Mga Lalaki ug mga Babaye ug ang Gahum sa Priesthood

Ni Elder M. Russell Ballard

Sa Korum sa Napulog Duha ka mga Apostoles

Gikan sa pakigpulong nga gihatag sa debosyonal sa Brigham Young University niadtong Agosto 20, 2013. Alang sa kompleto nga teksto sa Iningles, adto sa speeches.byu.edu.

Dili gayud nato kalimtan nga kita mga anak sa Dios, patas sa Iyang panan-aw nga adunay lain-laing mga responsibilidad ug kapabilidad nga gihatag Kaniya ug gihatagan og access sa Iyang gahum sa priesthood.

Ang akong lolo nga si Elder Melvin J. Ballard (1873–1939), sakop sa Korum sa Napulog Duha ka mga Apostoles, anaa sa ospital nag-antus sa end-stage nga leukemia niadtong 1939. Ang akong amahan, kinsa naglingkod sa kilid sa higdaanan ni Lolo, miingon nako nga si Lolo naningkamot nga makabarug, mitan-aw sa tibuok kwarto sa ospital daw namulong sa kongregasyon, ug klarong miingon, “Ug labaw sa tanan, mga kaigsoonan, kinahanglang tul-id kitang maghunahuna.”

Kabahin sa akong gisulti, palihug hinumdumi ug tul-id nga maghunahuna kabahin sa sukaranang mga doktrina ni Kristo nga naglakip sa gugma sa atong Amahan sa Langit alang sa Iyang mga anak nga babaye, kinsa mga bililhon ug mahinungdanon sa Ang Simbahan ni Jesukristo sa mga Santos sa Ulahing mga Adlaw. Ako nagtuo nga adunay pipila ka mga kamatuoran nga kinahanglang masabtan sa mga babaye ug lalaki kabahin sa mahinungdanon nga tahas sa kababayen-an sa paglig-on ug pagtukod sa gingharian sa Dios dinhi sa yuta.

Kita pinalanggang espiritu nga mga anak sa atong Langitnong Amahan. Nagpuyo kita uban Niya sa kinabuhi sa wala pa dinhi sa yuta. Sa pagtuman sa misyon “sa pagpahinabo sa pagka-imortal ug sa kinabuhi nga dayon sa tawo” (Moises 1:39), ang Langitnong Amahan nagdesinyo og plano aron matabangan ang Iyang mga anak makab-ut ang ilang hingpit nga potensyal.

Adunay mga tawo nga nangutana sa tahas sa mga babaye diha sa plano sa Dios ug sa Simbahan. Nainterbyu nako og igong nasyonal ug internasyonal nga media nga nasayud nga kadaghanan sa mga journalist nga nag-interbyu nako aduna nay gihunahuna kabahin niini nga hilisgutan. Daghan ang nangutana nga nagpasabut nga ang mga babaye ubos kay sa mga lalaki diha sa Simbahan. Kini sayop gyud.

Tuguti ko nga mosugyot og lima ka importanting mga punto sa pagpamalandong ug tul-id nga makahunahuna niining importante nga hilisgutan.

1. Nagtinguha ang Amahan ug Anak sa atong kahimayaan.

Ang atong Langitnong Amahan milalang sa mga babaye ug lalaki, kinsa Iyang espiritu nga mga anak. Kini nagpasabut nga ang sekso mahangturon. Iyang plano gidesinyo sa pagtabang sa tanan kinsa nagpili nga mosunod Kaniya ug sa Iyang Anak, si Jesukristo, aron matuman ilang kapalaran isip manununod sa kinabuhing dayon.

Ang Langitnong Amahan ug ang Iyang Anak mga hingpit. Sila nasayud ug nakasabut sa tanang butang. Dugang pa, Sila naglaum nga kita mahingpit. Ang Ilang buhat ug himaya mao ang pagsiguro nga ang Ilang mga anak mahimaya.

