Mga Materyal sa Simbahan—nga Giimprinta o anaa sa Digital?

Ang tawo mitan-aw sa iyang mga kamot. Iyang gilihok-lihok ang iyang mga tudlo. Kadtong mga kamot makahimo og daghang mga butang. Makaayo sa buslot nga gripo. Makahimo og lamesa. Paggiya sa iyang asawa sa pagsayaw sa ritmo ug estilo.

Dayon molingi siya sa smartphone nga bag-o lang niyang naangkon. Iyang mga kamot makahimo og daghang mga butang. Apan ang iyang kumagko makahimo … niana?

Ang iyang manwal sa Sunday School ug maayo kaayo pagkagamit nga kasulatan anaa tupad sa device. Ganahan kaayo siya niana nga mga kasulatan! Ganahan siya nga mahikap ang papel sa iyang kamot. Ang tanang mga sinulat sa kamot. Ang yanong gibug-aton niini.

Ug gani siya nahinumdom sa gitudlo ni Elder Richard G. Scott bahin sa teknolohiya nga inyong madala ang sumbanan nga mga kasulatan ug daghan pa sa inyong bulsa.¹ Iyang gihikap ang milubad nga panit sa mga kasulatan. Moangkon siya nga wala niya kini dad-a sa tibuok semana.

Apan sa miaging adlaw ang iyang apong lalaki migamit sa iyang telepono sa pagpakigbahin og usa ka linya gikan sa usa sa iyang paboritong bag-ong pakigpulong sa komperensya. Niadtong higayuna, naglakaw-lakaw sila sa pagkagabii sa Biyernes.

Ang tawo niadtong panahona walay taas nga higayon sa pagtuon. Hinoon, sayon kaayo siyang makakita og higayon nga 5 minutos dinhi, 10 minutos didto. Gusto usab siya nga maka-access sa tanan nga gitanyag sa Simbahan nga anaa sa digital.

Dihay natuktok sa pultahan. “Hey, Lolo!” miingon ang iyang apo nga lalaki. “Andam ka na sa pagsugod?”

Ang lalaki mikuha sa iyang smartphone. Ang iyang kumagko tingali dili gayud sama sa iyang mga anak ug mga apo ka paspas. Apan tingali dili na nila kinahanglan.

“Sigurado, ang lalaki miingon. “Tudloi ko!”

Paglabay sa mga semana, ang mga tawo nakakaplag og dugang mahitungod sa unsay gitudlo sa iyang apo nga lalaki kaniya kabahin sa digital nga kalibutan.

Daghag kagamitan. “Adunay pipila ka mga butang, sama sa video ug audio, nga wala sa giimprinta. Anaa ang tanan sa digital. Kamo usab makahimo og mga notes.”
Kompleto. “Kini sama sa usa ka dakong librarya. Madala ninyo ang mga publikasyon sa Simbahan sa usa ka kamot ug makatuon niini bisan asa.”
Makasiksik. “Ang feature sa pagsiksik makatabang kaninyo nga daling makit-an ang inyong gipangita.”
Ikapaambit. “Kon duna moy gusto, mahimo ninyong ipaambit. Sayon kini nga paagi sa pagpaambit sa ebanghelyo.”
Maayo pagkahan-ay. “Dili na kamo maghulat pa nga ipadala. Ug dili na kamo mangita og lugar nga kabutangan sa tanan.”
Walay gasto. “Wala kay gasto sa pag-access sa mga materyal sa Simbahan nga digital; ug nagkadaghan ang mga tawo nga naggamit sa digital, mas makadaginot ang Simbahan sa pag-imprinta, pagpadala, ug mga galastuhan sa imbentaryo.”

Busa unsay kalambigitan niini nga istorya kaninyo?

Hapit tanang mga materyal nga giimprinta sa Simbahan anaa usab sa LDS.org o diha sa Gospel Library mobile application. Ang paggamit og digital wala magpasabut nga hingpit na kamo dili mogamit sa giiprinta nga mga materyal—ang duha adunay ilang panahon ug dapit sa inyong kinabuhi, apan samtang kamo mag-andam alang sa umaabut nga tuig sa kurikulum, hunahunaa ang pagtimbang-timbang kon unsa nga digital nga mga kapanguhaan ang inyong gikinahanglan.

Labaw sa tanan, ayaw kahadlok sa paggamit sa digital nga butang. Kanunay adunay tawo nga motabang kaninyo.