Nasayud Ko Unsay Kinahanglan Nako nga Buhaton
Ang tagsulat nagpuyo sa Central Region, Uganda.
Kon dili nako ilimud ang Simbahan, kinahanglan nako nga mobiya sa akong eskwelahan.
Paghulagway pinaagi ni David Habben
Nag-eskwela ko sa usa ka eskwelahan nga gidumala sa usa sa mga simbahan sa akong nasud. Dili pa lang dugay gipili ko sa akong mga klasmeyt nga maoy magtatambag sa among klase. Usa ka adlaw samtang nagplano ko unsa ang itudlo, akong nakit-an ang usa ka booklet sa Simbahan mahitungod sa balaod sa kaputli. Mihukom ko sa pagtudlo sa akong mga klasmeyt kabahin sa kaputli ug nangayo sa full-time nga mga misyonaryo og mga booklet, nga akong gipanghatag atol sa leksyon.
Human sa akong leksyon, daghang mga estudyante ang gustong masayud og dugang kabahin sa Simbahan, mao nga ako silang gitudloan ug mihatag kanila og dugang nga mga materyal sa Simbahan, lakip na ang Basahon ni Mormon. Wala ako masayud nga wala kini tuguti sa pangulong magtutudlo.
Usa ka adlaw siya mitawag kanako ngadto sa iyang opisina ug nangutana kanako asa nga simbahan ako magtambungan. Dihang misulti ko niya, iya kong gipangutana nganong nanghatag ko sa “Biblia” sa Simbahan ngadto sa mga estudyante. Giingnan nako siya nga ang akong gihatagan kadto rang nangayo niini.
Human sa taas nga panag-istorya kabahin sa Simbahan, diin iyang giklaro nga nagtuo siya nga dili kini ang Simbahan sa Dios, siya miingon kanako, “Nasayud ko nga wala kay mga ginikanan, apan pasayloa ko—kinahanglan ka nga mobiya sa akong eskwelahan tungod kay makabig nimo ang daghan sa akong maayo nga mga estudyante nianang imong simbahan.” Siya miingon kanako nga mopili tali sa Simbahan ug sa akong edukasyon.
Mipatawag siya og usa ka tigum ug misulti sa eskwelahan nga wala na ako tuguti nga maka-eskwela didto tungod kay sakop ko sa Simbahan sa Mormon ug nga ang bisan kinsa nga estudyante nga mosunod kanako kinahanglang mobiya.
Human sa katiguman, nangutana siya kon unsay akong hukom: ang akong simbahan o akong edukasyon. Akong gibati ang Espiritu nga nagsulti kanako sa pagbarug sa unsay akong nahibaloan: nga ang Ginoo mipahiuli sa Iyang tinuod nga Simbahan. Akong gipakigbahin ang akong pagpamatuod ngadto kaniya sa akong pagbiya. Iya kong giingnan nga mobalik sa sunod semana aron sa pagkuha sa sulat nga nagpakita nga wala na ko mag-eskwela didto.
Sa dihang miadto ko pagkasunod semana, nausab ang iyang hunahuna! Wala na ko niya papahawaa sa eskwelahan. Nalipay kaayo ko, labi na tungod kay akong gibarugan ang unsay akong nasayran nga tinuod.
Kini nga kasinatian mitudlo kanako sa kanunay nga barugan ang unsay atong nahibaloan nga tinuod. Ang Ginoo kanunay anaa alang kanato. Kon akong gilimud ang Simbahan, ang mga estudyante makaingon nga ang akong gitudlo kanila dili tinuod, apan karon sila nasayud nga ako nasayud sa kamatuoran.