Mensahe sa Visiting Teaching
Ang Balaan nga Misyon ni Jesukristo: Maghuhupay
Tun-i sa mainampuong paagi kini nga materyal ug tinguhaa nga masayran kon unsa ang ipakigbahin. Sa unsang paagi ang pagsabut sa kinabuhi ug misyon sa Manluluwas makadugang sa inyong pagtuo diha Kaniya ug makapanalangin niadtong inyong giamuma pinaagi sa visiting teaching? Alang sa dugang nga impormasyon, adto sa reliefsociety.lds.org.
Hugot nga Pagtuo, Pamilya, Kahupayan
Paghulagway sa litrato pinaagi ni Sarah Carabine Jenson
“Dili ko kamo pagabiyaan nga daw mga ilo: ako mobalik ra kaninyo” (Juan 14:18). Siya mohatag kanato sa “[katahum] nga puli sa abo, ang lana sa kalipay puli sa pagbalata” (Isaias 61:3). Tungod kay si Kristo nag-antus sa Pag-ula alang sa matag usa kanato, Siya dili makalimot kanato. “Ang atong Manluluwas midala diha sa Iyang Kaugalingon … sa atong kasakit ug pag-antus aron Siya mahibalo unsaon sa paghupay kanato,” miingon si Linda S. Reeves, ikaduhang magtatambag sa kinatibuk-ang kapangulohan sa Relief Society.1
Ang pagkasayud nga si Kristo mohupay kanato makahatag kanato og kalinaw ug nagdasig kanato sa pagsunod sa Iyang ehemplo pinaagi sa pagpangalagad sa uban. Si Presidente Thomas S. Monson miingon: “Ang atong kahibalo sa ebanghelyo ug ang atong gugma sa atong Langitnong Amahan ug sa atong Manluluwas mohupay ug molig-on kanato ug mohatag og kalipay sa atong mga kasingkasing samtang kita maglakaw nga matarung ug mosunod sa mga sugo. Walay butang niining kalibutan nga makapildi kanato.”2
Gikan sa mga Kasulatan
Juan 14:18, 23; Alma 7:11–13; Doktrina ug mga Pakigsaad 101:14–16
Gikan sa Atong Kasaysayan
Si Elaine L. Jack, ang ika-12 nga kinatibuk-ang presidente sa Relief Society, miingon: “Diha sa visiting teaching atong gitabangan ang usag usa. Sa kasagaran ipamulong kini sa mga kamot kon ang pulong dili makahimo. Ang mainitong nga paggakos nagpalanog sa mensahe. Ang pagpangatawa naghiusa kanato. Ang panahon sa pagpakigbahin nagbag-o sa atong mga kalag. Dili kita kanunay makapagaan sa palas-anon sa nagproblema nga tawo, apan kita makatabang kaniya aron mas maayo ang iyang pagsulbad niini.”3
Ang atong pioneer nga mga sister sa Relief Society “nakakaplag usab og espirituhanong kalig-on diha sa usag usa nga paghigugmaay ug kamanggiloy-on. … Samtang giantus nila ang mga pagsulay nga balatian ug pagkamatay, nag-ampo sila uban sa hugot nga pagtuo alang sa usag usa ug naghupay sa usag usa. ‘Ang gugma sa Dios midagayday gikan sa kasingkasing ngadto sa laing kasingkasing,’ misulat si Helen Mar Whitney, ‘hangtud nga ang dautan ingon og wala nay gahum sa iyang mga paningkamot sa pagbabag kanamo ug sa Ginoo, ug ang pintas niyang mga pana, sa pipila ka mga hitabo, dili na makadulot.’”4