Unsa ang Atong Gituohan

Higugmaa ang Inyong Silingan sama sa Inyong Kaugalingon

“Sa atong pagbangon matag buntag, atong ipasalig ang pagtubag uban sa gugma ug kalooy sa bisan unsay moabut kanato.” —Presidente Thomas S. Monson

Sa dihang usa ka abogado nangutana kang Jesus nga asa niining mga kasugoan ang labing mahinungdanon, mahimo unta Siyang mopili sa bisan hain sa daghang mga sugo gikan sa Daang Tugon, gikan sa balaod ni Moises, o gikan sa Napulo ka mga Sugo. Apan, Iyang gi-summarize ang tanang mga sugo niining duha:

“Higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan.

“Mao kana ang dako ug unang sugo.

“Ug ang ikaduha sulosama ra, nga mao kini, Higugmaa ang imong silingan sama sa imong kaugalingon” (Mateo 22:37–39).

Sama sa gitudlo ni Presidente Thomas S. Monson sa miaging kinatibuk-ang komperensya, ang pagsunod sa usa ka sugo makatabang nato nga makasunod sa laing sugo: “Dili kita tinud-anay nga mahigugma sa Dios kon dili nato higugmaon ang atong isig ka ingon niining mortal nga kinabuhi. Sama usab, dili kita hingpit nga mahigugma sa atong isig ka tawo kon dili nato higugmaon ang Dios, ang Amahan natong tanan. … Kitang tanan espiritu nga mga anak sa atong Langitnong Amahan ug, sa ingon, mga managsoon. Samtang atong ibutang kini nga kamatuoran sa hunahuna, mahimong mas sayon ang paghigugma sa tanang mga anak sa Dios” (“Gugma—ang Kahulugan sa Ebanghelyo,” Liahona, Mayo 2014, 91).

Ang pagpalambo og gugmang putli—sama kang Kristo nga gugma alang sa uban—makapalambo sa atong mga relasyon, makatabang kanato nga andam sa pagserbisyo, ug makapaangay nato sa kinabuhing dayon (tan-awa sa Moroni 10:21). Ang gugma nga putli mao ang espirituhanong gasa nga kita makapangamuyo ug magpakabuhi; kini “gitugyan diha sa tanan kinsa tinuod nga mga sumusunod … [ni] Jesukristo” (Moroni 7:48). Kini mao ang “labi pa ka dagkong mga hiyas” (1 Mga Taga-Corinto 12:31) nga gipamulong ni Apostol Pablo ug naglakip sa pagkamabination, pagkamapailubon, pagkamapainubsanon, pagkamaaghup, pagkamalaumon, ug pagkamanggihatagon (tan-awa sa 1 Mga Taga-Corinto 13).

Ang kinabuhi mao ang pinakamaayong dapit sa pagpalambo og gugmang putli. Ang pagtulun-an sa Manluluwas nga gitawag og Bulawanong Lagda [Golden Rule] makagiya sa atong mga aksyon: “Buhati ang mga tawo sa bisan unsay buot ninyo nga ilang pagabuhaton kaninyo” (Mateo 7:12). Kitang tanan dili hingpit, apan kitang tanan nagtinguha nga ayuhon pagtagad bisan sa atong mga kakulangan.

Pagpakig-istorya uban sa Gugma

“Dako ang panginahanglan karon sa mga lalaki ug babaye nga mopalambo og pagtahud sa usag usa sa magkalahi nga pagtuo ug kinaiya ug sa managsukwahi kaayo nga mga tinguha. …

“Ang kaandam nga mosabut sa panglantaw sa uban makausab sa ‘sulting [masakit]’ ngadto sa ‘makahatag [og] kaayohan.’ … Tingali dili kini makausab o makasulbad sa problema, apan ang mas importante mao ang posibilidad nga ang paghatag og kaayohan makausab nato.

“Mopamatuod ko nga kita ‘makahatag [og] kaayohan’ pinaagi sa malumong pinulongan kon ang naamumahang gasa sa Espiritu Santo modulot sa atong kasingkasing nga makasabut sa pagbati ug sa ideya sa uban.”

Elder W. Craig Zwick sa Seventy, “Unsa May Imong Gihunahuna?” Liahona, Mayo 2014, 43.

Ikonsiderar kining mga pagtulun-an gikan ni Presidente Monson kabahin sa daghang mga paagi nga atong mapakita ang gugma ngadto sa uban:

“Ang uban sa atong labing dakong mga oportunidad sa pagpakita sa atong gugma anaa sa sulod sa atong kaugalingong mga panimalay.”

“Kon gikinahanglan nato nga mobadlong sa usa, kita kinahanglang mopakita og dugang gugma pagkahuman” (tan-awa sa D&P 121:43).

“Ang pagpasaylo kanunay nga mag-uban sa gugma. … Ang pagpasangil makapaumido sa samad. Ang pagpasaylo lamang ang makaayo.”

“Ang gugma mapadayag sa daghang mga mailhan nga paagi: usa ka pahiyom, pagkaway-kaway, mabinationg komentaryo, usa ka pagdayeg.”

“Laing mga ekspresyon tingali dili kaayo klaro, sama sa pagpakita og interes sa kalihokan sa uban, pagtudlo og baruganan uban ang pagkamabination ug pailub, pagbisita sa masakiton.”

Gikan sa “Gugma—ang Kahulugan sa Ebanghelyo, Liahona, Mayo 2014, 91–94.

Mga paghulagway pinaagi ni David Habben