaon.
Sa gabii sa akong ikaduha nga adlaw sa Utah, mihunong ko sa usa ka motel sa gamay nga lungsod sa habagatang Utah. Samtang ang babaye diha sa opisina mihatag nako sa yawe sa kwarto, nangutana ko kon siya ba usa ka Santos sa Ulahing mga Adlaw. Madasigon siyang mitubag, “Oo.” Nagpahiyum, siya midugang, “Nabasa na ba nimo ang among talagsaon nga basahon, ang Basahon ni Mormon?” Nakuratan ug nadani, giingnan nako siya nga wala.
“Adunay kopya sa imong kwarto,” mipadayon siya. “Walay nindot nga talan-awon para nimo niining lungsod, mas maayo pa nga imong basahon kining talagsaon nga basahon.”
Nagpasalamat ko niya ug gihatud ang akong mga bagahe ngadto sa kwarto. Pag-abut didto nakakita ko og maroon paperback nga giulohan og ang Basahon ni Mormon diha sa may gamayng kabinet.
Yano lang nakong giabli ang basahon duol sa may tunga ug nagbasa og pipila ka mga bersikulo, apan dili ko maka-focus. Ako walay nasabtan. Nasagmuyo, akong gibutang ang basahon ug mibiya sa kwarto, mibati og kahaw-ang. Nagdrayb ko sa palibut hangtud nakakita ko og bar—ngit-ngit og bati nga dapit. Misulod ko ug diha-diha dayon mibati nga miserable, nag-inusara, ug walay paglaum. Nagbarug ko didto sulod sa pipila ka minuto ug dayon daling milakaw paggawas, determinado nga dili na gayud usikan ang akong panahon sa bisan asang bar.
Nalagsik, mibalik ko sa akong kwarto sa motel ug gikuha ang Basahon ni Mormon. Miluhod ko sa Ginoo, kinsa wala ko kaayo makaila, ug nangamuyo Kaniya nga malooy kanako. Nanghangyo Kaniya sa pagpasaylo nako sa mga sala nga akong nahimo sa akong kinabuhi ug sa pagtabang kanako aron makasabut sa akong mabasa sa Basahon ni Mormon, aron masayud kon si Joseph Smith tinuod nga propeta, ug aron masayud kon ang Simbahan sa Mormon para ba gyud kanako.
Akong giablihan ang basahon nga may balaang pagtahud ug gibasa ang unang bersikulo nga akong nakita: “Ako mihimaya sa kayano; ako mihimaya sa kamatuoran; ako mihimaya sa akong Jesus, kay siya nagtubos sa akong kalag gikan sa impyerno” (2 Nephi 33:6). Miinit ang akong dughan ug mihilak ko. Ang mga pulong nakahatag gyud nako og kahayag sa paglaum—ang kahayag ni Kristo nga nagdapit kanako sa pagduol ngadto Kaniya.
Nagdangoyngoy, miluhod usab ko aron mag-ampo, nangamuyo sa Ginoo nga mogiya nako. Dayon akong giablihan ang basahon pag-usab ug misugod sa pagbasa sa unang kapitulo sa 1 Nephi. Napuno ko sa katingala sa dili matupngan nga gahum, kaputli, ug kamatuoran sa mga pulong ug pagpamatuod ni Nephi. Nagbasa ko hangtud alas-2:00 sa kaadlawon, ang Ginoo mibukas sa akong panabut samtang ako nagbasa.
Unom ka bulan ang milabay nabunyagan isip miyembro niining talagsaon, tinuod nga simbahan. Ako nasayud nga ang Ginoo mipanalangin kanako nga nakakaplag ug nakabasa sa Basahon ni Mormon—ang basahon nga nakamugna sa akong hugot nga pagtuo ug pagpamatuod kang Jesukristo.
Sa akong kwarto sa motel nakakita ko og maroon paperback nga giulohan og ang Basahon ni Mormon.