Sigurado, kon ang atong umaabut nga kahimayaan mao ang Ilang importanting mga tumong ug tuyo, ug kon Sila nasayud sa tanan ug hingpit, nan hingpit Silang nasayud unsaon sa pag-andam, pagtudlo, ug paggiya kanato aron mas dako ang atong purohan nga mahimong takus sa kahimayaan. Ang atong Amahan sa Langit nasayud, nakakita, ug nakasabut sa tanan. Ang Iyang pagsabut, Iyang kaalam, ug Iyang gugma alang kanato hingpit. Sigurado kita mouyon nga ang atong Langitnong Amahan ug Iyang Anak nasayud unsa nga mga oportunidad ang gikinahanglan sa Iyang mga anak aron hingpit nga maandan ang tawhanong pamilya para sa kinabuhing dayon.

Matag usa nato adunay pribiliheyo sa pagpili kon kita motuo nga ang Dios mao ang atong Amahan, nga si Jesus mao ang Kristo, ug Sila adunay plano nga gidesinyo sa pagtabang nato nga makabalik ngadto Kanila. Kini, siyempre, nagkinahanglan og hugot nga pagtuo. Ang atong mga pagpamatuod, kalinaw sa atong hunahuna, ug ang atong kaayohan magsugod sa kaandam nga motuo nga ang atong Amahan sa Langit nasayud unsay pinakamaayo.

2. Ang Simbahan gidumala pinaagi sa mga yawe sa priesthood.

Ang Simbahan ni Jesukristo sa mga Santos sa Ulahing mga Adlaw mao ang Simbahan sa Ginoo, ug ang Iyang Simbahan gidumala pinaagi sa awtoridad ug mga yawe sa priesthood. “Ang mga yawe sa priesthood mao ang katungod sa Dios nga gihatag ngadto sa mga lider sa priesthood sa paggiya, pagkontrolar, ug pagdumala sa paggamit sa Iyang priesthood dinhi sa kalibutan. Ang paggamit sa awtoridad sa priesthood pinaagi niadtong naghupot sa mga yawe niini (tan-awa sa D&P 65:2; 81:2; 124:123) … [ug] kinsa adunay katungod sa pagdumala ug pagdirekta sa Simbahan sulod sa usa ka hurisdiksyon.”¹

Kadtong adunay mga yawe sa priesthood makahimong posible sa tanan kinsa nagserbisyo o matinud-anong naningkamot ubos sa ilang direksyon sa paggamit sa awtoridad sa priesthood ug maka-access sa gahum sa priesthood. Ang tanang tawo nga nagserbisyo sa Simbahan ubos sa pagdumala niadtong naghupot sa mga yawe.²

Akong sublion ang akong gipamulong niadtong Abril 2013 nga kinatibuk-ang komperensya: “Sa plano sa atong Langitnong Amahan nga naghatag og gahum sa prieshood, ang kalalakin-an adunay responsibilidad sa pagpangalagad sa priesthood, apan dili sila ang priesthood. Ang kalalakin-an ug kababayen-an adunay lain-lain apan parehas nga bililhong tahas. Ingon nga ang babaye dili magsabak kon wala ang lalaki, ang lalaki dili hingpit nga makagamit sa gahum sa priesthood sa pagtukod og mahangturong pamilya kon wala ang babaye. … Sa ato pa, sa mahangturong panglantaw, ang gahum sa pagpasanay ug ang gahum sa priesthood pagaambitan sa bana ug asawa.”³

Nganong mga lalaki—ug dili ang mga babaye—ang giorden ngadto sa mga katungdanan sa priesthood? Si Presidente Gordon B. Hinckley (1910–2008) mipasabut nga “ang Ginoo,” dili ang tawo, “ang nagsangun nga ang mga lalaki sa Iyang Simbahan mao ang mohupot sa priesthood” ug kinsa nagtuga sa mga babaye og “mga abilidad sa paghingpit niining talagsaon ug kahibulongan nga organisasyon, nga ang Simbahan ug gingharian sa Dios.”⁴ Wala gipadayag sa Ginoo nganong Iyang giorganisar Iyang Simbahan niining paagiha.

Kining butanga, sama sa uban, kabahin gyud sa atong hugot nga pagtuo. Kita ba nagtuo nga kini ang Simbahan sa Ginoo? Kita ba nagtuo nga kini Iyang giorganisar sumala sa Iyang mga katuyoan ug kaalam? Kita ba nagtuo nga Iyang kaalam sobra pa kaysa atoa? Kita ba nagtuo nga Iyang giorganisar Iyang Simbahan sa paagi nga makapanalangin og maayo sa tanan Niyang mga anak, sa Iyang anak nga mga lalaki ug sa Iyang anak nga mga babaye?

