Ang mga Propeta sa Daang Tugon
Isaias
“Si Isaias sa matag sumbanan mao ang propeta nga gamhanang namulong sa Mesiyas sa Daang Tugon ug tungod niini ang iyang mga pulong mao ang labing inila sa rekord.”1 —Elder Jeffrey R. Holland sa Korum sa Napulog Duha ka mga Apostoles
Si Propeta Isaias Nanagna sa Pagkahimugso ni Kristo, ni Harry Anderson; scroll pinaagi ni bubaone/iStock/Thinkstock; background pinaagi sa forplayday/iStock/Thinkstock
Anak ko ni Amoz, ug ang akong ngalan nagpasabut “Ang Ginoo mao ang kaluwasan.”2 Nagkugi ko isip propeta sa Jerusalem sulod sa 40 ka tuig, gikan sa 740–701 b.c. Nanagna ko sa Jerusalem sa panahon sa mga pagmando sa upat ka mga hari, ug ako ang labaw nga tigtambag ni Haring Ezechias, nga naghatag nako og dakong impluwensya sa relihiyon.3
Ako dili lang basta nanagna sa mga panghitabo kalabut sa akong panahon ug katawhan apan nanagna usab kabahin sa umaabut nga mga panghitabo nga nakaapekto sa tibuok tawhanong pamilya. Nanagna ko sa pagkahimugso sa Manluluwas: “Ania karon, ang usa ka ulay manamkon, ug magaanak og usa ka anak nga lalaki, ug pagatawgon ang iyang ngalan Emmanuel.”4 Ako nagsangyaw nga si Jehova ang gidihogan “sa pagwali sa maayong mga balita ngadto sa mga maaghup; … sa pagbugkos sa mga dugmok og kasingkasing, aron sa pagmantala sa kagawasan sa mga binihag, ug sa pag-abli sa bilanggoan alang kanila nga ginagapos.”5 Nanagna usab ko nga human sa Iyang Ikaduhang Pag-anhi, “ang Ginoo sa mga panon magahari diha sa bukid sa Zion, ug sa Jerusalem, ug sa atubangan sa iyang mga anciano anaa ang himaya.”6
Ang akong paggamit sa mga simbolo ug mga balak nagtago sa akong mga pagtulun-an niadtong dili pa andam nga makasabut o mosunod niini. Hinoon, kadtong makugihong nagtuon sa akong mga pagtulun-an uban sa tabang sa Espiritu Santo makasabut sa akong mga panagna.7
Ako ang katapusan sa importanting mga propeta nga nagtudlo sa mga tribo sa Israelite sa wala pa sila magsugod sa pagtibulaag sa Balaan nga Yuta.