Pag-ampo Sama kang Alma alang sa Akong Higala
Ang tagsulat nagpuyo sa Federal District, Brazil.
“Ug kini tungod kay siya nag-ampo diha sa hugot nga pagtuo” (Alma 31:38).
Ang akong labing suod nga higala miadto sa simbahan uban kanako sa miaging duha ka semana. Apan sa dihang ako siyang gidapit pag-usab, siya miingon nga dili siya mouban kanako. Gusto niya nga malingaw sa tapos sa semana pinaagi sa pagkatulog og dugay ug sa paggawas aron maglingaw-lingaw. Gidawat nako ang iyang tubag, apan sa hilum naguol ko tungod kay gusto gyud ko nga mokuyog siya ug mobati sa Espiritu ug magkat-on gikan sa Dios. Sa pag-abut nako sa balay, miadto ko sa akong kwarto ug nag-ampo, nagsulti sa Langitnong Amahan sa akong kasub-anan ug nangayo sa Iyang paghupay ug paggiya.
Human sa akong pag-ampo, miadto ko sa kusina aron manghugas sa mga plato. Ang akong amahan nangutana kon ang akong higala mokuyog ba nako og usab ngadto sa simbahan sa sunod nga adlaw. Sa dihang gisultihan ko siya sa giingon sa akong higala, ang akong amahan nakabantay nga nabalaka ko ug nasubo. Miingon lamang siya, “Gibuhat nimo ang imong bahin. Ang mga tawo adunay ilang kabubut-on. Mitanom ka og usa ka liso.” Ang mga pulong sa akong amahan sa hugot nga pagtuo nagdala og kalinaw sa akong kasingkasing.
Agi og pagpangandam alang sa Sunday School, akong gibasa ang Alma 30–32. Sa kapitulo 31, si Alma nag-ampo ngadto sa Ginoo sa tibuok niyang kasingkasing alang sa iyang mga kaigsoonan nga mga Zoramite, kinsa misalikway sa mga pamaagi sa Ginoo ug nagsugod sa pagpadulong ngadto sa sayop. Samtang nagbasa ko sa iyang mga pulong, ang Espiritu mitandog kanako, ug ako nadasig usab sa pag-ampo.
Miluhod ko ug mihalad og pag-ampo susama sa kang Alma alang sa akong labing suod nga higala. Sama ni Alma, akong gisultihan ang Langitnong Amahan nga “ang [iyang kalag] bililhon, ug [siya akong igsoong lalaki]; busa, ihatag ngari [kanako], O Ginoo, gahum ug kaalam nga [ako] mahimo nga modala [kaniya, akong igsoong lalaki], pagbalik nganha kanimo” (Alma 31:35).
Pagkasunod adlaw nangandam ko alang sa simbahan, nasayud nga ang akong higala dili moadto uban kanako. Bisan pa niana, ako dunay kalinaw sa akong kasingkasing tungod kay ako, sama ni Alma, nag-ampo nga may hugot nga pagtuo. Sa akong pagbiya padulong sa simbahan, ako nakadawat og tawag gikan sa akong higala. Siya nangutana kon nakabiya na ba ko sa balay ug kon makahapit ko ug mokuha kaniya. Talagsaon ang among miting niana nga Dominggo, ug ako nasayud nga ang Espiritu mipamatuod sa kamatuoran ngadto kaniya.
Nasayud ko nga dili lang ang akong higala ang gipanalanginan nianang adlawa tungod sa Basahon ni Mormon ug sa pag-ampo sa hugot nga pagtuo. Ang akong kaugalingong pagpamatuod sa Ginoo ug niining libro milig-on, ug kana nga pagpamatuod migiya kanako sa pagserbisyo og misyon ug mihimong posible alang kanako sa pagpamatuod sa kamatuoran. Ako nasayud nga ang Basahon ni Mormon makapaduol kanato sa Dios, nga nagtudlo kini kanato sa pagduol ngadto kang Kristo, ug nga Siya moluwas sa atong mga kalag.