Ako mopamatuod nga kining mga butanga tinuod. Ako mopamatuod nga kini ang Simbahan sa Ginoo. Ang mga babaye mahinungdanon sa pagdumala ug sa buhat sa Simbahan pinaagi sa pagserbisyo isip lider sa Relief Society, Young Women ug Primary; pinaagi sa pagserbisyo isip mga magtutudlo, mga full-time nga mga misyonaryo, ug mga ordinance worker sa templo; ug diha sa panimalay, diin nahitabo ang labing importante nga pagtulun-an sa Simbahan.

Dili nato kalimtan nga mga katunga sa tanan nga pagtudlo diha sa Simbahan gihimo pinaagi sa mga sister. Dakong pagpangulo naggikan sa atong mga sister. Daghang mga oportunidad sa pagserbisyo ug mga kalihokan giplano ug gidumala sa mga babaye. Ang pag-apil sa mga babaye diha sa ward ug stake council ug sa kinatibuk-ang mga council sa ulohang buhatan sa Simbahan naghatag sa gikinahanglan nga mga ideya, kaalam, ug balanse.

Sobra na sa 20 ka tuig nagtudlo ko kabahin sa kaimportante sa konseho, lakip na ang mahinungdanon nga pag-apil sa mga lider nga sister. Akong giila nga pipila sa mga lalaki, lakip sa pipila ka mga lider sa priesthood, wala pa makakita sa kahayag ug wala gihapon gilakip atong mga lider nga sister sa hingpit nga pagpakig-uban diha sa mga konseho sa ward ug stake. Giila usab nako nga pipila sa mga lalaki nagdaug-daug sa mga babaye ug usahay sad-an sa pag-abuso sa mga babaye. Kini wala gayud mauyuni sa Dios. Mobati ko og kasigurado nga ang mga lalaki kinsa momaltrato sa mga babaye manubag sa Dios sa ilang mga binuhatan. Ug bisan kinsa nga lider sa priesthood kinsa dili mopaapil sa iyang mga lider nga sister uban sa hingpit nga pagtahud ug pagpaapil wala mopasidungog ug mopalambo sa mga yawe sa gitugyan kaniya. Ang iyang gahum ug impluwensya mawala hangtud iyang makat-unan ang mga pamaagi sa Ginoo.

Karon, mga sister, samtang ang inyong ideya mahinungdanon ug gidawat diha sa epektibong council, kamo kinahanglan nga magbantay nga dili mangangkon niana nga tahas. Ang labing malampusong ward ug stake council mao kadtong mga lider sa priesthood nagsalig sa ilang mga lider nga sister ug nag-awhag nila nga motampo sa mga diskusyon ug diin ang mga sister nga lider hingpit nga motahud ug mopaluyo sa mga desisyon sa konseho ubos sa direksyon sa mga lider sa priesthood kinsa naghupot sa yawe.

3. Ang mga lalaki ug babaye patas sa mata sa Dios.

Ang mga lalaki ug babaye patas sa mata sa Dios ug sa mga mata sa Simbahan, apan ang patas wala magpasabut nga parehas. Ang mga responsibilidad ug balaan nga mga gasa sa mga lalaki ug babaye lahi sa ilang kinaiyahan apan dili ang importansya o impluwensya niini. Ang Dios molantaw sa isigka sekso kon unsay mas maayo o mas importante. Si Presidente Hinckley namahayag ngadto sa mga babaye nga “ang atong Mahangturong Amahan … walay gimugna nga kamo mahimong mas ubos sa Iyang labing gihimaya nga mga nilalang.”⁵

Ang uban naglibug ug napakyas sa paghunahuna og tul-id kon magkompara sa mga buluhaton sa mga lalaki ngadto sa mga babaye ug sa mga buluhaton sa mga babaye ngadto sa mga lalaki.

Gipalibutan ko og mga babaye sa akong tibuok kinabuhi. Ako adunay 3 ka igsoong babaye. (Ako ra ang bugtong lalaki.) Ako adunay 5 ka mga anak nga mga babaye, 24 ka apo nga babaye, ug 19 ka apo sa tuhod nga babaye. Ug, siyempre, ako napanalanginan pinaagi sa 63 ka tuig nga kaminyoon sa akong asawa, si Barbara. Dugay nakong nakakat-on sa pagpaminaw kaniya. Akong nakat-unan nga kon siya maghunahuna og usa ka butang o adunay kusog nga pagbati kabahin sa pamilya, mas maayong maminaw ko niya tungod kay sa hapit kada sitwasyon siya nadasig. Ako mismo nasayud kon sa unsang paagi ang adult nga mga sister ug batan-ong mga inahan usahay mobati ug usahay nagduha-duha sa bili sa ilang kaugalingon ug sa ilang abilidad nga makatampo. Apan saksi usab ko nga kon sila modangop ngadto sa langit, sila mapanalanginan og kalig-on ug konbiksyon nga ang Amahan ug Anak nakasabut sa ilang mga pagbati.

Ang mga babaye mianhi sa yuta uban sa talagsaong espirituhanong gasa ug natural nga mga abilidad. Kini tinuod ilabi na kabahin sa mga bata ug pamilya ug sa kaayuhan ug sa pag-amuma sa uban.

Ang mga lalaki ug babaye adunay lain-laing mga gasa, lain-laing mga kalig-on, ug lain-laing mga panglantaw ug hilig. Kana mao ang usa sa mga sukaranang rason nganong nagkinahanglan ta sa usag usa. Nagkinahanglan og lalaki ug babaye sa pagmugna og pamilya, ug nagkinahanglan og mga lalaki ug babaye sa paghimo sa buhat sa Ginoo. Ang bana ug asawa nga matarung nagtinabangay makahingpit sa usag usa. Kita magmabinantayon nga dili kita mosulay sa pag-usab sa plano sa Langitnong Amahan ug sa mga katuyoan sa atong kinabuhi.

4. Ang tanang mga anak sa Dios adunay access sa mga panalangin sa priesthood.

Kon ang mga lalaki ug mga babaye moadto sa templo, sila tugahan og samang gahum, nga nagpasabut nga gahum sa priesthood. Samtang ang awtoridad sa priesthood gidumala pinaagi sa mga yawe sa priesthood, ug ang mga yawe sa priesthood gihuptan lang sa takus nga mga lalaki, maka-access sa mga gahum ug ang mga panalangin sa priesthood maanaa sa tanang mga anak sa Dios.

Sama sa gipasabut ni Presidente Joseph Fielding Smith (1876–1972): “Ang mga panalangin sa priesthood dili lang para sa mga lalaki. Kini nga mga panalangin gibu-bu usab … sa tanang matinud-anon nga mga babaye sa Simbahan. … Ang Dios nagtanyag sa Iyang anak nga mga babaye sa tanang espirituhanong gasa ug panalangin nga maangkon sa Iyang anak nga mga lalaki.”⁶

Kadtong nagpabunyag ug dayon nakadawat sa ilang endowment diha sa balay sa Ginoo mahimong makadawat sa mabungahon ug talagsaon mga panalangin. Ang endowment sa literal nga paagi gasa sa gahum. Ang tanang mosulod sa balay sa Ginoo makapahigayon sa mga ordinansa sa priesthood.

Ang atong Amahan sa Langit manggihatagon sa Iyang gahum. Ang tanang lalaki ug babaye maka-access niini nga gahum aron makatabang sa ilang kinabuhi. Ang tanan nga mihimo og sagradong mga pakigsaad sa Ginoo ug kadtong mituman niadtong mga pakigsaad mahimong makadawat og personal nga pagpadayag, mapanalanginan sa pagpangalagad sa mga anghel, makigsulti sa Dios, makadawat sa kahingpitan sa ebanghelyo, ug, sa katapusan, mahimong mga manununod kauban ni Jesukristo sa tanan nga anaa sa atong Amahan.

5. Ang Simbahan nagkinahanglan sa tingog ug hugot nga pagtuo sa mga babaye.

Kita nagkinahanglan sa talagsaon, impluwensyal nga tingog ug hugot nga pagtuo sa mga babaye. Kita nagkinahanglan ilang makat-unan ang doktrina ug masabtan ang atong pagtuo aron sila makapamatuod sa kamatuoran sa tanan nga mga butang—kana nga pagpamatuod mahimong gipakigbahin diha sa campfire sa usa ka kamping sa Young Women, usa ka miting sa pagpamatuod, sa usa ka blog, o sa Facebook. Ang matinud-anong babaye lang nga Santos sa Ulahing mga Adlaw ang makapakita sa kalibutan kon unsa nga matang nga babaye sa Dios ang naghimo og pakigsaad ug nagtuo.

Walay usa kanato nga motugot nga magbarug ug maghinan-aw lang nga ang mga katuyoan sa Dios nagkaubos ug gibaliwala. Modapit ko ilabi na sa mga sister sa tibuok Simbahan sa pagtinguha sa giya sa langit aron masayud kon unsay ilang mahimo aron madungog ang ilang tingog sa hugot nga pagtuo ug pagpamatuod. Ang mga General Authority ug mga sister kinsa mga kinatibuk-ang opisyales dili makahimo nga sila lang. Ang full-time nga mga misyonaryo dili makahimo nga sila lang. Ang mga lider sa priesthood ug auxiliary dili makahimo nga sila lang. Kitang tanan kinahanglan modepensa sa atong Amahan sa Langit ug sa Iyang plano. Kitang tanan kinahanglan manalipod sa atong Manluluwas ug mopamatuod nga Siya mao ang Kristo, nga ang Iyang Simbahan napahiuli sa yuta, ug nga adunay butang nga matarung ug sayop.

Kon kita makabaton og kaisug sa pagpamulong ug panalipdan ang Simbahan, una kita kinahanglan nga mangandam sa atong kaugalingon pinaagi sa pagtuon sa mga kamatuoran sa ebanghelyo. Kita kinahanglan nga molig-on sa atong kaugalingong pagpamatuod pinaagi sa makugihon, inadlaw nga pagtuon sa kasulatan ug pinaagi sa pag-angkon sa saad ni Moroni nga kita mahimong “masayud sa kamatuoran sa tanan nga mga butang” (Moroni 10:5) kon kita magtinguha niini pinaagi sa mapainubsanong pag-ampo ug pagtuon.

Ayaw paggahin og panahon aron usbon o i-adjust ang plano sa Dios. Wala tay panahon para niana. Walay hinungdan kon ato pang itino unsaon pag-organisar ang Simbahan sa Ginoo sa laing paagi. Ang Ginoo mao ang nangulo niini nga simbahan, ug kitang tanan makasunod sa Iyang direksyon. Ang mga lalaki ug babaye nagkinahanglan og dugang nga pagtuo ug pagpamatuod sa kinabuhi ug Pag-ula sa atong Ginoong Jesukristo ug dugang nga kahibalo sa Iyang mga pagtulun-an ug doktrina. Kita kinahanglang og klarong hunahuna aron ang Espiritu Santo makatudlo nato kon unsay buhaton ug unsay isulti. Kita kinahanglang tul-id nga maghunahuna niining kalibutan sa kagubot ug nagbaliwala sa mga butang sa Dios.

Mga sister, ang mahimo sa inyong impluwensya talagsaon—usa ka butang nga dili mahimo sa mga lalaki. Walay makapanalipod sa atong Manluluwas nga mas madanihon o epektibo kay kaninyo—ang anak nga mga babaye sa Dios nga adunay igong espirituhanong kalig-on ug konbiksyon. Ang impluwensya sa babaye nga nakabig dili masukod, ug ang Simbahan nagkinahanglan sa inyong impluwensya karon gyung panahona.

Akong ibilin kaninyo ang akong pagsaksi ug pagpamatuod nga kita anaa sa panahon diin kita kinahanglang maghiusa—mga babaye ug lalaki nga hamtong, batan-on ug mga bata. Kita kinahanglang mobarug para sa plano sa atong Langitnong Amahan. Kita kinahanglan nga manalipod Kaniya. Siya karon gisalikway. Dili kita mahimong walay buhaton isip mga miyembro sa Simbahan ug motugot nga padayon kanang mahitabo nga dili magmaisugon aron madungog atong tingog.

Hinaut ang Dios mopanalangin kanato aron makabaton og kaisug sa pagtuon sa yanong mga kamatuoran sa ebanghelyo ug dayon ipakigbahin kini sa tanan natong oportunidad.